1 Cay libruçhu isquirbiraycan Tayta Diosninchi acracushan Jesucristupa alli willapan. Jesúsga Tayta Diosninchipa Wawan. Caynuy jallarin. 2 Unay willacujnin Isaíaswan musyachicur, Tayta Diosninchi niran: Mä, wiyamay. Juc runa ñaupapäshunquipaj. Quiquinta caçhashaj. Paymi runacunata willapäcungapaj camaricushalla shuyaräshunayquipaj. 3 Chunyajçhümi jayacuypa willacuycan: Taytanchi shamunanpaj camaricuy. Caminuta pichay. Wicsu caminucunatapis allchay nir. 4 Chaura Isaías musyachicushan çharcuptin, chunyaj pachaçhu runacunata Juan anyaparan. Llapanta anyapar, niran: Tayta Diosninchipa shiminta wiyacäriy. Juchapita wanacäriy. Ushyacäriy. Chayrämi Tayta Diosninchi llapan juchayquita junganga. 5 Achcaj runa Jerusalén marcapita, Judea quinran marcacunapitapis aywaran Juan willapäcushanta wiyaj. Jucha aparicushanta mana pacaptin, Jordán mayuçhu Juan ushyachiran. 6 Juanpa müdanan camïllupa ajchanpita caran; sinturunninpis jarachapita. Chunyajçhu tarishan chucluscunallatawan munti abïjapa mishquillanta micuj. 7 Runacunatana willapaj: Juc runa shamunga. Payga munayniyujmi. Llanguinta llushtipuyllatapis manchapacü. 8 Jamcunata yacullawan ushyachicuycä. Shamuj runam ichanga Espíritu Santuwan ushyachishunquipaj nir. 9 Chay wichan Galilea quinran Nazaret marcapita Juan ushyachicushan-cajman Jesúspis aywaran. Paytapis Jordán mayuçhu Juan ushyachiran. 10 Ushyacuriycur yacupita llucshiramur, janaj pacha quiçhacämujta Jesús ricaran. Espíritu Santuna paluma-jina jananman yarpamuran. 11 Janaj pachapita rimamushanpis wiyacämuran: Cuyay Wawämi canqui. Shungümanmi sumaj tincunqui nir. 12 Chaypita Espíritu Santu charicurcur, chunyaj pachaman Jesústa aparan. 13 Micucuj uywacuna tiyanançhu çhuscu çhunca (40) junaj juyaptin, Supay maquichacuyta munaran. Anjilnincunam ichanga Jesústa pishishanta tarichiran. 14 Juanta carsilman wiçhgachishanpita-pacha Galilea marcacunamanna Jesús aywacuran. Chay marcacunaçhu Tayta Diosninchipa alli willacuyninta willapäcuran. 15 Willapäcur niran: Tayta Diosninchi shuyaraycämanchinam. Maquinçhünam purichimäshun. Jucha aparicushayquicunapita wanacäriy. Tayta Diosninchiman yupachicäriy. Alli willacuyninta wiyacäriy. 16 Galilea püsu cantunpa aywaycashançhu Jesús ricaran Simóntawan wauguin Andrésta. Piscädu charij car, ridinta yacuman jitarcaycaran. 17 Paycunata Jesús niran: Purïshimay. Piscäduta charishayqui-jina runacunata shuntanquipaj Tayta Diosninchipa maquinçhu cawananpaj. 18 Chaura ridinta jaguiriycur, Jesúswan aywacuran. 19 Washanijta aywaycashançhüna Santiagutawan Juanta bütillaçhu ridinta allcharcaycajta tariran. Paycunapa taytan caran Zebedeo. 20 Jesús jayaptin, papänintawan mincaynincunata bütinçhu jaguiycur, aywacäriran. 21 Chaypita Cafarnaún marcaman aywacäriran. Diyawarda junaj shuntacäna wasiman yaycurir, Tayta Diosninchipa shiminta Jesús willapäcuran. 