Marcos 14

1Chay wichan Israel runacunapa Libadüraynaj tanta nishan fiesta jallarinanpaj ishcay junajllana pishiycaran. Chay fiestata ricsij: Pascua nir. Cüracunapa mandajninwan Moiséspa shiminta yaçhajcuna yarpaçhacuycaran Jesústa chariycur wañurachinanpaj. 2Waquinna niycaran: Fiestaçhu ama charishunchu. Chariptinchi, runacuna ullgucäcur ticraparamäshuwan. 3Betania marcaçhu Jaraçhu nishan Simónpa wasinçhu Jesús micupacurcaycaptin, butïlla pirjümin aptash warmi çhayaran. Chay pirjümi sumaj çhaninyuj caran. Butïllata quiçharir, Jesúspa umanman jaycapuriran. 4Chayta ricar, waquin jurpacuna ullgucäcur quiquin-puralla parlanacuran: ¿Imapäraj pirjümita usuchisha? Ama usuchinmanchu caran. 5Manchäga quimsa paçhac (300) junaj aruypa çhaninçhu ranticunman caran. Jinarcur pishipacujcunata aypunman caran. Chaynuy nir warmita chiquiparan. 6Jesúsmi ichanga niran: Ama rimapaychu. ¿Imanirtaj tincupanqui? Umäman jaycapamar, allitam rurasha. 7Pishipacujcunata imaypis ricanquipaj. Yanapayta munar, imaypis yanapanquiman. Nuwatam ichanga waran-waran mana ricamanquipänachu. 8Chaymi cay warmi allita rurasha. Cawaycaptillä, pampamänanpaj armachimasha. 9Sumaj tantiyacunquiman. May-chayçhüpis Tayta Diosninchipa alli willacuyninta willapäcur, cay warmi allita rurashantapis willacunga. Mana imaysi jungacangachu. 10Chaura Judas Iscariote Jesúspa purïshijnin caycarsi, mayur cüracunaman aywaran: Jesústa charïshishayqui nir. 11Judas nishanta wiyar sumaj cushicur: Jillayta jushayqui niran. Chay junajpita-pacha charij-charijllana Judas caycaran mayçhüpis Jesústa charinanpaj. 12Chaypita Pascua fiesta jallariran. Chay fiestaçhu Israel runacuna libadüraynaj tantata micuj. Acrashan cashnitapis pishtaj. Chay junaj purïshijnincuna Jesústa tapuran: Tayta, ¿mayçhütaj Pascua micuyta camaricamushaj? nir. 13Chaura Jesús ishcaj purïshijnincunata caçhar, niran: Jerusalén marcaman çhayaptiqui, puyñullawan runa yacuta apaycajta ricanquipaj. Jipallanta aywanqui. 14Wasiman yaycuptin, wasiyujta ninqui: Tayta Jesús caçhamasha. ¿Mayçhütäshi wasi jäcuycan purïshijnincunallawan Pascua micuyta micupacunanpaj? 15Quiquin camarishallata jäcuj altusninta ricachishunquipaj. Chayllaçhu pishijcunata camaricunqui. 16Purïshijnincunana änir marcaman çhayar, Jesúspa shiminman-tupu llapantapis tariran. Chayllaçhu Pascua micuyta camaricuran. 17Chacas-chacasna çhunca ishcaywan purïshijnincunawan Jesús çhayaran. 18Micurcaycashançhu niran: Sumaj tantiyacunquiman. Mayganiquipis ticrapamar, wañuyman jitarpamanquipaj. 19Chaura llaquicäcur, jucnin-jucnin Jesústa tapuran: ¿Nuwachuraj? ¿Nuwachuraj? nir. 20Çhunca ishcaywan purïshijnincunatana Jesús niran: Nuwanchiwan iwal micujmi wañuyman jitarpamanga. 21Tayta Diosninchi caçhamasha. Quiquin camacächiptin, wañuyman çhayashaj shimin çharcucänanpaj. Jitarpamaj runam ichanga juyupa ñacanga. Chaymi ama yurinmanpishchu caran. 22Micurcaycashançhu tantata aptacurcur, Jesús niran: Taytallau Tayta, ima allish tarichillämashcanqui. Jinarcur tantata paquircur-paquircur, purïshijnincunata aypuran: Catay. Cay tanta quiquïmi caycä nir. 23Chaypita bïnuyuj cüpata aptacurcur, niran: Taytallau Tayta, ima allish tarichillämashcanqui. Jinarcur macyaptin, llapan upuchinacuran. 