1 Judea quinran Belén marcaçhu Jesús yuriran. Judea marcacuna mandaj Herodespa maquinçhu caycaran. Chay wichan inti jigamunanpita Jerusalén marcacaman tantiyaj runacuna çhayaran. Paycuna ima-imapaj istrïlla cashantapis sumaj tantiyaran. 2 Jerusalén marcaçhüna tapucuran: Israel runacunapa mandajnin, ¿mayçhütaj yurisha? Marcäpita-pacha musyachicuj istrïllata ricamushcä. Chaymi ricsichimashan mallwata alliman çhuraj shamushcä nir 3 Israel runacunapa mandajnin, ¿mayçhütaj yurisha? niptin, mandaj Herodespis, Jerusalén marca runacunapis mancharicäcuran. 4 Chaymi mandaj Herodes mayur cüracunata, Moiséspa shiminta yaçhajcunata jayachiran: Tayta Diosninchi caçhamushan Washäcuj, ¿mayçhütaj yurinan casha? nir. 5 Tapuptin, niran: Judá quinran Belén marcaçhüshi. Chayçhu yurinanpäshi unay willacuj musyachicur isquirbiran: 6 Judá quinran Belén runacuna, waquin marca runacuna jatun-tucuptinsi, alli ricash canquipaj. Marcayquiçhu juc mandaj yuringa. Paypa maquinçhu llapan Israel runa cawanga. Uysha michij ricashan-jina llapanta ricanga nir. 7 Chaura yaçhajcunata pacayllapa jayarcachir, mandaj Herodes tapuran: ¿Imaypitanataj istrïllata ricashcanqui? nir. 8 Imaypita ricarishantapis willaycuptin, Belén marcaman caçharan: Mallwa ashij mä, ayway. Tarirga, nuwatapis willamanqui mallwata alliman çhuraj aywanäpaj nir. 9 Chaura chaynuy niptin, Belén marcapa aywacuran. Maypa aywananpäpis ricarij istrïlla ñaupaparan. Ichanga mallwa yurishan marca ricänançhu içhicuycuran. 10 Istrïlla içhicuycuptin, yaçhajcuna jatunpa cushicuran. 11 Wasiman yaycur, Maríata mallwantinta tariran. Mallwanpa ñaupanman jungurpacuycur, alliman çhuraran. Jipinta pascarir, cuyachicuynin jurita, insinsuta, pirjümita juycuran. 12 Chaypita suyñuynillançhu Tayta Diosninchi willaran mandaj Herodesman mana cutinanpaj. Suyñuyninçhu willaycuptin jucläpa tumarcur, yaçhaj runacuna marcanman cuticäriran. Mandaj Herodesman mana cutirannachu. 13 Istrïlla tantiyaj runacuna aywacuriptin, suyñuynillançhu Tayta Diosninchi caçhamushan anjil Joséta niran: Jatariy. Warmiquitawan mallwata Egipto marcaman jishpichicuy. Willaptïraj, cutimunqui. Mandaj Herodes wamrayquita wañuchinanpaj ashinga nir. 14 Chaynuy niptin, José jataricurcuran. Chay chacaylla warmintawan mallwanta pushacurcur, Egipto marcaman aywacuran. 15 Egipto marcallaçhu mandaj Herodes wañushancaman tiyacuran. Chaynuy çharcunanpaj unay willacujninwan Tayta Diosninchi musyachicuran: Egipto marcapita Wawäta jayamushcä nir. 16 Chaura istrïlla tantiyajcuna mana çhayaptin, mandaj Herodes juyupa ullgucäcuran: Istrïlla tantiyajcuna llullapämasha nir. Chaymi willashanta tantiyacurir, Belén marca quinrançhu iti wamracunata murucuncunawan wañuchiran. Ishcay watayujpita uraman llapan ullgu wamrata wañuchiran. 17 Chaymi willacuj Jeremíaspa shimin çharcucaran. Jeremíasga unayna niran: 18 Ramá marcaçhu tiyaj runacuna ataran. Atashanta llapan wiyaran. Raquelpa wawancunata wañuchishanpita juyupa wagaran. Wawancuna ushyacashanpita wagar amachaptinsi, mana çhawaranchu. 19 Mandaj Herodes wañucuptinna Egipto marcaçhu José caycaptillanraj, suyñuynillançhu Tayta Diosninchi caçhamushan anjil niran: 20 José, jatariy. Warmiquita mallwantinta pushacurcur, Israel marcaman cuticäriy. Wamrata wañuchiyta munajcuna wañucushana. 21 Chaynuy niptin, José jataricurcuran. Warminta mallwantinta pushacurcur, Israel marcaman cuticuran. 22 Chay wichan Judea quinranta mandaj Herodespa wamran Arquelao mandaycaran. Chaymi Judea quinranman çhayayta José mana munaranchu. Tayta Diosninchipa anjilninpis suyñuynillançhu willaran Galilea quinranpana aywacunanpaj. 23 Willaptin, Nazaret marcaman juyaj aywacuran. Llapanpis camacaran willacujcunapa shimin çharcucänanpaj. Willacujcuna unayna niran: Washäcujta ricsingapaj: Nazaret runa nir.
