Lucas 5

1Genesaret püsu cantunçhu Jesús willapäcuptin, chay-chicaj runa jutucaj Tayta Diosninchipa shiminta wiyananpaj. Runacuna quiquin-pura tacanacujraj. 2Yacuçhu ishcay büti içhiraycajta Jesús ricaran. Piscädu charijcuna bütipita yarpurir, ridinta tacsharcaycaran. 3Bütita ricar, Simónpa bütinman jigaran: Simón, bütiquiwan washanijman apamay nir. Jinarcur bütiçhu jamacuycullar, llapan runata willapäcuran. 4Rimayta ushyarcur, Simónta niran: Simón, püsu çhaupinman aywashun. Piscäduta charinayquipaj jundunnin yacuman ridiquita jitanquiman-llapa. 5Simónna niran: Tayta, warayllata piscapäcushcä. Ichanga mana jucnayllatapis charishcächu. Chaypis shimiquita wiyar, mä, yapay ridïta jitashaj. 6Jesúspa shiminta wiyacur ridinta yacunman jitar, änir may-may piscäduta chariran. Ridinpis raçhinasharaj. 7Chaymi piscädu charij-masincunata maquinwan Simón jayaran. Chaura juc-caj bütitapis aparan yanapänanpaj. Juc-caj bütita çhayachiptin, ishcan bütiman piscädu juntaran. May-may piscäduta wiñaptin, bütipis yacuman challpunaycaran. 8- 10Chay-chica piscäduta ricar, Simón Pedro, Juan, Jacobo, yanapajnincunapis mancharicäcuran. Simón Pedruna Jesúspa ñaupanman jungurpacuycur, niran: Tayta, manchacujmi. Witicunquiman. Jucha-sapa car, ñaupayquiçhu caytapis pingacü. Jesúsna niran: Simón Pedro, ama manchariychu. Piscäduta charishayqui-jina runacunata shuntanquipaj Tayta Diosninchipa maquinçhu cawananpaj. 11Chaura jinan üra bütita yacupa pallganman içhiycachir llapan imancunatapis jaguiriycur, Jesúswan aywacuran. 12Juc marcaçhu Jesús caycaptin, jaraçhu jishyawan runa çhayapuran. Ñaupanman uysucuycuran: Tayta Jesús, llaquipämashpayqui allchacaycachillämay, ari. Tayta Diosninchipa ricay ñawinçhüpis alli cayta munä nir. 13Llaquipashpan maquinwan yataycur, Jesús niran: Llaquipajmi. Allchacayna. Niptin, jaraçhu jishya illaricäcuran. Allchacäcuran. 14Jinarcur Jesús niran: Ama pitapis willapanquichu. Manchäga allina cashayquita ricashunayquipaj cüraman ayway. Moiséspa shiminta çharcur, cuyachicuyniquitapis Tayta Diosninchita jaray. Chayraj llapanpa ricay ñawinçhu alli canquipaj. 15Ama willanquichu niptinsi, Jesúspa willapan chay-tucuyçhu mayacaran. Tayta Diosninchipa shiminta wiyayta munar, allchacayta ashir, may-may runacuna shuntacaran. 16Achcaj shuntacaptinsi, chunyaj pachaman Jesús witicuj Tayta Diosninchita mañacunanpaj. 17Juc junajçhu Jesús willapäcuptin, fariseucunapis, Moiséspa shiminta yaçhaj runacunapis jamarpaycaran. Paycunaga Galilea marcacunapita, Judea marcacunapita, jinan Jerusalén marcapita shamuran Jesúspa shiminta wiyananpaj. Tayta Diosninchi camacächiptin, jishyaçhucunata Jesús allchacaycächiran. 18-19 Waquin runana quirmallawan cumllucash runata çhayachiran. Ichanga wasi junta runa caycaptin, Jesúspa ñaupanman yaycuchiyta mana camäpacuranchu. Chaymi wasi jananman jigarcur tïjata ashuraycächir, uçhcuriycäriran. Jinarcur Jesúspa ñaupanman warcuyllapa quirmantinta yarpuchiran. 