24Jesúsna niran: Cay bïnu yawarnïmi. Washänaj-raycur wañuyman çhayaptï, yawarnï jiçhanga. Yawarnïwanraj parlanacushanta Tayta Diosninchi çharcucaycächin. 25Sumaj tantiyacunquiman. Cananpita bïnuta mana upushänachu. Llapanchita Tayta Diosninchi maquinman jishpichimaptinchiraj, mushuj bïnuta upushaj. 26Micupacuyta ushyariycur, Tayta Diosninchita alliman çhurashpan cantarir, Ulïbus puntaman aywacäriran. 27Chayçhüna Jesús niran: Canan pagas llapaniqui jaguiraycamanquipaj. Tayta Diosninchipa shiminpis nin: Uysha michijta wañuchishaj. Wañuycachiptï, uyshancuna mashtaypa-mashtar aywacunga. 28Cawarircamurmi ichanga, Galilea marcaman ñaupashaj. 29Pedruna niran: Llapan jaguirishuptiquipis, mana imaysi jaguirishayquipächu. 30Jesúsna niran: Pedro, sumaj tantiyacunquiman. Canan chacaylla wasguimanquipaj. Mana ricsij tucumanquipächu. Ishcay cutipa gällu manaraj cantaptillan, quimsa cutipa wasguimanquipaj. 31Pedruna niran: Mana imaypis wasguishayquichu. Ishcaninchitapis jina wañuchimäshun. Llapan purïshijnincunapis Pedro-jina niran: Mana wasguishayquichu. 32Chaypita Getsemaní nishan çhacraman purïshijnincunawan Jesús aywaran. Çhayar, niran: Washanijçhu Tayta Diosninchita mañacushäcaman cayllaçhu jamapäriy. 33Chaynuy nir Pedruta, Santiaguta, Juanta pusharan. Paycunapa ricay ñawinçhu jatunpa llaquicuran. Shungun ishquicäcuptin, niran: 34Llaquicuy juyupa çhayapamasha. Wañuy janäçhüna. Yanagaycallämay, ari. Waräshimay. 35Jinarcur carushman aywarcur pachacaman jungurpacuycur Tayta Diosninchita mañacur, Jesús niran: Papällau Papä, camacaptin, shuyarämaj ñacay ama çhayamächunchu. 36Jampäga imapis mana sasachu. Shuyarämaj ñacaypita jishpichimay, ari. Jishpiyta munaptïpis, shungü munashan ama camacächunchu. Manchäga munashayquinuylla llapanpis caycullächun. 37Jinarcur quimsaj purïshijnincunaman cutir, puñuycajta tariran. Chaymi Pedruta niran: Simón, ¿puñucuycanquiçhim? ¿Manachu juc ürallasi ricchashcanqui? 38Ricchay-llapa. Mana wasguimänayquipaj Tayta Diosninchita mañacäriy. Allita yarparsi, ushyacajllam carcaycanqui. 39Jinarcur mañacushan-cajman yapay cutiran. Mañacushannuylla yapay mañacuran. 40Cutir, yapay puñucashta tariran. Wañuypa puñunay chariptin, puñucurcaycaran. Chaymi ima niytapis mana camäpacuranchu. 41Quimsa cutiçhu cutirna, Jesús niran: ¿Puñurcaycanquiçhim? ¿Jitarpaycanquiçhim? Jataripacuyna. Juchaçhu aruj runacuna çhayamushana. Tayta Diosninchipa caçhan caycaptïsi, charimanga. 42Jataripacuyna. Wañuyman jitarpamaj runa jananchiçhünam. Aywapushun. 43Jesús rimaycaptillan, purïshijnin cashpansi Judas çhayapuran achcaj runata pushacurcur. Mayur cüracunapis, Moiséspa shiminta yaçhajcunapis, mayur runacunapis caçhaptin, chay-chicaj runa aywaran jirunwan-caman, tucsicunanwan-caman. 44Judas mayna nish caran: Macallarcushä runa Jesúsmi canga. Charircur mana caçharillar, apacunqui. 45Chaymi çhayaycur juclla Jesústa macallarcur, wamayaran: Taytallau tayta nir. 46Chaura Jesústa charicarcäriran. 47Jesúspa juc purïshijninna cuchillunta jurgurir, mayur cürapa uywayninpa rinrinta rugupariran. 