Marcos 13

1Tayta Diosninchipa wasinpita llucshiycashançhu juc purïshijnin Jesústa niran: Tayta, mä, ricay. Achic-achicyaycaj rumicunawan Tayta Diosninchipa wasinta pirgasha. Sumaj cuyayllapaj, ¿au? 2Jesúsna niran: Musyachishayqui. Imayllaga llapan ricashayqui ushyacanga. Rumiwan pirgararsi, llapanmi juçhurachish canga. 3Chaypita Ulïbus puntaman Jesús aywacuran. Chayçhu Tayta Diosninchipa wasinman ricajçhu jamaraycaptin, Pedro, Santiago, Juan, Andrés tapuran: 4Tayta Jesús, ¿imaytaj Tayta Diosninchipa wasinta juçhurachinga? ¿Imanaypataj shimiqui çharcucänanta musyashaj? nir. 5Jesúsna niran: Pipis pantachishurunquiman. 6Achcajmi shamunga: Nuwata shuyaraycämanqui. Washäcujmi caycä nir. Achcaj runatam pantachinga. 7Wacçhu-cayçhu wañuchinacuy jatariptinpis, ama manchacärinquichu. Chaycunaraj cangapaj. Chaypis cay pacha mana ushyacangarächu. 8Cay pacha ushyacänanpäga marcan-marcan wañuchinacungapaj. Chay-tucuyçhüpis pacha juyupa sicsicyanga. Muçhuy captinpis, yargaywan runacuna wañunga. Chaypis runacuna mana ushyacangarächu. Manchäga ñacayllarämi jallaringa. 9Quiquiquicunapis sumaj tantiyacunquiman. Çhasquicamashayqui-janan mayur Israel runacunapa maquinman çhayachishunquipaj. Shuntacäna wasicunaman rïsu apachishunquipaj. Chayçhu sumaj wascashunquipaj. Roma auturdäcunamanpis çhayachishunquipaj. Wacpa-caypa purichishuptiquipis, shimiquita ama amucurcunquichu. Manchäga pï-maytapis nuwapita willapanqui. 10Cay pacha manaraj ushyacaptin, Tayta Diosninchipa alli willacuyninta chay-tucuy marcaçhu willapäcunga. 11Auturdäcunaman çhayachishuptiqui, ama llutäpacunquichu: ¿Imataraj rimashaj? nir. Manchäga Tayta Diosninchi shimiquiman çhurashallanta rimanquipaj. Espíritu Santu rimachishunquipaj. Mana quiquiqui yarpashayquitanachu rimanquipaj. 12Nuwata çhasquicamashan-janan waugui-pura auturdäcunamanpis çhayachinacunga. Papäninpis wamrancunata wañuyman çhayachinga. Wamrancunapis maman-taytanta chiquir, wañuyman jitarpunga. 13Çhasquicamashayqui-janan llapan runa chiquishunquipaj. Mana yamacällar shimïta wiyacuptiqui, imaycamanpis maquinçhu Tayta Diosninchi cawachishunquipaj. 14Tayta Diosninchipa unay willacujnin isquirbishanta liguir, sumaj tantiyacärinquiman. Tayta Diosninchipa wasinta pampaman çhuraptin, manchapacushantapis içhichiptin, Judea marcacunapita puntacunaman juclla jishpicäriy. 15Wasi puncuçhu caycar, ruriman ama yaycunquimanchu. Imayquicunatapis ama jurgunquimanchu. 16Çhacrapitapis wasiquiman ama cutinquimanchu. Müdanayquita ama shuntanquimanchu. 17Ñacachishan wichan jishyaj warmicunapis, pishi wamrayujcunapis cuyapaypaj ñacanga. 18Chaymi jishpinayqui junaj tamya wichanman mana çhayananpaj, Tayta Diosninchita mañacäriy. 19Chay wichan juyupa ñacay canga. Tayta Diosninchi cay pachata camashanpita-pacha chaynuy ñacay mana imaypis caranchu. Chaynuypis yapay mana imaysi cangapänachu. 20Wamrachacushancunata llaquipar, Tayta Diosninchi chay ñacay junajcunata wallcayächinga. Manchäga pipis mana wañuypita jishpinmanchu. 21Chay wichan pantachicujcuna pantachishurunquiman: Mä, ricay. Tayta Diosninchi caçhamushan Washäcujninchi shamusha. Mä, ricay. Washäcujninchi çhayaycämun nir. Chaynuy nishuptiquisi, ama çhasquipanquichu. 22Chay wichan Washäcuj-tucujcuna, willacuj-tucujcuna ricarimungapaj. Munayniyuj car, tucuyta ruranga runacunata riguichinanpaj. Chayta rurar, Tayta Diosninchi acracushan runacunatapis waquinta pantachinga. 23Canan sumaj tantiyacunquiman. Willapänajpaj cashanta mayna willapashcaj. 24Juyupa ñacaycuna çhawarcuptillan, inti wañucäcunga. Quilla mana achicyanganachu. 25Istrïllacuna shicwamunga. Janaj pachapis juyupa tapsinga. 26Chay junajmi Tayta Diosninchi caçhamaptin, nuwata ricamanquipaj munayniyuj car, pucutay janançhu achic-achicyaycar cutiycämujta. 27Tayta Diosninchi anjilnincunata caçhamunga acrashan runacunata chay-tucuypita shuntamunanpaj. Shuntanga janaj pachapa cantunpita juc-caj cantuncaman. 28Jïgus yürawan tincuchiypa tantiyacushun. Yüran chillguiptin, tamya quilla jallaycunanta musyanchi. 29Chay-jina willapashäcuna çharcuptin, cutimunä caycashanta tantiyacärinquipaj. 30Sumaj tantiyacunquiman. Waquinniquipa ricay ñawiquiçhu llapan çharcucanga. 31Janaj pachapis, cay pachapis ushyacanga. Shimïmi ichanga mana jungacangachu. Llapanmi çharcucanga. 32Cutimunä junajta Tayta Diosninchi pitapis mana musyachishachu. Wawan captïsi, mana musyachimashachu. Janaj pachaçhu tiyaj anjilcunatapis mana musyachishachu. Quiquin Taytallanchim musyaraycan. 33Cutimunäta mana musyaycar, camaricushalla cawanquiman. 34Sumaj tantiyacunayquipaj tincuchiypa willapäshayqui. Juc wasiyujshi aywacuyta yarpar, mincaynincunata jaguipusha llapanta imatapis rurananpaj. Wasi täpajtana ricaçhacuycänanpaj jaguisha. 35Chaymi ricchaycar imaypis cawanquiman. Wasiyuj imay cutimunantapis mana musyanquichu. Çhayaramunman pacha chacarcuptillanpis, pullan-pagaspis, wallpa-wagaypis, pacha-waraypis. 36Mana yarpashpita çhayamur, puñuycajta tarishurunquiman. 37Chaymi mayganiquipis Tayta Diosninchita ama yamacanquichu. Llapaniqui mayaj-mayajlla shuyämanqui.

will be added

X\