1 Pacha wararcuptin, mayur cüracuna, mayur runacuna, Moiséspa shiminta yaçhajcuna jutucaran. Sisyunçhu parlanacarcärir, llapan mayur Israel runacuna Jesústa watashta mandaj Pilatuman aparan. 2 Çhayachiptin, mandaj Pilato Jesústa tapuran: ¿Rasunpachu Israel runacunapa mandajnin canqui? nir. Jesúsna niran: Quiquiquim rimashcanqui. 3 Chaura mayur cüracuna tucuy-tucuypita Jesústa tumparan. 4 Chaymi mandaj Pilato yapay Jesústa tapuran: ¿Imata nishuptiquipis, manachu chapacunqui? nir. 5 Chaynuy niptinsi Jesús mana rimacuptin, mandaj Pilato ima ruraytapis mana camäpacuranchu. 6 Pascua fiestaçhu runacuna mañacuptin, watan-watan mandaj Pilato juc rïsuta caçharij. 7 Chay wichan juyu Barrabás rïsu wiçhgaraycaran magacushanpita, wañuchicushanpita. 8 Chaymi achcaj runa mandaj Pilatuta mañacuran: Watan-watan caçharishayqui-jina juc rïsuta caçhariy, ari nir. 9 Chaura mandaj Pilato tapuran: ¿Israel runacunapa mandajnintachu caçharishaj? Paypa maquinçhüshi cawanqui nir. 10 Chiquipayllawan Jesústa mayur cüracuna apashanta mandaj Pilato mayna musyaycaran. 11 Mayur cüracunana achcaj runata shimiyaran: Barrabásta caçhariy nir mañacärinanpaj. 12 Yapay mandaj Pilato tapuran: Israelcunapa mandajnin ricsishayqui Jesústa, ¿imanäshätaj? nir. 13 Tapuptin, runacuna japariran: Rusçhu wañuchicächun nir. 14 Mandaj Pilatuna niran: ¿Imaçhütaj juchata aparicusha? Paycunam ichanga: Rusçhu wañuchicächun nir sumaj japarpararan. 15 Mandaj Pilato Israel runacuna alli ricananta munar, Barrabásta caçhariycuran. Jesústana sumaj wascaraycächir, murucuncunata inçhigaran rusçhu wañuchinanpaj. 16 Murucucunana mandajninpa sawanninman Jesústa yaycuchiran. Jinarcur llapan murucu-masincunata shuntachiran. 17 Jesústa pampaman çhurar puca jacuta jacuparan. Umanmanpis cashapita pilltarcullar curünata jatiparan. 18 Asipänan cashpan niran: Israel runacunapa mandajnin alli ricash caycullächun. 19 Jananmanpis shugushwan umançhu wirur ushyaran. Tuwapuran. Jungurpacuycur, alliman çhuraj-tucuran. 20 Pampaman çhurariycur, puca jacunta jiçhuriran. Quiquinpa müdananta ushtuparcur, rusçhu wañuchinanpaj aparan. 21 Jesústa wañuchinanpaj apaycashançhu Cirene marcapita Simónwan tincuran. Çhacrapita cutiycämuptin, paytana Jesús apashan rusta murucucuna apachiran. Simónga Alejandrupawan Rufupa taytan caran. 22 Murucucunana Gólgota nishan pachaman Jesústa çhayachiran. Gólgota ninantam rimayninçhu: Calabïra pata nin. 23 Usuncachicuj jampitawan bïnuta tallurcachir, Jesústa upuchiyta munaran. Paymi ichanga mana upuranchu. 24 Rusman läbaycur, murucucuna surtita jitaran Jesúspa müdananta mayganinpis apacunanpaj. 25 Çhajçha intiman mana çhayaptillan, rusman Jesústa läbaran. 26 Imapita wañuchishanpis musyacänanpaj rus jananman isquirbiran: Cayga Israel runacunapa mandajnin nir. 27 Jesústawan ishcaj suwatapis iwal rusman läbaran: jucninta dirïcha-caj lädunman, jucnintana isquirda-caj lädunman. 28 Chaynuypa Tayta Diosninchi isquirbichishan çharcuran: Juchaçhu arujta-jina runacuna ricanga nir. 29 Chay quinranpa purij runacunapis Jesústa pampaman çhuraran. Ashllishpan umanta awir niran: Jamga Tayta Diosninchipa wasinta juçhurachir, quimsa junajllatashi jatarachinqui, ¿au? 30 Canan mä, wañuypita jishpiy. Ruspita mä, yarpamuy. 31 Mayur cüracunapis, Moiséspa shiminta yaçhajcunapis Jesústa pampaman çhurar, quiquin-pura ninacuran: Payga waquin runacunata jishpichishaçhi. Quiquinpis jishpiyta mana junchu. 32 Tayta Diosninchipa caçhamushan Washäcuj caycarga, Israelpa mandajnin carga, ruspita yarpamunman. Yarpamujta ricarraj, shiminta çhasquicushun. Rusman ishcaj läbaraj runapis Jesústa ashllir ushyaran. 33 Chaypita lasdüsipita mallwaycaman pacha chacacäcuran. 34 Mallwayna Jesús japaçhacuran: Eloí, Eloí, ¿lammá sabactani? nir. Rimayninçhu: Eloí, Eloí, ¿lammá sabactani? ninanga: Taytallau Tayta, ¿imanirtaj jaguiraycamashcanqui? ninanmi. 35 Japaçhacuptin, wiyajcuna niran: Mä, wiyashun. Tayta Diosninchipa unay willacujnin Elíastaçhim jayacuycan. 36 Juc runana shigui bïnuman shaputa ushmarcachir shugushman watarcur, Jesústa shuguchiyta munaran. Shuguchishpan niran: Mä, ricapäshun. Rasunpachush Elías shamunga ruspita jurgunanpaj. 37 Jesúsmi ichanga sumaj japarir, wañucäcuran. 38 Wañucäcuptin, Tayta Diosninchipa wasinçhu chaparaj bayïtapis janapita uraypa callacäcuran. 39 Imanuy wañucäcushantapis ricar, murucucunapa capitannin niran: Cay runa rasunpa Tayta Diosninchipa Wawan casha. 40 Warmicunapis carushllapita ricapaycaran. Ricapaycaran Magdalena marcapita Maríapis, shullca-caj Santiagupawan Josépa maman Maríapis, Salomépis. 41 Paycuna Jesústa yanapar purïshiran Galilea marcacunaçhu puriptin. Jesúswan Jerusalén marcaman aywaj warmicunapis achcaj ricapaycaran. 42 Diyawardaman çhayanan junaj chacanaycaptin, 43 Arimatea marca José mana manchacullar mandaj Pilatuman aywaran: Jesústa pampachicushaj nir. Payga mayur cürapa mandäshij-masin carpis, Tayta Diosninchipa maquinçhu juyayta munaran. 44 Pampachicunanpaj mañacuptin, mandaj Pilato yarpaçhacuran: ¿Wañushanachuraj? nir. Chaymi jayarcachir, murucucunapa capitanninta tapuran. 45 Au, wañushanam niptin, mandaj Pilato Joséta auniran: Pampachicuy, ari nir. 46 Auniptin ruspita ayata jurgurcur, rantishan bayïtawan José pituran. Jinarcur runa pampacunan chaga uçhcuman çhuraycuran. Uçhcu puncutana rumiwan chaparcuran. 47 Mayman pampashantapis ricapaycaran Magdalena marca Maríawan Josépa maman María.