48Llapan runata Jesús niran: ¿Imatataj yarpanqui? ¿Suwa cashätachu? ¿Imanirtaj jiruyquiwan-jiruyquiwan, cuchilluyquiwan-cuchilluyquiwan shapäcamushcanqui? 49Waran-waran Tayta Diosninchipa wasinçhu ricamashcanqui. Paypa shiminta ricay ñawiquiçhu tantiyachishcä. ¿Imanirtaj mana charimashcanquichu? Ichanga Tayta Diosninchipa shimin çharcucänanpämi charimashcanqui. 50Purïshijnincunam ichanga jishpicäriran. Japallantana Jesústa jaguiycäriran. 51Jesústa apacuptin, bayïtawan pitushalla juc müsu jipanta aywaycaran. Chaura müsutapis chariran. 52Chariptin, piturashan bayïtata jaguiycur, jalapaçhalla jishpicuran. 53Chaypita mayur cüraman Jesústa aparan. Mayur cürapa wasinman cüracuna, mayur runacuna, Moiséspa shiminta yaçhajcuna shuntacaran. 54Pedrupis Jesúspa caru jipallanta aywar sawan ruricaman yaycuran. Chayçhu Tayta Diosninchipa wasinta täpajcunawan mashacurcaycaran. 55Chaura mayur cüracuna, llapan mayur Israel runacuna Jesústa wañuchinanpaj achäquita ashircaycaran. Ichanga mana tariranchu. 56Achcaj tumparpis, quiquin-puralla apaycaçhänacuran. Rimashancuna mana tincuranchu. 57Waquin runa Jesústa tumpar niran: 58Cay runash nisha: Runacuna rurashan Tayta Diosninchipa wasinta juçhuchishaj. Jinarcur, quimsa junajllaçhu jatarachishaj runa mana aruycaptinsi. 59Chaynuy nirpis, quiquin-puralla apaycaçhänacuran. 60Chaynuy tumpaptin, mayur Israel runacunapa ricay ñawinçhu mayur cüra jatarcur, Jesústa tapuran: ¿Manachu rimacunqui? ¿Rasunpachu rimashcanqui? nir. 61Jesúsmi ichanga imatapis mana rimacuranchu. Chaura mayur cüra yapay tapuran: Mä, willamay. ¿Tayta Diosninchipa Wawanchu canqui? ¿Caçhamushan Washäcujchu canqui? nir. 62Jesúsna niran: Au. Nuwam caycä. Caçhan cashpämi mandäshinäpaj Munayniyuj Tayta Diosninchiwan iwal jamashaj. Pucutay janançhu cutiycämujta ricamanquipaj. 63Chaura mayur cüra ullgucuycuran. Quiquinpa müdanantapis raçhir ushyarir, japariran: Tistïguta mana munanchinachu. 64Shiminpita musyanchi Tayta Diosninchita apäriycashanta. Chaynuy niptin, juc shimillaraj niran: Wañuchicächun. 65Chaypita waquin runa Jesústa tuwapur ushyaran. Ñawinta chaparcur, magaran: Tayta Diosninchipa willacujnin carga, ¿pitaj cutashcashunqui? Mä, willamay nir. Tayta Diosninchipa wasin täpajcunapis lajyar ushyaran. 66Pedro sawan ruriçhu caycaptin, mayur cürapa uywaynin jipash çhayaran. 67Mashacuycajta tarir sumaj ricapärir, niran: Nazaret runa Jesúswan purishcanqui, ¿au? 68Pedrum ichanga wasguipar, niran: Chay runata mana ricsïchu. Imatash rimacullanquipis. Chaynuy nir puncuman llucshicuran. 69Chaypita uyway jipash Pedruta ricar, yapay llapanta willaran: Cay runa Jesúspa purïshijnin nir. 70Pedro yapay wasguiran. Mayllantana jinan runacunapis Pedruta niran: Jampis Galilea runa caycanqui. Rasunpa Jesústa purïshishcanqui, ¿au? 71Chaura Pedro ullgucäcuran: Chay runata mana ricsïchu. ¿Piraj cacullanpis? Llullacuptïga, Tayta Diosninchi jina ñacachimächun nir. 72Niycaptillan, ishcay cutipa gällu cantariran. Chayraj Pedro yarpäriran: Mana ricsij tucumanquipächu. Gällu ishcay cutipa manaraj cantaptillan, quimsa cutipa wasguimanquipaj nishanta. Jesúspa shiminta yarpärir shungun ishquicäcuptin, juyupa wagaran.

will be added

X\