Lucas 9

1Çhunca ishcaywan caçhancunata shuntaycur cargunman çhuraycur, Jesús niran: Nuwapita munayniyuj caycanqui supaycunata jargunayquipäpis, jishyaçhucunata allchacächinayquipäpis. 2Nircur caçharan Tayta Diosninchipa shiminta willapäcunanpaj, jishyaçhucunata allchacächinanpaj. Caçhar niran: Willapäcur ninqui: Maquinçhu purichimänanchipaj Tayta Diosninchi shuyaraycämanchi nir. 3Purir, imatapis ama apanquichu. Ama apanquichu: garutiquitasi, jipiquitasi, mircapayquitasi, jillayniquitasi, rucanayquitasi. 4Juc wasiman pachacur, jucläpa aywacushayquicaman jinallançhu pacharäcunqui. 5Çhayashayqui marcaçhu mana çhasquishuptiqui, çhaquiquita pichacurir aywacunqui: Mana çhasquicamashayquipita ñacayman çhayanquipaj nir. 6Chaymi marcan-marcan purir caçhancuna Tayta Diosninchipa shiminta willapäcäriran. Jishyaçhucunatapis allchacaycächiran. 7Chay wichan Galilea marcacunata mandaj Herodespis Jesús ima-imata rurashantapis mayaran. Ichanga tantiyayta mana atiparanchu. Jesús pï cashanta mana musyar, runacuna wichaypa-uraypa rimar niycaran: Ushyachicuj Juançhi wañushanpita cawarimusha. 8Waquinshi nircaycaran: Willacuj Elíasçhi. Waquinnash niycaran: Unay willacujcunaçhi maygan carsi, cawarimusha. 9Ushyachicuj Juançhi cawarimusha niptin, mandaj Herodes niran: Ushyachicuj Juanpa umanta quiquï ruguchish caycaptï, ¿piraj chay Jesús? Chay runata ricsicüman nir Jesúswan tincuyta sumaj munaran. 10Caçhancuna willapäcur purishanpita Jesúsman cutiran. Imata rurashancunatapis willaran. Jesúsna paycunata pushacurcur, Betsaida marcaman aywacuran: Yata juyapärishun nir. 11Shuyninpa aywacuptinsi aywashanta musyar, chay-chicaj runa Jesústa tariparan. Jesúsna tucuy-jinanpa tantiyachiran Tayta Diosninchipa maquinçhu cawananpaj. Jishyaçhucunatapis allchacächiran. 12Pacha chacanaycaptin, purïshijnincuna Jesústa niran: Chunyaj pachaçhu carcaycanchi. Runacuna marcacunaman micuy ashij aywacuchun. Pachacunanpäpis ashimunman. 13Chaynuy niptin, Jesús niran: Jamcuna jaranquiman. Paycunana niran: Pichga tantallatawan ishcay piscädullata charaycä. Chay-chicaj runata jarananchipaj, ¿tanta rantimuj aywanätarächu munanqui? 14Runacuna pichga waranga-ima (5,000) juturpaycaran. Chaypis purïshijnincunata Jesús niran: Llapan runata pichga çhunca-caman (50) jamachiy. 15Jesúspa shiminta wiyacur, llapanta jamachiran. 16Jesúsna pichga tantatawan ishcay piscäduta aptarcur, mañacuran: Taytallau Tayta, ima allish tarichillämashcanqui nir. Nircur tantacunata paquircur-paquircur, piscäduta raçhircur-raçhircur, purïshijnincunata macyaran llapanta jarananpaj. 17Runacuna puchupacushancaman micuran. Micucurcuptin, puchupacushanta çhunca ishcaywan (12) canista juntataraj shuntaran. 18Juc junajçhu Jesús quiquillan Tayta Diosninchita mañacuycaran. Niycashançhu purïshijnincunata tapuran: Runacunapaj, ¿pitaj cä? nir. 19Paycuna niran: Waquin runash nin: Ushyachicuj Juan. Waquinnash nin: Elías. Waquinnash nin: Pï carpis, Tayta Diosninchipa unay willacujnin canga. Cawarircamurçhi puriycan. 