Lucas 8

1Marcan-marcan purir çhunca ishcaywan caçhancunawan Jesús willapäcuran: Maquinçhu cawananchipaj Tayta Diosninchi shuyaraycämanchi nir. 2Allchacächishan warmicunapis Jesústa yanapar puriran. Magdalena Maríapis purïshiran. Paypita jançhis supayta Jesús jargush caran. 3Susanapis, Juanapis, waquin warmicunapis purïshiran. Juanaga mandaj Herodespa capuralnin Cuzapa warmin caran. Warmicunaga charashancunawan Jesústa tarichiran. 4Juc junajçhu chay-tucuy marcapita runacuna jutucaran Jesústa ricäcunanpaj. Chay-chicajta ricar tincuchiypa willapar, Jesús niran: 5Juc runash murupacuj aywaran. Machiptinshi, waquin muru caminuman çhayasha. Caminuman çhayajta runacuna lluchcar ushyasha. Pichuysacunapis pashacurcusha. 6Waquin murunash jarapshu allpaman çhayasha. Jarapshu captinshi juclla wiñarsi, chaquicäcusha. 7Waquin murunash shata-shataman çhayasha. Shata atayäcurcurshi, muru wiñamujtapis jarwashtärachisha. 8Waquin murunash alli allpaman çhayasha. Sumajshi wayusha. Waquin juc murullapitash juc paçhacta (100) wayusha. Willapäcuriycur, wiyächipaypa Jesús niran: Rinriyujmi canqui. Tantiyacunquiman. 9Purïshijnincuna Jesústa tapuran: Tincuchiypa willapäcushayquita mä, tantiyachimay nir. 10Jesúsna niran: Mayna tantiyachishcaj: Maquinçhu cawananchipaj Tayta Diosninchi shuyaraycämanchi nir. Paypa shungun munashanta sumaj tantiyachishcaj. Mana wiyacujcunatam ichanga tincuchiyllapa tantiyachï wiyaycarpis, ricaycarpis, mana tantiyacunanpaj. 11Tincuchiypa willapashäta sumaj tantiyacuy. Muruga Tayta Diosninchipa shiminwan tincun. 12Caminuna chucru shungu runawan tincun. Chucru shungucuna Tayta Diosninchipa shiminta wiyarpis shungunman mana çhayaptin, mana tantiyacunchu. Chaymi yangalla tantiyacushallantapis supay jungaycachin Tayta Diosninchipita witicunanpaj. Witicur, Tayta Diosninchita mana wiyacunchu. Maquinçhüpis mana cawanchu. 13Jarapshu allpana janan shungu runawan tincun. Paycuna cushi-cushilla Tayta Diosninchipa shiminta çhasquicun. Chaypis mana sapichashan-jina janan shungulla. Chaymi Tayta Diosninchita wiyacushan-janan ñacaycuna çhayapuptin, witicurin. Mana içhipunchu. 14Shata wiñanan allpana tincupacaj runawan tincun. Paycuna Tayta Diosninchipa shiminta wiyan. Wiyarsi, imapäpis alläpa yarpaçhacur, jillayllata ashir, shungun munashallanta ashir, tincupacan. Chaymi Tayta Diosninchipa shiminta wiyash carsi, Tayta Diosninchipa shungun munashanta mana ruranchu. 15Alli allpana wiyacuj runawan tincun. Paycuna alli shungu cashpan Tayta Diosninchipa shiminta sumaj tantiyacur, manchapacur cawan. Ñacarpis, Tayta Diosninchipita mana witicunchu. Chaymi juc murulla alli wayushan-jina allita rurar cawan. 16Jananmanpis Jesús niran: Achquita ratarcachir, manash pipis manca rurinman, cäma çhaquinman çhuranmanchu. Manchäga patacmanshi çhuran llapanta achicyänanpaj. 17Willapashätapis imayllasi llap-llapanmi tantiyacunga. Mana pacacangachu. 18Chaymi sumaj tantiyacunquiman. Wiyacuptin, pitapis Tayta Diosninchi sumaj tantiyachinga. Mana wiyacujcunatam ichanga ichicllata tantiyashallantapis, jungaycachinga. 19Rimaycaptillan, Jesúspa mamanwan wauguincuna çhayaran. Ichanga achcaj runa caycaptin, tincuyta mana camäpacuranchu. 20Chaymi juc runa willaran: Tayta Jesús, mamayquiwan wauguiquicunash jawaçhu shuyarpaycäshunqui. Jamwan tincuytash munaycan nir. 21Jesúsna niran: Tayta Diosninchipa shiminta wiyacujcunaga pï-maypis mamäwan wauguïcunawanmi tincun. 22Juc junajçhu: Yacu püsuta chimpashun nir purïshijnincunawan-ima Jesús bütiman jigaran. 23Aywarcaycashançhu Jesús puñucäcuran. Puñucäcushancaman shucucuy wayra ricacamusha. Yacu büchiypa-büchir bütiman yaycuycaran. Wañuy janançhu caycaran. 24Chaura purïshijnincuna Jesústa ricchachiran: Tayta Jesús, wañuy jananchiçhüna nir. Jatarcur, yacutawan wayrata Jesús piñacuran. Piñacuptin, shucucuy wayra çhawacäcuran. Yacupis puñucäcuran. 25Purïshijnincunatana niran: ¿Imanirtaj mancharinqui? ¿Janan shungullachu Tayta Diosninchiman yupachicunqui? Purïshijnincuna quiquin-pura parlanacäriran: ¿Piraj cay runa? Piñacuriptin, shucucuy wayra çhawacäcun. Yacupis puñucäcun nir. 26Püsuta chimpar, Gerasa quinranman purïshijnincunawan Jesús çhayaran. Chay quinran Galilea marca chimpançhu caran. 