20Paycuna llapan shungunwan yupachicushanta musyar, cumllucash runata Jesús niran: Wawallau wawa, juchayquicunata jungashcäna. 21Chaura fariseucunawan Moiséspa shiminta yaçhajcuna shungullançhu ullguran: ¿Imanaycantaj cay runa? Tayta Diosninchita apäriycan. Juchanchita Tayta Diosnillanchi junganman nir. 22Yarpashanta musyar, Jesús tapuran: ¿Imanirtaj llutanta yarparcaycanqui? 23Mä, tapushayqui. ¿Allchacächiychu, jucha aparicushanta jungacächiychu sasa? 24Canan tantiyacunquiman. Tayta Diosninchi cay pachaman caçhamasha. Munayniyujmi cä pipa juchantapis jungacächinäpaj. Cumllucash runatana niran: Mä, wiyamay. Jatariy. Quirmayquita shuntacurcur, wasiquiman cuticuy. 25Cumllucash runana llapan ricay jataricurcuran. Quirmanta apacurcur, wasinman cuticuran: Ima allish Tayta Diosninchi allchacächimasha nir. 26Llapan runacunapis jatunpa cushicuran. Tayta Diosninchita alliman çhuraran: Canan ricashanchicunata mana imaypis ricashcanchichu nir. 27Chaypita llucshircur, Leví jutiyuj runata Jesús ricaran. Levíga Roma marcapa mandajninpaj jillayta shuntaycaran. Ricar, Jesús niran: Leví, purïshimay. 28Niptin llapan imantapis jaguiriycur, Jesústana Leví purïshiran. 29Levípa wasinçhüna Jesústa alliman çhurar, sumaj micupäcuran. Jillayta shuntaj-masinwanpis, waquin chay-niraj runacunawanpis micurcaycaran. 30Fariseucunawan Moiséspa shiminta yaçhajcunam ichanga Jesústa pampaman çhurar purïshijnincunata tapuran: ¿Imanirtaj jillayta shuntaj chiqui runacunawan, juchaçhu arujcunawan micupäcunqui? 31Jamurpaptin, Jesúspis niran: Jishyaçhucunallash jampicujta ashin. Mana jishyarga, mana ashinchu. 32Chay-jina nuwapis juchaçhu arujcunata Tayta Diosninchiman cutichij shamushcä. Juchaynajmi cä nijcunatachu mana ashiycä. 33Waquin runa Jesústa tapucuran: Tayta, Ushyachicuj Juanpa purïshijnincunapis, fariseucunapa purïshijnincunapis ayunashpan Tayta Diosninchita mañacuj. Purïshijniquicunam ichanga paçhanta mana yargächinchu nir. 34Chaynuy niptin quiquinman tincuchicur, Jesús niran: Warmi ashïshijcuna manash llaquishachu ayunan. Manchäga cushishash micupacärin. 35Warmi ashij müsuta jiçhuptinshi ichanga, ayunangapaj. Jatunpash llaquicungapaj. 36Yapay tincuchiypa willapar, Jesús niran: Mauca müdanata mushuj raçhipawan manash pipis jiranmanchu. Mushujwan jiraptin, jintishpan mauca müdanatapis shiullirachinshi. Mushuj müdanapis uçhcucäcunshi. 37Bïnuta puguchinanpäpis manash pipis chaquish jaracha putuman wiñanmanchu. Bïnu pugur, chaquish jaracha pututa pashtarachinshi. Pashtaptin, bïnupis ushyacäcunshi. Jaracha putupis raçhicäcunshi. 38Llullu jaracha putuman wiñaptinshi ichanga, bïnu sumaj pugun. 39Pugush bïnuta malliycur, shigui bïnuta pipis manash upunnachu: Pugush bïnu sumaj mishquin nir.

will be added

X\