Marcos 9

1Jananmanpis Jesús niran: Sumaj tantiyacunquiman. Tayta Diosninchi munayniyuj cashpan llapan runata maquinçhu purichinga. Chayta waquinniquipis manaraj wañullarmi ricanquipaj. 2Chaypita sujta junajta Pedruta, Santiaguta, Juanta pushacurcur puntaman Jesús jigaran. Puntaçhu quimsan purïshijnincunalla ricapaycaptin, achic-achicyaycajman Jesús ticracuriran. 3Müdananpis llutpi utcunuy achicyaypa achicyacurcuran. Chaynuy pï tacshacurpis, mana yurajyächinchu. 4Unay willacuj Elíaswan Moiséspis ricariparcur, Jesúswan parlaycaran. 5- 6 Chaura purïshijnincuna juyupa mancharicäcuran. Rimapacuytapis mana camäpacuranchu. Chaypis Pedro sumaj mana yarpaçhacullar niran: Tayta Jesús, cayçhüga alli juyäcuymi. Quimsa tacmata rurarishaj: jucta jampaj, jucta Moiséspaj, jucta Elíaspaj. 7Chaynuy ricapaycaptillan, quimsanta pucutay chapacurcuran. Pucutay rurinpitana Tayta Diosninchi nimuran: Jesúsga cuyay Wawämi. Shiminta wiyacuy. 8Purïshijnincunana ricaçhacurishançhu quiquillanta Jesústa ricaran. Waquin mana carannachu. 9Puntapita yarpaycämushançhu purïshijnincunata Jesús willaparan: Tayta Diosninchi caçhamasha. Canan ricashayquita pitapis ama willapanquichu wañushäpita manaraj cawarimushäcaman nir. 10Quimsan musyajcuna pitapis mana willaparanchu. Ichanga quiquin-puralla parlanacäriran: ¿Imanuyparaj wañushanpita cawarimunga? nir. 11Chaynuy niptin, paycuna tapuran: ¿Imanirtaj Moiséspa shiminta yaçhajcuna willacun: Elías shamushanpitaraj Washäcuj shamunga nir? 12Chaura Jesús niran: Au, rasunpa Elías cutimur, runacunata anyapanga Tayta Diosninchipa shungun munashannuy cawananpaj. Chaypis Tayta Diosninchipa shimin isquirbirashançhu nin: Tayta Diosninchipa caçhan captinsi, Washäcujta runacuna ñacachinga. Pampaman çhurar, wasguingapaj. 13Chaypis tantiyacunquiman. Elías mayna shamusha. Paytapis Tayta Diosninchipa shiminçhu isquirbirashan-jina tucuyta rurasha. Juyupa ñacachisha. 14Chaura waquin purïshijnincunaman cutir, achcaj runa juturpaycajta tariran. Purïshijnincunana Moiséspa shiminta yaçhajcunawan tincupänacurcaycaran. 15Jesústa ricar, wamayar juclla tariparan. 16Chaura Jesús tapuran: ¿Imapitataj tincupänacurcaycanqui? nir. 17Juc runana çhaupipita nimuran: Tayta, supay upayächishan wamräta apallämushcä. 18Charir, mayçhüpis sajtar ushyan. Lausallana shiminpita aycun. Quirunta caçh-caçhyaylla uçhun. Uyutacäcun. Waquin purïshijniquicunata mañacurä supayta jargunanpaj. Ichanga mana camäpacuranchu. 19Jesúsna niran: Jamcuna Tayta Diosninchiman mana yupachicunquichu. ¿Imaycamanraj tantiyachishayqui? Mana yupachicamaptiquim, yamacashcäna. Wamrapa papänintana niran: Wamrayquita mä, apamuy. 20Chaura apapuptin Jesústa ricärir, supay wamrata sajtar ushyariran. Chaymi wamra juçhpacaçharanraj. Lausallata ajturan. 21Chaura wamrapa papäninta Jesús tapuran: ¿Imaypita-pachanataj jishyan? nir. Tapuptin, niran: Mallwa cashanpita-pacha. 22Achca cutina wañuchiyta munar, ninamanpis, yacumanpis jitarpuran. Tayta, camäpacur, llaquipaycallämay. Yanapaycallämay, ari. 23Chaura Jesús niran: ¿Imanirtaj: Camäpacur, yanapaycallämay nimanqui? Tayta Diosninchiman yupachicuptinchi, paymi llapantapis camacächin. 