20Chaura quiquincunata Jesús tapuran: Jamcunapäga, ¿pitaj cä? nir. Pedruna niran: Washäcujmi canqui. Tayta Diosninchi caçhamushcashunqui. 21Chaura Jesús sumaj piñaparan: Tayta Diosninchi caçhamashan Washäcuj cashäta pitapis ama willapanquichu nir. 22Purïshijnincunata Jesús niran: Tayta Diosninchi caçhamasha. Chaypis sumajraj ñacashaj. Mayur runacunapis, mayur cüracunapis, Moiséspa shiminta yaçhajcunapis wasguimanga. Wañuchimanga. Chaypis quimsa junajta Tayta Diosninchi cawarachimanga. 23Jinarcur llapan runata Jesús niran: Pipis purïshimayta munar, quiquinpa shungun munashanta ama ruranmanchu. Manchäga nuwa-janan ñacachiptinsi, rusçhu wañuchiptinsi, waran-waran shimïta wiyacuchun. 24Ñacaytapis, wañuytapis manchacur maquïçhu puriyta mana munar, ushyacayman çhayangapaj. Maquïçhu purir llapanninta jaguijcunam ichanga imaycamanpis Tayta Diosninchipa maquinçhu cawanga. 25Sumaj rïcuyayta tarirpis ushyapacayman çhayaptin, rïcu cayninga, ¿imapäraj alli? Llapan imancunapis ushyacanga. Quiquinpis ñacayman çhayanga. 26Tayta Diosninchi caçhamasha. Pipis shimïta mana wiyacushpan wasguimaptin, nuwapis janaj pachapita achic-achicyaycar cutimur, wasguishaj. Cutimuptï, Tayta Diosninchipa anjilnincunapis achic-achicyaycar yanagämanga. 27Sumaj tantiyacunquiman. Tayta Diosninchi llapan runata maquinçhu purichinga. Chaynuy cananta waquinniqui manaraj wañullar ricanquipaj. 28Chaypita pusaj junajta-ima Tayta Diosninchita mañacuj Jesús aywaran. Puntaman jigarcur, Pedruta, Santiaguta, Juanta pusharan. 29Tayta Diosninchita mañacuycaptin, Jesúspa jajllanpis, müdananpis achic-achicyaj yurajman ticracuriran. 30- 31 Unay willacuj Moiséswan Elíaspis ricaripuran. Paycunapis achic-achicyaycaran. Jesúswan parlaycaran. Cay pachapita aywacur Jerusalén marcaçhu imaman çhayanantapis Jesústa willaparan. 32Niycashançhu Pedro, Santiago-ima, Juan-ima puñucäcuran. Ricchapacurirmi ichanga, achic-achicyaycajta Jesústapis, ishcaj runacunatapis ricaran. 33Moiséswan Elías aywacuyta jallaycuptin, mana yarpaçhacullar Pedro rimariran: Tayta Jesús, cayçhüga alli juyäcuymi. Quimsa tacmata rurarishaj: jucta jampaj, jucta Moiséspaj, jucta Elíaspaj. 34Pedro rimaycaptillan, quimsanta pucutay chapacurcuran. Jesúspa purïshijnincuna juyupa manchariran. 35Pucutay rurinpita Tayta Diosninchi nimuran: Jesúsga Wawämi. Payllata acracushcä. Shiminta wiyacuy. 36Rimashan çhawacäcuptin, quiquillantana Jesústa ricaran. Chay wichan quimsaj purïshijcuna imata ricashantapis mana willacuranchu. 37Warannin junaj puntapita yarpamuptin, achcaj runa Jesústa taripaj aywaran. 38Runa çhaupinpita juc runa jayacuran: Tayta Jesús, yanapaycallämay. Wawämi ñacaycan. Chaylla wamräpis. 39Charir, supay japarächin. Tapsir ushyan. Pushgayta ajtuchin. Sajtar ushyan. Mana caçharinchu. 40Supayta jargunanpaj waquin purïshijniquicunata mañacurä. Ichanga mana camäpacuranchu. 