Mateo 24

1Tayta Diosninchipa wasinpita Jesús llucshiycaptin, purïshijnincuna niran: ‹‹Tayta, mä, ricay. Achic-achicyaycaj rumicunawan Tayta Diosninchipa wasinta pirgasha. Sumaj cuyayllapaj, ¿au?›› 2Jesúsna niran: ‹‹Au, llapanta ricaycanchi. Chaypis sumaj tantiyacunquiman. Imayllaga llapan ricashayqui ushyacanga. Rumiwan pirgararsi, llapanmi juçhurachish canga.›› 3Chaypita Ulïbus puntaçhu Jesús jamaraycaptin, purïshijnincuna rinrillançhu tapuran: ‹‹Tayta, ¿imaytaj Tayta Diosninchipa wasinta juçhurachinga? ¿Imanaypataj shimiqui çharcucänantapis, cay pacha ushyacänantapis musyashaj?›› nir. 4Jesúsna niran: ‹‹Pipis pantachishurunquiman. 5Achcaj pantachicujcuna shamunga: ‹Tayta Diosninchi caçhamushan Washäcujmi cä› nir. Achcaj çhasquicamajta pantachinga. 6Wacçhu-cayçhu wañuchinacuy jatariptinpis, ama mancharinquichu. Chaycunaraj cangapaj. Chaypis cay pacha mana ushyacangarächu. 7Cay pacha ushyacänanpäga marcan-marcan wañuchinacungapaj. Muçhuy captinpis, yargaywan runacuna wañunga. Chay-tucuyçhüpis pacha juyupa sicsicyanga. 8Chaypis runacuna mana ushyacangarächu. Manchäga ñacayllarämi jallaringa. 9‹‹Çhasquicamashayqui-janan juyu runacunapa maquinman çhayachishunquipaj. Ñacachishunquipaj. Wañuchishunquipaj. Llapan runa chiquishunquipaj. 10Achcaj runa: ‹Jesúspa shiminta çhasquicushcä› nirpis, wasguimanga. Quiquin-puralla wañuymanpis jitarpanacunga. Chiquipänacunga. 11‹‹Juchallaçhu arujcuna jataringa: ‹Tayta Diosninchipa shiminta willacü› nir. Achcajta pantachinga. 12Runacunana Tayta Diosninchipa shiminta wiyayta mana munar, juyuyanga. Mana llaquipänacunganachu. 13Ima captinpis, jipaman ama cutiricunquichu. Mana yamacällar shimïta wiyacuptiqui, imaycamanpis maquinçhu Tayta Diosninchi cawachishunquipaj. 14May-chayçhüpis llapan runata shimï willapäcush canga: ‹Tayta Diosninchi maquinçhümi llapan runata cawachiyta munan. Alli willapäta wiyaptinraj, cay pacha ushyacänan çhayamunga› nir. 15‹‹Willacuj Danielpa shiminta sumaj tantiyacärinquiman. Payga unayna niran: ‹Chiqui runacuna yaycapur, Tayta Diosninchita wasintinta pampaman çhuranga. Manchapacushantapis içhichinga.› Millanaypaj rurashancunata ricar, 16juclla jishpicärinquiman. Judea quinrançhu tiyajcuna puntacunaman jishpicärinman. 17Wasi puncuçhu caycar, ruriman ama yaycunquimanchu. Imayquicunatapis ama jurgunquimanchu. 18Çhacrapitapis wasiquiman ama cutinquimanchu. Müdanayquita ama shuntanquimanchu.›› 19‹‹Ñacachishan wichan jishyaj warmicunapis, pishi wamrayujcunapis cuyapaypaj ñacanga. 20Chaymi jishpinayqui junaj tamya wichanman mana çhayananpaj, diyawardaman mana çhayananpaj Tayta Diosninchita mañacäriy. 21Chay wichan juyupa ñacay canga. Chaynuy ñacay imaypis mana caranchu Tayta Diosninchi cay pachata camashanpita-pacha. Chaynuypis yapay mana imaysi cangapänachu. 22Wamrachacushancunata llaquipar, Tayta Diosninchi chay ñacay junajcunata wallcayächinga. Manchäga pipis mana wañuypita jishpinmanchu. 23‹‹Chaymi pipis: ‹Mä, ricay. Tayta Diosninchi caçhamushan Washäcujninchi shamusha. Çhayaycämun› nir nishuptiquisi, ama çhasquipanquichu. 24Chay wichan Washäcuj-tucujcuna, willacuj-tucujcuna ricarimungapaj. Munayniyuj car, tucuyta ruranga runacunata riguichinanpaj. Imaysi runa mana ricashancunatapis ruranga. Chayta rurar, Tayta Diosninchi acracushan runacunatapis waquinta pantachinga. 25Canan sumaj tantiyacunquiman. Willapänajpaj cashanta mayna willapashcaj. 