Mateo 10

1Chaypita çhunca ishcaywan purïshijnincunata Jesús shuntaran. Nircur cargunman çhuraycur niran: Nuwapita munayniyuj caycanqui supaycunata jargunayquipäpis, jishyaçhucunatawan nanapäcujcunata allchacächinayquipäpis. 2Jesúspa purïshijnincuna çhunca ishcaywanmi caran: Pedro nishan Simón, Simónpa wauguin Andrés, Zebedeupa ishcan wamran Santiaguwan Juan, 3Felipe, Bartolomé, Tomás, jillayta shuntaj Mateo, Alfeupa wamran Santiago, Tadeo, 4Marcanpaj nanachicuj nishan Simón, Judas Iscariote. Payga Jesústa wañuyman jitarpuran. 5- 6 Çhunca ishcaywan purïshijnincunata caçhacuran. Cargunman çhurar, Jesús niran: Sumaj wiyamay. Israel runacunallaman caçhashayqui. Paycuna ujracash uysha-yupay cawan. Jäpa runacunamanmi ichanga ama aywanquichu. Samaria runacunapa marcanmanpis ama yaycunquichu. 7Israel runacunata willapar ninqui: Tayta Diosninchi shuyaraycämanchi. Maquinçhüna purichimäshun nir. 8Jishyaçhucunatapis allchacächinqui. Wañushcunatapis cawarachinqui. Jaraçhu jishyacunatapis allchacächir, allina ricanqui. Supaycunatapis jargunqui. Carguyquiman çhurar, llapan shungüwan çhurashcaj. Mana imatapis mañacushcajchu. Jamcunapis imatapis mana mañacullar, llapan shunguyquiwan carguyquita çharcunqui. 9Willapäcuj aywar, jillayniquita ama apanquichu. 10Jipiquitapis, rucanayquitapis, llanguiquitapis, garutiquitapis ama apanquichu. Shimïta willapäcujcunaga micush-upush purinan camacan. 11Marcacunaman çhayar, alli runata ashinqui. Pachacur, jucläpa aywacushayquicaman jinallançhu pacharäcunqui. 12Juc wasiman çhayar: Tayta Diosninchi yanapayculläshunqui nir wamayanqui. 13Çhasquicushushpayqui änirmi alli cawayta taringa; manchä, mana. 14Çhayashayqui marcaçhu, çhayashayqui wasiçhu mana çhasquishuptiqui, mana wiyashuptiqui, çhaquiquita pichacurir aywacunqui. 15Sumaj tantiyacunquiman. Cay pacha ushyacaptin, Sodoma quinran runacunatawan Gomorra quinran runacunata ñacachirpis, Tayta Diosninchi llaquipangaraj. Wasguipajcunatam ichanga mana llaquipällar ñacachinga. 16Sumaj tantiyacunquiman. Willapäcuj caçhar, uyshata liyun rurinman jaycurij-yupay caçhaycaj. Juyu runacunaman çhayanquipaj. Chaymi pichuysa curu-yupaypis jishpij-jishpijlla purinqui. Paluma-yupaypis llutalla purinqui. 17Sumaj tantiyacunquiman. Chiquishushpayqui mayur Israel runacunaman çhayachishunquipaj. Shuntacäna wasicunaçhüsi magashunquipaj. 18Çhasquicamashayqui-janan Roma auturdäcunamanpis, Roma mandajcunamanpis çhayachishunquipaj. Wacpa-caypa purichishuptiquisi, shimiquita ama amucurcunquichu. Manchäga auturdä captinsi, jäpa runacuna captinsi, pï-maytapis nuwapita willapanqui. 19Auturdäcunaman çhayachishuptiqui, ama llutäpacunquichu: ¿Imataraj rimashaj? ¿Imanayparaj chapacusha? nir. Manchäga shimiquiman Tayta Diosninchi çhurashallanta rimanquipaj. 20Quiquillayquipitachu mana rimanquipaj. Manchäga quiquin Espíritu Santu rimachishunquipaj. 21Waugui-purapis nuwa-janan wañuyman jitarpanacunga. Juc waugui chiquimar, çhasquicamaj wauguinta wañuyman jitarpunga. Papänincunapis wamrancunata wañuyman jitarpunga. Wamrancunapis maman-taytanta chiquir, wañuyman jitarpunga. 22Çhasquicamashayqui-janan llapan runa chiquishunquipaj. Imaman çhayarpis mana wasguimaptiquiga, maquinçhümi Tayta Diosninchi imaycamanpis cawachishunquipaj. 