1 Runacunata willapäcuriycur, Cafarnaún marcaman Jesús cuticuran. 2 Chay marcaçhu Roma murucucunapa capitannin juyaran. Capitanpa cuyay uywaynin juyupa jishyaycaran. Wañunaycaran. 3 Chaymi Jesús çhayamushanta mayar, mayur Israel runacunata capitan caçhacuran: Jesústa ruwacamuy. Uywaynïta allchacächinanpaj shamuchun nir. 4 Mayur runacuna Jesúsman çhayar, änir mañacuran: Tayta, capitanta yanapaptiqui, alli canga. Uywayninta allchacächiy, ari. 5 Israel runa captinchisi, alli ñawinpa ricamanchi. Quiquinmi shuntacäna wasitapis rurachisha nir. 6 Chaynuy niptin, capitanpa wasinpana Jesús aywäshiran. Wasiman yaycupaycaptin, mincaynincunata capitan caçharan: Tayta Jesús, wasïman ama çhayamunquimanchu. Manacaj runa car, pingacü. 7 Chaymi quiquïpis mana shamushcächu. Allchacächun niptiqui, uywaynï allchacäcunga. Mana aywanayquirächu. 8 Nuwapis jucpa maquinçhu juyä. Quiquïpis maquïçhu murucucunata purichï. Chaymi: Shamuy niptï, shamun. Ayway niptï, aywan. Llapan mincaynï shimïta wiyacun nir. 9 Capitanpa shiminta wiyar, Jesús jatunpa cushicuran. Jatirpaj runacunatana niran: Jäpa runa caycarsi, llapan shungunwan chay capitan manchapacaman; Israel-masinchicunam ichanga janan shungulla. 10 Chaura capitanpa caçhancuna cuticäriran. Wasinman çhayar, capitanpa uywayninta allchacashtana tariran. 11 Manasi aycällatana Naím marcaman Jesús aywaran. Purïshijnincunapis, runacunapis may-may aywäshiran. 12 Marcaman çhayaycashançhu chay-chicaj runa ayata apaycajwan tincuran. Juc biyüdapa japallan wamran wañush caran. 13 Biyüdata llaquipar, Jesús niran: Mamallau mama, ama wagaynachu, ari. 14 Matancajcunata içhicachir quirmata yataycur, niran: Müsitu, ricchapacuy. 15 Chaura müsupis cawaricurcur, rimapacuranna. Mamantana Jesús niran: Catay wawayqui. Cawarishana. 16 Runacuna sumaj mancharicäcuran. Tayta Diosninchitapis alliman çhuraran: Wawan caycaptinchi, Tayta Diosninchi yanapaycämanchi. Munayniyuj willacujninta caçhamusha nir. 17 Judea quinran runacunapis, chimpan quinrançhu tiyaj runacunapis ayata Jesús cawarachimushanta mayaran. 18 Quiquinpa purïshijnincuna willaptin, Ushyachicuj Juanpis Jesús ima-imata rurashallanta musyaran. Chaymi ishcaj purïshijninta jayarcachir, caçhacuran: 19 Jesústa tapumuy: ¿Jamchush Tayta Diosninchi caçhamushan Washäcuj caycanqui? ¿Juctarächush shuyäcärishaj? nir. 20 Juanpa caçhancuna çhayar, änir tapuran: Tayta Jesús, Ushyachicuj Juan caçhamasha. ¿Jamchush Tayta Diosninchi caçhamushan Washäcuj caycanqui? ¿Juctarächush shuyäcärishaj? nir. 21 Juanpa caçhancuna çhayaptin, jishyaçhucunata, supay pucllacushancunata, japracunata Jesús allchacaycächiran. 22 Chaymi tapuptin, niran: Jucta ama shuyanquimanchu. Manchäga llapan ricashayquita, llapan wiyashayquita Juanta willar ninqui: Japracuna ricaycanna. Wijrucunapis alli puriycanna. Jaraçhu jishyajcunapis allchacaycanna. Upacunapis wiyaycanna. Wañushcunapis cawariycanna. Pishipacujcunatapis Tayta Diosninchipa alli willapanta willapäcuycanna. 23 Chaymi Tayta Diosninchipa caçhan cashäta mana wasguijcuna sumaj cushicärinman. Imaman çhayaptinsi, paycunata Tayta Diosninchi sumaj yanapan. 24 Chaura Ushyachicuj Juanpa caçhancuna cuticuriptin, juturashan runacunata Jesús niran: Jamcunapis chunyaj pachaman aywar, Juanpa shiminta wiyarayquim, ¿au? Payga imatapis mana manchacujchu. Mana ishcay-quimsatachu rimaj. 25 ¿Imamanraj aywashcanqui? ¿Alli müdanashtachu tarishcanqui? Mana. Alli müdanashta achic-achicyaycaj wasillaçhu juyaycajta tarinqui. Jatun auturdäcunalla alli-alliga cawan. 26 ¿Pï runataraj ashishcanqui? Chunyaj pachaçhu Juanpa shiminta wiyaycur, Tayta Diosninchipa willacujnin cashanta tantiyacärishcanqui. Paymanmi waquin willacujcunapis mana tincuranchu. 