1 Dumingu warariycaptillan, warmicuna pirjümin apacurcur, Jesús pamparashanman aywaran. 2 Çhayaptin, chaparaj rumi witiraycajta tariran. 3 Pamparashan uçhcuman yaycurir, ayata mana tariranchu. 4 Warmicuna ima yarpaçhacuytapis mana camäpacuranchu. Niycaptin ishcaj runa müdananpis achic-achicyaycar, ricaripuran. 5 Manchacuywan uysuraycaptin, ricaripushan runa niran: ¿Pitataj ashiycanqui? Cawaj runa wañushcunapa çhaupinçhu mana canchu. 6 Ashishayqui runa mana cayçhüchu caycan. Manchäga cawarishana. Galilea marcaçhu caycällar, 7 nishurayqui: Tayta Diosninchi caçhamash captinsi, juchaçhu arujcunapa maquinman runacuna çhayachimanga. Rusçhu wañuchimanga. Wañuchimaptinsi, quimsa junajta cawarimushaj. 8 Chayta wiyar, warmicuna Jesúspa shiminta yarpäriran. 9 Chaymi pamparashanpita cutircur, çhunca jucwan caçhacunatawan waquin purïshijnincunatapis llapallanta willaran. 10 Willacuj warmicuna caran Magdalena María, Juana, Santiagupa maman María, waquin warmicunapis. 11 Warmicuna willacuptin, caçhacuna mana riguiranchu: Jinam rimacurcaycan nir. 12 Waquin mana riguiptinsi, Jesús pamparashanman Pedro aywacullaran. Maçhay rurinman watgaycur, pitushan bayïta juturaycajllata ricaran. Chaura yarpaçhacuycar wasipa cuticuran. 13 Chay junajlla Jesúspa ishcaj purïshijnincuna Jerusalén marcapita Emaús marcaman aywaycaran. Jerusalén marcapita Emaús marcaman ishcay üra puriylla caran. 14 Imapis cashancunata rimaräcur aywaycaptin, 15 quiquin Jesús tariparcur aywäshiran. 16 Paycunam ichanga mana ricsiranchu. 17 Jesúsna tapuriran: ¿Imatataj rimarcaycanqui? nir. Chaura llaquish içhicaycäriran. 18 Cleofás jutiyuj runana Jesústa tapuran: ¿Jerusalén marcaçhu pacharaycar, imatapis mana musyanquichu? ¿Janyancuna ima cashantapis manachu mayashcanqui? nir. 19 Jesúsna tapuran: ¿Imataj casha? nir. Paycuna niran: Nazaret marca Jesústa wañuycachisha. Payga Tayta Diosninchipa willacujnin car, sumaj willapäcuran. Jishyaçhucunatapis allchacächiran. Supaycunatapis jarguran. Tayta Diosninchipa ricay ñawinçhüpis, runa-masincunapa ricay ñawinçhüpis alli cawaran. 20 - 21 Israel marca-masintï payman yupachicuycarä: Jäpa runacunapa maquinpita Jesús jishpichimäshun nir. Chaypis marcanchipa mayur cürancunawan mayur runacuna rusçhu wañuycachisha. 21 Wañuycachishanpis cananwan quimsa junajna. 22 Jananmanpis chaca-chacalla Jesús pamparashanman aywaj warmicuna cutircamur manchachimasha. 23 Jesúspa ayanta manash tarishachu. Ricariparcurshi, anjilcuna nisha: Jesús cawaycan. 24 Warmicuna willacuptin, waquinnï aywasha. Çhayaptin, änirshi Jesúspa ayan mana carannachu. Quiquin Jesústapis manash ricarannachu. 25 Jesúsna niran: ¿Upa-jina tantiyacuyta manachu atipanqui? ¿Unay willacujcunapa shimin shunguyquiman manachu çhayaran? 26 ¿Manachu musyarayqui Washäcuj ñacariycurraj Tayta Diosninchipa achic-achicyaycaj wasinman cutinanta? 27 Washäcuj cashanta tantiyacunanpaj Tayta Diosninchipa shiminta ima-imapis isquirbirashanta Jesús sumaj willaparan. Moisés isquirbishanpita unay willacujcuna isquirbishanwancaman tantiyachicuran. 