24Chaura wamrapa papänin juclla niran: Payman yupachicümi. Sumaj yupachicunäpaj yanapaycallämay, ari. 25Chay-chicaj runa jutucarcaycajta ricar, Jesús supayta piñacuran: Upayächicuj supay, cay wamrata caçhariy. Imaypis ama cutimuynachu nir. 26Chaura wamrata caçhariycuran. Sajtar ushyarir, japarir, supay aywacuran. Wamraga wañush-jina jitacäcuran. Chutaraycajta ricar, waquin runacuna: Wañucäcushanam ninacäriran. 27Maquinpita Jesús chutariptinmi ichanga, wamra içhicurcuran. 28Chaypita juc wasiman Jesús yaycuran. Purïshijnincunana pacayllapa tapuran: ¿Imanirtaj nuwacuna supayta jarguyta mana camäpacushcächu? nir. 29Chaura niran: Chay-niraj supayta Tayta Diosninchita mañacurraj jargunchi. 30Chaypita Galilea quinranpa Jesús aywaycaran. Pipis musyananta mana munaranchu. 31Manchäga purïshijnincunallata yaçhachir niran: Tayta Diosninchi caçhamasha. Chaypis juc runa charimar, juyu runacunapa maquinman çhayachimanga. Paycunana wañuchimanga. Quimsa junajtam ichanga cawarimushaj. 32Purïshijnincunam ichanga tantiyayta mana atiparanchu. Tapucuytapis manchacuran. 33Chaypita Cafarnaún marcaman çhayaran. Wasinman yaycurir, purïshijnincunata Jesús tapuran: ¿Imanirtaj tincupänacushcanqui? nir. 34Tapuptin, llapan upällacaycäriran. Aywaycashançhu mayna tincupänacush caycaran: ¿Mayganchiraj mayur cayman çhayashun? nir. 35Chaymi Jesús çhunca ishcaywan purïshijnincunata niran: Pipis mayur cayta munar, jipata purij cachun. Llapanpa mandu-rurajninraj cachun. 36Jinarcur llapanpa ricay ñawinçhu wamrata jayarcur margacurcur, 37niran: Yupachicamashan-janan wamracunata alli ricajcuna nuwatapis alli ricaman. Nuwata alli ricamar, caçhamaj Tayta Diosninchitapis alli rican. 38Jinarcur Juan niran: Tayta, nimashayquinuylla supayta jarguycajta ricapäcushcä. Chaypis mana purïshimaptinchi, miçhapäcushcä. 39Jesúsna niran: Ama miçhanquimanchu. Pipis yupachicamashan-janan Tayta Diosnillanchi camacächishancunata rurar, mana ashllimangachu. 40Mana chiquimashpanchi yanapaycämanchi. 41Pipis: Washäcuj Jesúspa purïshijnin canqui nir yacullatasi macyaycushuptiqui, Tayta Diosninchipis alli ricar ayninta cutichinga. 42Wamra-jina llapan shungunwan nuwaman yupachicamajcunata juchaman jançhajcuna wañuyman çhayachun. Jatun-caray marayta cuncanman wallgaparcur yacu ruri-ruricaman wicaparinman. 43- 44 Maquiqui juchata aparicachishuptiqui, muturinquiman. Ishcay maquiyuj caycar chacaj pachaman aywanayquipita alli canman juc-caj maquiyujlla cawaptiqui. Chacaj pachaçhu nina imaypis mana upingachu. 45- 46 Çhaquiqui juchata aparicachishuptiqui, muturinquiman. Ishcay çhaquiyuj caycar chacaj pachaman aywanayquipita alli canman juc-caj çhaquiyujlla cawaptiqui. 47Ñawiqui juchata aparicachishuptiqui, ujtirinquiman. Ishcay ñawiyuj caycar chacaj pachaman aywanayquipita alli canman juc-caj ñawiyujlla manchapacur cawaptiqui. Tayta Diosninchita manchapacur, maquinçhu cawachishunquipaj. 48Chacaj pachaçhu aycha curucuna mana wañunchu. Ninapis mana upinchu. 49Pitapis juchaman jançhajcunata llapantam illararachinga caçhi ruparishan-jina. 50Caçhipis sumaj alli. Puchguynin illariptinmi ichanga, ¿yapay puchguyninman cutichinquimanchuraj? Mana. Chaymi caçhi alli cashan-jina jamcunapis Tayta Diosninchipa shungun munashannuylla cawanquiman. Alli ricanacur, juc shungulla cawanquiman.

will be added

X\