27 Juanta caçhamunanpaj unayna Tayta Diosninchi musyachicuran. Shiminçhu nin: Caçhäta ñaupapäshunayquipaj juc runata ñaupachishaj. Runacunata willapäcungapaj camaricushalla shuyaräshunayquipaj nir. 28 Sumaj wiyaycallämay. Chay-chicaj runa carsi, Ushyachicuj Juanman mayganpis mana tincunchu. Chaypis maygan runa mana alli ricash caycaptinsi, Tayta Diosninchipa maquinçhu cawajcunaman Juanpis mana tincunchu. 29 Juanpa shiminta wiyacur, runacuna llapan-yupay ushyacuran. Jillayta shuntaj chiqui runacunapis Tayta Diosninchipa shiminta çhasquir, juchapita wanacurcur ushyacäriran. 30 Fariseucunawan Moiséspa shiminta yaçhajcunam ichanga mana ushyacuranchu. Tayta Diosninchi llaquipaycaptinsi, mana wiyacuranchu. Maquinçhu puriyta mana munar, wasguiparan. 31 Chaymi wiyächipar Jesús niran: Canan wichan runacunata, ¿imawanraj tincuchïman? 32 Yupay-tucuj wamracunawançhi tincuchishaj. Upa wamracuna-jina mana imatapis tantiyacunchu. Cushicuywan jachwashun nir quïnata tucapaptinpis, mana jachwanchu. Llaquicuywan wagashun niptinpis, mana waganchu. 33 Chay-jina Ushyachicuj Juan, tantata mana micujchu. Bïnutapis mana mallishachu. Chaypis Juanta ashllishcanqui: Supay pucllacusha nir. 34 Nuwatapis Tayta Diosninchi caçhamasha. Llapanta micü. Bïnutapis upü. Chaypis ashllircaycämanqui: Shincanan-raycullar, paçhan-raycullar purin. Juchaçhu arujcunawanpis, jillayta shuntaj chiqui runacunawanpis purin nir. 35 Imata rimarsi, Tayta Diosninchi yarpashanta pipis mana chapanmanchu. Shiminta wiyacujcunaga ricsipaylla cawan. 36 Juc junajçhu fariseu Simón jutiyuj runa Jesústa jayachiran: Micupacuj aywashun nir. Chaymi wasiman çhayar, Jesúspis micupacunanpaj jamacuycuran. 37 Jesús micupacuycashanta mayar, marca-pingay warmipis butïlla pirjümin aptash çhayaran. 38 Jesúspa çhaquinman jamacuycur, sumaj wagaran. Wiguinpis Jesúspa çhaquinta ushmaran. Ajchanwan chaquichipuran. Mucharan. Jananmanpis pirjümita jaycapuriran. 39 Jayachij fariseu runana yarparan: Tayta Diosninchipa willacujnin carga, jucha-sapa warmi cashanta Jesús musyanman. Yatananpitapis witicunman nir. 40 Yarpashanta tantiyar, Jesús niran: Simón, mä, tapucushayqui. Niptin, Simónpis niran: ¿Imallataraj, Tayta? 41 Tincuchiypana Jesús niran: Ishcaj runash juc runapa jagan caran. Jucninshi pichga paçhacta (500) jaga-tucuran, jucninnash pichga çhuncallata (50). 42 Jagan cutichiyta mana camäpacuptinshi, ishcaninta niran: Jaganchi ushyaräcuchun. Ama cutichimaynachu nir. Cananga mä, willamay. ¿Maygantaj jillayyuj runata sumaj llaquinga? 43 Tapuptin, Simón niran: Achcata jaga-tucush-cajçhi, Tayta. Jesúsna niran: Au. Rasullanta rimarcushcanqui. 44 Warmita ricärir, niran: Simón, cay warmita ricacunquiman. Wasiquiman çhayamuptï, çhaquïta mayllacunäpaj yacuta mana camapämashcanquichu. Cay warmim ichanga wiguinwanraj çhaquïta chajchurcur ajchanwan pichapämasha. 45 Çhayamuptï, mana wamayämashcanquichu. Cay warmim ichanga sumaj wamayämasha. Jamaycushäpita-pacha çhaquïtaraj muchasha. 46 Çhayamuptï, umäta wirawan mana pajpapämashcanquichu. Cay warmim ichanga pirjümitaraj çhaquïman jaycapamasha. 47 Sumaj tantiyacunquiman. Marca-pingay captinsi, warmipa juchantapis llapanta Tayta Diosninchi jungasha. Chaymi sumaj llaquipäman. Juchaynaj-tucujcunam ichanga janan shungulla Tayta Diosninchita manchapacun. 48 Jinarcur warmita niran: Llapan juchayquita jungashcä. 49 Simónpa wasinçhu juturaj runacuna Jesúspa shiminta wiyar, yarpaçhacuran: ¿Piraj cay runa? Jucha aparicushantapis jungacächin nir. 50 Jesúsna warmita niran: Yupachicamashayquipita Tayta Diosninchipa maquinçhüna cawaycanqui. Paymi yanapäshunqui allilla cawanayquipaj. Cuticuyna.
