Mateo 17

1Chaypita sujta junajta Pedruta, Santiaguta, Santiagupa wauguin Juanta pushacurcur, puntaman Jesús jigaran. 2Puntaçhu quimsan purïshijnincunalla ricapaycaptin, achic-achicyaycajman Jesús ticracuriran. Inti-jinaraj jajllan achic-achicyäcurcuran. Müdananpis yuraj llutpiman ticracuriran. 3Unay willacuj Moiséswan Elíaspis ricariparcur, Jesúswan parlaycaran. 4Chaura Pedro niran: ‹‹Tayta Jesús, cayçhüga alli juyäcuymi. Munaptiqui, quimsa tacmata rurarishaj: jucta jampaj, jucta Moiséspaj, jucta Elíaspaj.›› 5Pedro rimaycaptillan, quimsanta achic-achicyaycaj pucutay chapacurcuran. Pucutay rurinpitana Tayta Diosninchi nimuran: ‹‹Jesúsga cuyay Wawämi. Shungüman tincun. Shiminta wiyacuy.›› 6Rimamushanta wiyar, purïshijnincuna manchariywan pampaman llashtacaycäriran. 7Paycunata yataycur, Jesús niran: ‹‹Jatariy. Ama manchariychu.›› 8Niptin, ricaçhacurishançhu quiquillantana Jesústa ricaran. Pipis mana carannachu. 9Puntapita yarpaycämushançhu purïshijnincunata Jesús willaparan: ‹‹Tayta Diosninchi caçhamasha. Canan ricashayquita pitapis ama willapanquichu wañushäpita manaraj cawarimushäcaman›› nir. 10Chaynuy niptin, paycuna tapuran: ‹‹¿Imanirtaj Moiséspa shiminta yaçhajcuna willacun: ‹Elías shamushanpitaraj Washäcuj shamunga› nir?›› 11Chaura Jesús niran: ‹‹Au, rasunpa Elías cutimur, runacunata anyapanga Tayta Diosninchipa shungun munashannuy cawananpaj. 12Chaypis tantiyacunquiman. Elías mayna shamusha. Shamuptinsi, runacuna mana ricsij-tucur shimintapis mana çhasquiranchu. Manchäga shungun munashallanta ruraran. Elíasta ñacachishan-jina ñacachimanga Tayta Diosninchipa caçhan caycaptïsi.›› 13Chayrämi purïshijnincuna tantiyacuriran Elíaspaj rimar, Ushyachicuj Juanpaj rimaycashanta. 14Puntapita yarpur runacuna juturpashanman çhayaptin, juc runa Jesúspa ñaupanman jungurpacuycuran: 15‹‹Tayta, llaquipämar yanapaycallämay, ari. Wamräta wañupay charin. Juyupa ñacan. Ninamanpis, yacumanpis yaparir-yaparir tunin. 16Waquin purïshijniquicunata mañacurä allchacächinanpaj. Ichanga mana camäpacuranchu›› nir. 17Jesúsna niran: ‹‹Jamcuna Tayta Diosninchiman mana yupachicunquichu. Juchallaçhüpis arunqui. ¿Imaycamanraj tantiyachishayqui? Mana yupachicamaptiquim, yamacashcäna.›› Wamrapa papänintana niran: ‹‹Wamrayquita mä, apamuy.›› 18Wamranta çhayachiptin Jesús piñacuptin, wamrata supay caçhariycuran. Wamrana allchacash ricacuran. 19Chaypita purïshijnincuna pacayllapa Jesústa tapuran: ‹‹¿Imanirtaj nuwacuna supayta jarguyta mana camäpacushcächu?›› nir. 20- 21Chaura Jesús niran: ‹‹¿Imanirtaj Tayta Diosninchiman mana yupachicunquichu? Sumaj tantiyacunquiman. Yangallapis yupachicurga, tagay jatun puntata ninquiman: ‹Caypita washaman witicuy.› Niptiqui, änir witicunman. Imapis sasa mana cangachu. (Chay-niraj supayta ayünunpawan Tayta Diosninchita mañacurraj jargunqui.››) 22Galilea quinranpa puriycashançhu purïshijnincunata Jesús niran: ‹‹Tayta Diosninchi caçhamasha. Chaypis juc runa charimar, juyu runacunapa maquinman çhayachimanga. 23Paycunana wañuchimanga. Quimsa junajtam ichanga cawarimushaj.›› Niptin, purïshijnincuna juyupa llaquicuran. 24Cafarnaún marcaman purïshijnincunawan Jesús çhayaptin, jillayta shuntajcuna Pedruta tapuran: ‹‹Mandajniqui, ¿manachu jillayta çhuran Tayta Diosninchipa wasinpaj?›› nir. 25Pedruna niran: ‹‹Au. Çhuran.›› Wasiman cutir mana rimaptinraj, Jesús tapuran: ‹‹Simón Pedro, cay pachaçhu caycaj auturdäcuna, ¿pitataj jillayta çhurachin: castancunatachu, jäpa runacunatachu?›› 26Tapuptin, Pedro niran: ‹‹Jäpa runacunatam.›› Jesúsna niran: ‹‹Chaura castancuna jillayta mana çhuranchu, ¿au? 27Ima captinpis, jillayta çhurachij mana ullgüpämänanchipaj çhurashun. Juclla yacuman ayway. Punta-caj piscädu charishayquipa shiminta quiçharir, juc jillayta tarinquipaj. Ishcaninchipaj jillayta çhuray.››


Copyright
Learn More

will be added

X\