41Chaynuy mañacuptin, Jesús niran: Jamcuna Tayta Diosninchiman mana yupachicunquichu. Juchallaçhüpis aruycanqui. ¿Imaycamanraj tantiyachishayqui? Mana yupachicamaptiqui, yamacashcä. Nircur wamrapa papäninta niran: Wamrayquita mä, apamuy. 42Wamranta çhayaycächiptin, supay pampaman sajtariran. Tapsir ushyariran. Chaymi supayta Jesús piñacuran. Piñacuriptin, supay aywacuran. Chaura wamrana allchacäcuran. Allchacashtana papäninwan tincuchiran. 43Tayta Diosninchi allchacächishanta ricar, llapan runa mancharisha: ¿Imatataj ricanchi? Tayta Diosninchi munayniyuj, ¿au? nir. Runacuna mancharish caycaptin, purïshijnincunallata Jesús niran: 44Rimashäta sumaj wiyacunqui. Ama junganquichu. Tayta Diosninchi caçhamasha. Chaypis juc runa charimar, juyu runacunapa maquinman çhayachimanga. 45Purïshijnincunam ichanga mana tantiyaranchu. Tayta Diosninchi mana camacächiptin, tantiyacuyta mana camäpacuranchu. Tapucuytapis manchacuran. 46Juc junaj Jesúspa purïshijnincuna mayur runa cayta ashir, piñanacuran. 47Shungun munashanta tantiyar, juc wamrata Jesús jayaran. Lädullanman içhiycachir, 48niran: Pipis yupachicamashan-janan wamracunata alli ricar, nuwatapis alli ricaman. Alli ricamarga, caçhamaj Tayta Diosninchitapis alli rican. Chaymi sumaj tantiyacunquiman. Pampaman çhurash runacunata alli ricarraj, mayur runa cayman çhayanquipaj. 49Juan Jesústa niran: Tayta, nimashayquinuylla supayta jarguycajta ricapäcushcä. Chaypis mana purïshimaptinchi, miçhapäcushcä. 50Jesúsna niran: Ama miçhanquimanchu. Mana chiquimashpanchi yanapaycämanchi. 51Tayta Diosninchi janaj pachaman shuntananpaj wallcana pishiptin, Jerusalén marcaman aywananpaj Jesús camaricuran. 52Ñaupanta caçhacuran: Pachacunanchipaj Samaria quinrançhu camaricunqui nir. 53Jerusalén marcaman aywaycashanta musyarmi ichanga Samaria runacuna pachächiyta mana munaranchu. 54Chaura purïshijnin Santiaguwan Juan niran: Tayta Jesús, Samaria runacunata nina tamyawan ushyarachishun, ¿au? 55Ushyarachishun, ¿au? tapuptin, Jesús piñacuran. 56Chaypita juclä marcapa aywacäriran. 57Aywacurcaycaptin, juc runa Jesústa niran: Tayta, aywashayquipa aywayta munä. Maypapis purimushun. 58Jesúsna niran: Atujcunapis maçhayninçhu tiyan. Pichuysacunapis jishuyuj. Nuwapam ichanga Tayta Diosninchipa caçhan captïsi, mayman çhayanäpäpis wasï mana canchu. 59Juc runatapis Jesús niran: Purïshimay. Chaura mana munaranchu: Tayta, papänïtaraj ricashaj. Wañucuptin, pampaycurraj purïshishayqui nir. 60Jesúsna niran: Papäniqui chapata ama rurashunquimanchu. Juclla purïshimay. Wañushta wañush-masincuna pampachun. Tayta Diosninchipa shiminta willacuj aywashun. Payga shuyaraycämanchi maquinçhu purichimänanchipaj. 61Juc runana Jesústa niran: Tayta, nuwapis aywäshishayqui. Ima captinpis, ichicllata shuyaycallämay. Mamä taytätaraj willaycamushaj. 62Jesúsna niran: Yapyajcuna jipaman ticrärir, wicsu-wicsu yapyan. Tayta Diosninchipa shiminta llapan shunguyquiwan wiyacunquiman; ama janan shungullaga.

will be added

X\