22 Willapäcushanta wiyar, runacuna sumaj cushicäriran: Moiséspa shiminta yaçhajcuna willapäcushanta mana tantiyanchichu. Jesús willapäcushanmi ichanga shungunchiman sumaj çhayan nir. 23 Chay shuntacäna wasiçhu supay pucllacushan runapis caycaran. Supay rimachiptin, japarir niran: 24 Nazaret runa Jesús, ¿imatataj ashiycanqui? ¿Illarachimajchu shamushcanqui? Pï cashayquitapis musyä. Tayta Diosninchipa Wawanmi canqui. Acracuyninmi canqui. 25 Jesúsna supayta piñacuran: Upälla. Chay runata caçhariy nir. 26 Chaura supay runata wañunajpaj tapsirir, juyupa japarir, aywacuran. 27 Chayta ricar, llapan runa juyupa manchariran. Jucnin-jucnin ninacuran: ¿Imatataj ricanchi? ¿Imatataj wiyanchi? Cananraj munayniyuj runata ricanchi. Supaycunata jarguptinpis, aywacun. 28 Chaynuy Jesús ima-ima rurashanpis llapan Galilea marcacunaçhu juclla mayacaran. Quiquin-pura runacuna willanacäriran. 29 Shuntacäna wasipita aywacur Santiagutawan Juanta pushacurcur, Jesús aywaran Simónpawan Andréspa wasinman. 30 Çhayaptin, juclla willaran: Tayta Jesús, Simónpa suydan wayllaywan jishyaycan nir. 31 Chaura jishyajman çhayar, maquinpita jatarcachiran. Jatarcachiptin, wayllay caçhariycuran. Jinarcur yanucuriycuran jarananpaj. 32 Chacanaycaptinna, runacuna jishyaçhucunata Jesúsman apamuran. Diyawarda ushyacashanam nir tucuy-niraj jishyaçhucunata, supay pucllacushancunata çhayachiran. 33 Simónpa marca-masincunapis llapan-yupay wasi puncunçhu juturpaycaran. 34 Chaymi tucuy-niraj jishyawan jishyaçhucunata achcajta Jesús allchacächiran. Waquin runacunapita pucllacuj supaycunatapis jarguran. Pï cashantapis musyaptin, supaycunata mana rimachiranchu. 35 Chaca-chacalla marcapita llucshir, chunyaj pachaman Jesús aywaran Tayta Diosninchita mañacuj. 36 Chaura purïshij-masincunawan Jesústa ashij Simón aywaran. 37 Taripar, niran: Tayta, llapan runa ashircaycäshunqui. 38 Jesúsna niran: Washa marcacunamanpis aywashun Tayta Diosninchipa alli willacuyninta willapäcuj. Chaypämi shamushcä. 39 Chaymi Galilea quinrançhu marcan-marcan Jesús puriran. Shuntacäna wasicunaçhüpis Tayta Diosninchipa alli willacuyninta willapäcuran. Supaycunatapis runacunapita jarguran. 40 Jaraçhu jishyawan runana Jesúspa ñaupanman jungurpacuycur, mañacuran: Llaquipämashpayqui allchacaycachillämay. Tayta Diosninchipa ricay ñawinçhüpis alli cayta munä nir. 41 Mañacuptinga, llaquipashpan maquinwan yataycur, Jesús niran: Llaquipajmi. Allchacayna. 42 Chaynuy niptin, jaraçhu jishyawan jishyaycashançhu allchacäcuran. Tayta Diosninchipa ricay ñawinçhüpis allina caycaran. 43 Chaura pitapis mana willapällar aywacunanpaj Jesús piñaparan: 44 Pitapis ama willapanquichu. Manchäga cüraman ayway allina cashayquita ricashunayquipaj. Moiséspa shiminta çharcur, cuyachicuyniquitapis Tayta Diosninchita jaray. Chayrämi llapanpa ricay ñawinçhu alli canquipaj nir. 45 Chaynuy willapaptinpis, willacuraycar aywacuran. Chaura chay-tucuyçhu mayacaran. Chaynuypa Jesús llapan runa ricay may marcamanpis mana yaycurannachu. Marca wajtancunallaçhüna puricuran. Runacunam ichanga chay-tucuypita Jesúsman shamuran.