27Bütipita llucshiriptin, Gerasa runa Jesústa çhayapuran. Chay runa supaypa maquinçhu purir, jalapaçhalla puricuj. Wasiçhüpis mana juyajchu. Manchäga pantyunllaçhu juyäcuj. 28Jesústa ricar ñaupançhu jungurpacuycur, japariran: Llapanta Camaj Tayta Diosninchipa Wawan Jesús, ¿imanirtaj ashipämanqui? Ama ñacaycachimaychu nir. 29Jesús jarguptin, supaycuna japarish caran. Pucllacush captin, runa juyuyash caran. Cadinawan maquin-çhaquinta wancurcur runa täpaptinpis, raçhirij. Chunyaj pachamanpis supay apacuj. 30Chaura: ¿Imanirtaj ashipämanqui? niptin, Jesús tapuran: ¿Imataj jutiqui? nir. Tapuptin, chay-chicaj supay cashpan: Batallun jutï niran. 31Jesústa llapan supay mañacuran: Chacaj pachaman ama jitarpaycamaychu, ari nir. 32Chagapa janallançhu chay-chica cuchi pagupacurcaycaran. Chaymi supaycuna Jesústa mañacuran: Cay runata caçharir, cuchicunatana pucllacushaj nir. Chaynuy mañacuptin, Jesús auniran. 33Auniptin runata caçhariycur, cuchicunata pucllacuran. Cuchicunana jishyayar, chagapita yacuman jigapurcuran. Shugupacaypa llapan wañuran. 34Chaura chayta ricar, cuchi michijcuna juclla marcanman jishpicäriran. Aywaycur, çhacracunaçhüpis, marcaçhüpis imallata ricashantapis llapanta willacuran. 35Runacuna ricäcuj aywacullaran. Jesúsman çhayar, supaycuna pucllacushan runata allchacashta tariran. Müdanashana caycaran. Jesúspa ñaupallançhu jamaraycaran. Chaynuyta ricaycur, juyupa manchariran. 36Ricajcuna çhayamuj runacunata willaparan supay pucllacushan runata Jesús imanuypa allchacächishantapis. 37Gerasa marca runacuna manchacur, Jesústa niran: Tayta, cay marcapita aywacuy, ari. Niptin bütiman jigarcur, cuticuran. 38Mana llucshiptillan, allchacaj runa Jesústa mañacuran: Pushacamay, Tayta nir. Jesúsna 39niran: Mana camacanchu. Wasiquiman cuticuy, ari. Llapan runata willapanquiman: Tayta Diosninchi yanapämasha nir. Chaura marcanman cutircur, willacuran: Jesús allchacächimasha nir. 40Chaura püsu chimpanman Jesús çhayaptin, shuyaj runacuna sumaj cushicuran. 41Niycaptillan, Jairo çhayaran. Payga shuntacäna wasiçhu mayur runa caran. Jungurpacuycur, Jesústa mañacuran: Tayta, wasïman aywashun. 42Japallan warmi wamrä wañucuycan. Çhunca ishcaywan watayujllarämi nir. Jairuwan aywaycaptin achcaj runa aywar, Jesústapis quiçhquiparan. 43Çhunca ishcaywan watana yawar-apaywan jishyaj warmipis tallucash aywaycaran. Warmiga jampicujcunawan jampicur, imancunatapis ushyapacaran. Pipis mana allchacächiranchu. 44Chaymi jipallanpita tariparcur, Jesúspa müdananta yataycuran. Yataycuptillan, yawar-apaynin çhawacäcuran. 45Chaura Jesús tapucuran: ¿Pitaj yataycamasha? nir. Niptin, llapan runa niran: Mana nuwachu. Mana nuwachu. Pedruna niran: Achcaj runa quiçhquipaycäshuptiqui, ¿imanirtaj tapumanqui: ¿Pitaj yataycamasha? nir? 46Jesúsna niran: Shuyninpa pipis yataycamasha. Yatamajtaga munaynïwanmi allchacächishcä. 47Warmina pacacuyta mana camäpacur, sicsicyaycar Jesúspa ñaupanman jungurpacuycuran. Llapanpa ñaupançhu juyupa jishyashantapis, Jesúspa müdananta yataycur allchacäcushantapis willacuran. 48Jesúsna niran: Wawallau wawa, yupachicamashayquipita allchacashcanqui. Mana yarpaçhacullarna, wasiquiman cuticuy. 49Jesús rimayta mana ushyaptillan, Jairupa wasinpita caçha çhayamuran. Jairuta niran: Tayta, wamrayqui wañucäcushana. ¿Imapänataj tayta Jesústa pushanquipis? 50Nishanta wiyar, Jesús niran: Tayta Jairo, ama llaquicuychu. Nuwaman yupachicamanquiman. Wamrayqui allchacanga. 51Jairupa wasinman çhayaptin, aya chutarashanman yaycuchiran wañucuj wamrapa maman-taytanta, Pedruta, Santiaguta, Juanta. Waquincunatana mana yaycuchiranchu. 52Wasi puncuçhu runacuna wagarcaycaran. Atarcaycaran. Jesúsna niran: Ama wagaychu. Wamra mana wañushachu. Manchäga puñucashalla caycan. 53Täpajcuna wamra rasunpa wañushanta musyashpan Jesústa asiparan. 54Wañush wamra jipashta maquinpita charircur, Jesús niran: Wamra, ricchay. 55Chaura alman cutiptin, cawaricurcuran. Cawaricurcuptin, niran: Jaray. 56Wamrapa maman-taytan juyupa manchariran. Jesúsna niran: Wamrayquita cawarachishäta pitapis ama willapanquichu.

will be added

X\