Lucas 21

1Tayta Diosninchipa wasinçhu puchuy-puchuy janançhu cawajcuna cuyachicuyninta çhurajta Jesús ricapaycaran. 2Biyüda warmipis pishipacuyçhu cawar, ishcay çhaniynaj-yupay jillayta çhurashanta ricaran. 3Chayta ricar, purïshijnincunata Jesús niran: Sumaj tantiyacunquiman. Waccha biyüda mas achcata çhurasha puchuy-puchuy janançhu cawajcunapita. 4Paycuna achcata çhurarpis, puchupacushallanta çhurasha. Waccha biyüdam ichanga llapan charashallantapis çhurasha. Chayllawan cawanan caran. 5Waquin runa parlaycaran: Achic-achicyaycaj rumicunawan Tayta Diosninchipa wasinta pirgasha. Sumaj cuyayllapaj, ¿au? Runacuna cuyachicuynintapis çhurasha Tayta Diosninchipa wasin achic-achicyaycaj cananpaj nir. Jesúsna niran: 6Sumaj ricacuy. Imayllaga llapan ricashayqui ushyaypa ushyacanga. Rumiwan pirgararsi, llapanmi juçhurachish canga. 7Waquin runa Jesústa tapuran: Tayta, ¿imaytaj Tayta Diosninchipa wasinta juçhuchinga? ¿Imanaypataj shimiqui çharcucänanta musyashaj? nir. 8Jesúsna niran: Pipis pantachishurunquiman. Achcaj runa shamunga: Tayta Diosninchi caçhamushan Washäcuj caycä. Cay pacha ushyacangana nir. Imata nishuptiquisi, ama çhasquipanquichu. 9Wacçhu-cayçhu wañuchinacuy jatariptinpis, ama mancharinquichu. Chaycunaraj cangapaj. Chaypis cay pacha mana ushyacangarächu. 10Cay pacha ushyacänanpäga marcan-marcan wañuchinacunga. 11Chay-tucuyçhüpis pacha juyupa sicsicyanga. Muçhuy captinpis, yargaywan runacuna wañunga. Juyu jishyapis timpuringa. Janaj pachaçhüpis mana ricashanchicunata ricar, mancharinquipaj. Sicsicyanquipaj. 12Chaycunaman mana çhayaptillayqui, jaticaçhar ushyashunquipaj. Çhasquicamashayqui-janan mayur Israel runacunapa maquinmanpis, carsilcunamanpis çhayachishunquipaj. Roma auturdäcunamanpis, mandajcunapis rïsu apashunquipaj. 13Wacpa-caypa purichishuptiquisi, shimiquita ama amucurcunquichu. Manchäga pï-maytapis nuwapita willapanqui. 14Ama yarpaçhacunquichu: Chapacunäpaj, ¿imataraj rimashaj? nir. 15Chapacunayquipaj quiquïmi yarpächishayqui. Yarpächishäta rimaptiqui, pipis mana içhipushunquipächu. Pipis mana achäquita taringachu. 16Çhasquicamashayqui-janan mamayqui-taytayquisi, wauguiquicunasi, yawar-masiquicunasi chiquishunquipaj. Paycunapis auturdäcunapa maquinman çhayachishunquipaj. Waquinniquita wañuchishunquipaj. 17Çhasquicamashayqui-janan llapan runa chiquishunquipaj. 18Chaypis ama llaquicunquichu. Tayta Diosninchi mana jungashunquipächu. Maquinpita mana pipis jurgushunquipächu. 19Chaymi jipaman ama cutiricunquichu. Mana yamacällar shimïta wiyacuptiqui, imaycamanpis maquinçhu Tayta Diosninchi cawachishunquipaj. 20Tayta Diosninchipa wasin juçhunanpaj wallcana pishiptin, jäpa murucucunapis Jerusalén marcaman çhayapunga. 21Chayta ricar Judea quinrançhu tiyar, puntacunaman jishpicäriy. Marcaçhu tiyar, çhacracunaman jishpicäriy. Çhacrapitapis marcayquiman ama cutiychu. 22Chay wichan shiminman-tupu Tayta Diosninchi mana wiyacujcunata ñacachinga. 23Ñacachishan wichan llapan Israel runacuna juyupa ñacanga. Jishyaj warmicunapis, pishi wamrayujcunapis cuyapaypaj ñacanga. 24Waquin runa cuchur ushyash wañunga. Waquintana watacurcur ushyashta jäpa marcacunaman apanga. Jäpa runacuna Jerusalén marcata ñacachir ushyanga Tayta Diosninchi jitashan junajcaman. 25Intipis, quillapis, istrïllacunapis juc-nirajman ticracuringa. Lamar yacupis bunyaypa-bunyaptin, may-chayçhüpis runacuna mancharinga. Tantiyaytapis mana atipangachu. 26Janaj pachatapis Tayta Diosninchi tapsir ushyaringa. Chaymi runacuna manchariyllawan wañucäcungaraj: ¿Imamanraj çhayashun, au? nir. 27Chay junaj Tayta Diosninchi caçhamaptin munayniyuj caycar, pucutay janançhu achic-achicyaycar cutiycämujta ricamanquipaj. 28Rimashäcuna çharcuptin, cushicärinquiman. Ama llaquicärinquimanchu. Washänäpämi cutiramushaj. 29Jïgus yürawan tincuchiypa tantiyacushun. 30Yüran chillguiptin, tamya quilla jallaycunanta musyanchi. 31Chay-jina willapashäcuna çharcuptin, cutimunä caycashanta tantiyacärinquipaj. Cutimuptï, maquinçhüna Tayta Diosninchi runacunata purichinga. 32Sumaj tantiyacunquiman. Waquinniquipa ricay ñawiquiçhu llapan çharcucanga. 33Janaj pachapis, cay pachapis ushyacanga. Shimïmi ichanga mana imaysi jungacangapächu. 34Chaymi sumaj tantiyacärinquiman. Shunguyqui munashallanta ama ruranquichu. Upyallaçhu ama cawanquichu. Cay pachaçhu cawanayquipaj yarpaçhacullar jungaycamärunquiman. Mana yarpashpita cutiramushaj. 35Cay pachaman cutimushä junaj pipis mana jishpingachu. Wiyacamajcunata washäshaj; juchaçhu arujcunatam ichanga mana. 36Chaymi Tayta Diosninchipa caçhan captï, cutimunäta shuyaj-shuyajlla cawanquiman. Mana yamacällar Tayta Diosninchita mañacunqui jishpichishunayquipäpis, ñaupäman cushish çhayachishunayquipäpis. 37Waran-waran Tayta Diosninchipa wasinçhu Jesús willapäcuran. Chacaypam ichanga Ulïbus punta quinrançhu pachacuran. 38Runacunapis waran-waran tutalla aywaran Tayta Diosninchipa wasinman Jesúspa shiminta wiyaj.

will be added

X\