26‹‹Chaymi: ‹Washäcujninchi chunyajçhu caycan› nishuptiqui, ama aywanquichu. ‹Wasi ruriçhümi Washäcujninchi pacaraycan› nishuptiquipis, ama çhasquipanquichu. 27‹‹Tayta Diosninchi caçhamasha. Cutimuptïga, illaguta llapan ricashan-jina llap-llapanmi ricamanga. 28Rimaypis purin. ‹Siucacunash micunanta ricar, maymanpis jutucan.› Cutimushätapis llapan runa mayanga.›› 29‹‹Juyupa ñacaycuna çhawarcuptillan, ‹Inti wañucäcunga. Quillapis mana achicyämunganachu. Istrïllacunapis shicwamunga. Janaj pachapis juyupa tapsinga.› 30Chaypitaraj cutimunäta mayanquipaj. Llapan runa mancharir, waganga. Chay junaj Tayta Diosninchi caçhamaptin, munayniyuj car, pucutay janançhu achic-achicyaycar cutiycämujta ricamanquipaj. 31‹‹Tayta Diosninchina anjilcunata caçhamunga. Paycunana curnïtanta sumaj suynachimur, chay-tucuypita Tayta Diosninchi acracushan runacunata shuntamunga. Janaj pachapa cantunpita juc-caj cantuncaman shuntamunga. 32‹‹Jïgus yürawan tincuchiypa tantiyacushun. Yüran chillguiptin, tamya quilla jallaycunanta musyanchi. 33Chay-jina llapan willapashäcuna çharcuptin, cutimunä caycashanta tantiyacärinquipaj. 34‹‹Sumaj tantiyacunquiman. Waquinniquipa ricay ñawiquiçhu llapan çharcucanga. 35Janaj pachapis, cay pachapis ushyacanga. Shimïmi ichanga mana jungacangachu. Llapanmi çharcucanga. 36‹‹Cutimunä junajta Tayta Diosninchi pitapis mana musyachishachu. Anjilnincunatapis, nuwatapis mana musyachimashachu. Quiquin Taytallanchim musyaraycan. 37‹‹Sumaj tantiyacunquiman. Tayta Diosninchi caçhamasha. Yapay caçhamänan wichanga Noé cawashan wichan-jina runacuna cawarcaycangapaj. 38Noé cawashan wichan lücu tamya mana jallarishancaman runacuna cawashanwan cawacurcaycaran. Jauca micucuran. Upucuran. Waquinga majachacaycaran. Bütiman Noé jigacurcuptinmi ichanga, lücu tamya jallacuycuran. 39Chaycaman runacuna imatapis mana yarpaçhacullar cawaran. Yacu çhayar janançhu ricacuptin llapan wañur, ushyacayman çhayaran. Chay-jina Tayta Diosninchi caçhamaptin, cutimushä wichanpis runacuna cawashanwan cawarcaycangapaj. 40‹‹Cutimunä junaj ishcaj runa çhacraçhu arurcaycaptin, juc-cajllata shuntacushaj. Jucnintam ichanga jaguiycushaj. 41Ishcaj warmi agacurcaycaptinpis, juc-cajllata shuntacushaj. Jucnintam ichanga jaguiycushaj. 42‹‹Chaymi ricchaycar imaypis cawanquiman. Nuwam Taytayqui caycä. Imay üra cutimunätapis mana musyanquichu. 43Sumaj tantiyacunquiman. Wasiman suwa yaycunanta musyar, wasiyuj mana puñucunmanchu. Manchäga suwa suwapänanpita ricchaycar waranman. 44Chaymi jamcunapis mayaj-mayajlla shuyarpaycämanquiman. Tayta Diosninchipa caçhan cashpä mana yarpashpita cutimushaj.›› 45‹‹Mä, sumaj tantiyacunquiman. ¿Mayganiquiraj alli mincayman, tantiyacuj mincayman tincunquiman? Mincay alli captin, tantiyacuj captin, capural cananpäshi wasiyuj çhuranga. Capuralga mincay-masincunata sumajshi rican. Jaran. 46Capuralninpa shiminta çharcuptin wasiyuj cutimur, allipash ricanga. 47Sumaj tantiyacunquiman. Allita rurashanpita, capuralpa maquinmanna llapanta çhuranga. 48Juyu capuralshi ichanga shungullançhu yarpaçhacunman: ‹Wasiyuj mana cutimungarächu› nir. 49Chayshi mincay-masincunata magar ushyan. Micur, upyallar juyan. 50Wasiyuj mana musyash junajçhu illajpita cutiramunga. 51Llutanta rurashanpitash juyu mincayninta mana cuyapaypa wascar ushyanga. Jarguringa: ‹Juyu-masiquicunawan juyämuy› nirshi. Chayçhu atayparaj waganga. Juyupa ñacar, quiruntapis uçhunga.


Copyright
Learn More

will be added

X\