Mateo 20

1Mä, tincuchiypa tantiyachishayqui. Piyunta ashij-yupay Tayta Diosninchipis runacunata maquinman shuntan. Juc runash tuta-tutalla piyuncunata ashiran çhacrançhu arüshinanpaj. 2Juc jurnalta pägashayqui nirshi llapanta aruchiran. 3Çhajçha inti-yupayshi çhacrayuj runa yapay ricaçhacuj aywaran. Marcaçhu jitaraj runacunata ricarshi, 4niran: Arüshimay. Arupacushayquipita juc jurnalta pägashayqui. Niptin, änirshi chay runacuna arüshij aywaran. 5Çhacrayuj runa tarishanman-tupush piyunta aruj caçharan waquinta lasdüsi, waquintanash jatun mallway. 6Tacsha mallwaypis çhacrayuj runa yapayshi marcaman aywaran. Runacuna jitarpäcuycajta tarir, tapusha: ¿Imanirtaj jitarpäcuycanqui? ¿Manachu aruyniqui can? ¿Juyaytachu jitarpäcunqui? nirshi. 7Chay runacunanash niran: Pillasi mana mincacamashapishchu. Çhacrayuj runana niran: Arüshimay. Çhacräman ayway. Niptin, paycunapis änirshi aywaran. 8Chacarcuptinnash, capuralninta çhacrayuj niran: Piyunninchicunata jayarcur-jayarcur llapanta pägay. Jipata çhayamujta puntata päganqui. Tutapita arujcunata ushyanantaraj päganqui. 9Piyuncunana çhacrayuj pägashantash çhasquiran. Tacsha mallway aruj yaycujcunapis juc jurnaltash çhasquiran. 10Chaynuy pägaptinshi, tutapita-pacha arujcuna achcata çhasquiyta yarparaycaran. Chaynuy yarparcaycarsi, juc jurnaltash çhasquiran. 11Chayllata çhasquirshi, çhacrayujta jagayapar niran: 12Jipataraj çhayamujcuna juc çhajçhalla arusha. Juc çhajçhalla arush caycaptin, ¿imanirtaj juc jurnaltaraj pägashcanqui? Nuwacunam ichanga rasunpa juyayta arushcä. Juyayta aruptï, shanaypis wapçhamasha. Sumaj uticashcä. 13Chayshi çhacrayujna niran: Tayta mishti, mana llutantachu rurashcä. Jamwan juc jurnalta päganajpaj parlashcanchi. Rimashä-jina pägashcaj. 14Cananga päguyquita çhasquicurcur, aywacuyna. Shungü munaptin, jamcunata pägashä-jina junajraj aruyman yaycamujcunatapis pägayta munä. 15Quiquïpa jillaynïta imatapis ruracüman, ¿au? Ama jaticämuychu. Alli shungu caycaptïpis, mallaj carcaycanqui. 16Canan sumaj tantiyacuy. Waquin runa pampaman çhurash captinsi, Tayta Diosninchi alli ñawinpa ricanga. Waquincunam ichanga alli ricash captinsi, Tayta Diosninchipa ñaupanman çhayar, mana alli ricashnachu canga. 17Jerusalén marcaman wichaypa aywarcaycashançhu çhunca ishcaywan purïshijnincunallata shuntarcur, Jesús niran: 18Jerusalén marcaman aywaycashanchita musyanqui. Tayta Diosninchi caçhamasha. Chaypis waquin runacuna mayur cüracunapa maquinman, Moiséspa shiminta yaçhajcunapa maquinman çhayachimanga. Paycuna wañuyman jitarpamanga. 19Wañuchimänanpaj jäpa runacunapa maquinman çhayachimanga. Ashllir ushyamanga. Juyupa wascamanga. Rusçhu wañuchimanga. Wañuchimaptinsi, quimsa junajta Tayta Diosninchi cawarachimanga. 20Wamran Santiagutawan Juanta pushacurcur, Zebedeupa warmin Jesúsman çhayaran. Ñaupanman jungurpacuycur, Jesústa niran: Tayta, mañacushäta aunimay, ari. 21Jesúsna tapuran: ¿Imaçhütaj yanapäshayqui? nir. Tapuptin, niran: Tayta, mayur mandaj cayman çhayar, wamräcunatapis mandäshishunayquipaj çhurapaycamanqui, ari. Jucninta dirïcha-caj läduyquiman jamachiy; jucnintana isquirda-caj läduyquiman. 22Wamrancunatana Jesús niran: Imata mañacaycämashayquitapis mana musyanquichu. Tapushayqui. Nuwata-jina juyupa ñacarcachir imamanpis çhayachishuptiqui, ¿içhipunquimanchuraj? nir. Paycunana niran: Au. Içhipushämi. 23Jesúsna niran: Rasunpa ñacashä-jina ñacanquipaj. Mandäshimänayquipaj çhuranajmi ichanga mana camacanchu. Chayga Papänïpa maquinçhu caycan. Paymi quiquin acracushanta dirïcha-caj lädümanpis, isquirda-caj lädümanpis jamachinga. 24Santiaguwan Juan mañacushanta wiyar, çhuncaj purïshij-masincuna ullgucaycäriran. 25Chaura llapanta jayaycur, Jesús niran: Jäpa runacuna juc-niraj cawashanta musyanqui. Paycuna Tayta Diosninchita mana manchapacunchu. Mandajnincunapis ullgurcur-ullgurcur, nishan-nishan marca-masincunata imatapis rurachin. 26Jamcunam ichanga chaynuy ama canquimanchu. Munayniyuj cayta munar, llapantaraj yanapanquiman. 27Mandaj cayta munar, llapanpa manduntaraj ruranquiman. 28Tayta Diosninchi caçhamasha. Chaypis mana munayniyuj cayta ashirchu shamushcä; manchäga pï-maytapis yanapänäpaj. Tayta Diosninchipa maquinçhu cawananpaj cawaynïpa çhaninwan may-may runata jishpichishaj . 29Jericó marcapita Jesús aywacuptin, achcaj runa jipanta aywacuran. 30Jesús aywaycashanta wiyar, caminu wajtallançhu jamarpaj ishcaj japracunapis jayacuran: Unay mandaj Davidpa willcan Jesús, llaquipaycallämay, ari nir. 31Runacunana ullgüparan: Upälla nir. Chaypis callpacuycurraj japracuna jayacuycaran: Unay mandaj Davidpa willcan Jesús, llaquipaycallämay, ari nir. 32Chaynuy jayacuptin, Jesús içhicuycuran. Nircur japracunata jayarcur, tapuran: ¿Imallaçhütaj yanapäshayqui? nir. 33Japracunana niran: Tayta, ñawï ricananta munä. 34Japracunata llaquipar, Jesús ñawincunata yataycuran. Yataycuptin, ñawin quiçhacäcuran. Ricashpan Jesústana purïshiran.

will be added

X\