23Juc marcapita jaticaçhäshuptiqui, juc marcamanna jishpicunqui. Sumaj tantiyacunquiman. Cutimushäcaman llapan Israel marcacunaman çhayayta mana atipanquipächu. Llapanman mana çhayaptiquisi, Tayta Diosninchipa caçhan cashpä cutimushaj. 24Jipa wamracuna mayur runacuna yarpashanta manash yarpanrächu. Uyway runapis patrunninta manash apärinmanchu. 25Jipa wamracuna mayur runa yarpashanta yarparraj cushicunman. Uyway runapis patrunninta ricacurraj, cushicunman. Sumaj wiyacunquiman. Juyu runacuna ashllimar nin: Supaycunapa mandajnin Beelzebulmi canqui. Chaynuy ashllimaptin, ¿imamanraj tincuchishunquipaj maquïçhu cawaptiqui? 26Chiqui runacuna imata rurashuptiquisi, ama manchacunquichu. Runacuna shungullançhu pacarächishanpis mayacanga. Imata yarpashanpis unayllata musyacanga. 27Chaymi rinrillayquiçhu willashäta llapan runapa rinrinman çhayachiy. Quiquillayquita willapashätapis llapan runata musyachiy. 28Chiqui runacuna wañuchishunayquita ama manchacunquichu. Wañuchishushpayquisi, almayquita mana wañuchingachu. Tayta Diosninchitam ichanga manchapacärinquiman. Payga munayniyujmi wañuyman jitarpushunayquipäpis, almayquita ninaçhu illarachinanpäpis. 29Chaymi ama mancharinquichu. Acapalla pichuysacuna mana çhaninchu. Chaypis Tayta Diosninchi camacächiptinraj, wañuyman çhayan. Pichuysata ricaycarga, ¿jungaycushunquimanchuraj? Mana. 30Tayta Diosninchipa maquinçhümi cawaycanqui. Mana imaysi jungashunquichu. Ajchayquitapis yuparaycächin. 31Chaymi imatapis ama manchacuychu. Jamcunaman pichuysacunapis mana tincunchu. 32- 33 Runacunata mana manchacur çhasquicamashayquita willacuptiqui, janaj pachaçhu Papänïpa ñaupançhu nuwapis willacushaj: Rasunpa maquïçhu purin nir. Runata manchacur wasguimaptiquim ichanga, nuwapis janaj pachaçhu Papänïpa ñaupançhu wasguishayqui. 34Shunguyquiçhu ama yarpanquichu: Cay pachaman Jesús shamusha alli cawayta tarichimänanchipaj. Runacuna mana alli cawayllaçhüchu cawanga. Manchäga çhasquicamashayqui-janan chiquir ushyashunquipaj. 35Nuwa-janan papänintapis ullgu wamran chiquinga. Warmi wamranpis mamanta chiquinga. Llumchuyninpis suydanta chiquinga. 36Juc wasiçhu quiquin-puralla tincupänacunga. Chiquinacunga. 37Shungü munashallanta ruranquiman. Mamayqui-taytayqui-janan ama jungaramanquimanchu. Wamrayquicuna-janan ama wasguiramanquimanchu. Shimïta wiyacuptiquiraj, alli ricashayqui. 38Shimïta wiyacujcuna imanuy ñacarsi, rusçhu wañuyman çhayarsi, ricay ñawïçhu alli cawanman. Manchäga purïshimayta mana camäpacungachu. 39Ñacaytapis, wañuytapis manchacur maquïçhu puriyta mana munar, ushyacayman çhayangapaj. Maquïçhu purir llapanta jaguijcunam ichanga imaycamanpis Tayta Diosninchipa maquinçhu cawangapaj. 40Shimiquita çhasquicujcuna nuwatapis çhasquicaman. Çhasquicamajcunana Tayta Diosninchitapis çhasquicun. Paymi caçhamasha. 41Pipis Tayta Diosninchipa shiminta willacujcunata çhasquiptin, willacujta-jina Tayta Diosninchipis alli ricar ayninta cutichinga. Wiyacuj runata çhasquiptin, wiyacuj runata-jina Tayta Diosninchipis alli ricar ayninta cutichinga. 42Sumaj tantiyacunquiman. Pipis: Washäcuj Jesúspa purïshijnin canqui nir yacullatasi macyaycushuptiqui, Tayta Diosninchipis alli ricar ayninta cutichinga.

will be added

X\