28 Emaús marcaman çhayaycar, Jesús ñaupacuran. 29 Ñaupacuyta camaycuptin, paycuna niran: Ama aywacuychu. Pachapis chacanaycan. Cayllaçhu pachacushun. Chaynuy niptin, Jesús auniran. Paycunawan pachacuran. 30 Micunanpaj jamaraycashançhu tantata aptarcur, Jesús niran: Taytallau Tayta, ima allish tarichillämashcanqui. Jinarcur paquircur-paquircur aypuran. 31 Chayraj ishcaj purïshijnincuna Jesús cashanta tantiyacuriran. Jesúsmi ichanga illaricäcuran. 32 Chaura quiquin-pura ninacäriran: Parlaräcur aywäshimaptinchi, Tayta Diosninchipa shimin isquirbirajta willapämaptinchi, ¿manachu shungunchisi shacya-shacyalla ricacuran? 33 Chaymi Jerusalén marcaman juclla cuticäriran. Çhayar, çhunca jucwan caçhacunapis, waquin purïshijcunapis juturpaycajta tariran. 34 Juturpajcunapis niran: Nuwacunapis Tayta Jesús rasunpa cawarishanta musyäna. Simón Pedrutapis ricaripusha. 35 Chaura Emaús marcapita cutijcunapis aywäshishanta willaran: Jesúswan caminuçhu tincushcä. Ichanga tantata paquiriptinraj tantiyacärishcä nir. 36 Emaús marcapita cutijcuna rimaycaptillanraj, llapanpa çhaupinçhu Jesús ricacuran. (Nircur niran: Allilla juyaycullay, ari.) 37 Chaura llapan mancharicäcuran: Almata-imataçhi ricaycanchi nir. 38 Jesúsmi ichanga niran: ¿Imanirtaj mancharinqui? ¿Imanirtaj llutäpacuycanqui? 39 Almaga aychaynaj, tulluynaj. Nuwam ichanga aychayuj, tulluyuj caycä. Maquï çhaquïta sumaj ricay. Rasunpa musyanayquipaj mä, yataycamay. Quiquïmi caycä. 40 (Chaynuy nir çhaquintawan maquinta ricachiran.) 41 Llapan juturajcunawan purïshijnincuna sumaj cushicuran. Chaypis tantiyacuyta mana atiparanchu. Chaymi Jesús niran: ¿Imallapis micunanchipaj caycanchu? 42 Chaura cancash piscäduta jararan. (Abïjapa mishquintapis jararan.) 43 Jaraptin, llapanpa ricay ñawinçhu micuran. 44 Micucurcur, niran: Unay willaparaj: Nuwapaj Tayta Diosninchipa shimin rimashan llapanmi çharcucänan. Moisés isquirbishançhüpis, unay willacujcuna isquirbishançhüpis, Salmos isquirbishançhüpis nuwapaj riman nir. 45 Chaypita sumaj tantiyachir niran: 46 Tayta Diosninchipa shimin isquirbirashançhu nin: Washäcuj ñacar, wañuyman çhayanga. Quimsa junajta cawaringa. 47 Nuwapita chay-tucuy marcaçhu willapäcunga. Shimïta wiyacur pipis wanacuptinga, llapan juchanta Tayta Diosninchi jungaycur alli ñawinwanna ricanga. Chaymi jamcunapis willapäcur purir, Jerusalén marcapita-pacha jallarinqui. 48 May marcaçhüpis ricamashayquita, wiyamashayquita willapäcunqui. 49 Chaypis Jerusalén marcapita ama llucshinquirächu. Papänï aunishan-jina Espíritu Santuta caçhamushaj shacyächishunayquipaj. 50 Chaypita llapan purïshijnincunata Betania marcapa Jesús pusharan. Maquinta jugarcur, mañacuran: Taytallau Tayta, llapanta alli ñawiquiwan ricaycullay, ari. Llapallançhu yanapaycullay. 51 Mañacuycashallançhu aywacuran. (Janaj pachaman Jesústa apacuran. 52 Apacuptin purïshijnincuna jungurpacuycur, Jesústa manchapacuran.) Jinarcur Jerusalén marcaman cushishalla cuticäriran. 53 Chayçhu waran-waran Tayta Diosninchipa wasillançhu Tayta Diosninchita alliman çhuraran.
