1 Jesús rimaycaptin, jillayta shuntaj chiqui runacunapis, waquin juchaçhu arujcunapis shiminta wiyananpaj jutucaran. 2 Chaymi fariseucunawan Moiséspa shiminta yaçhajcuna Jesústa jamurparan: ¿Imanirtaj juchaçhu arujcunawan Jesús talluran? Iwal micunpis nir. 3 Tincuchiypa willapar Jesús niran: 4 Juc runapash paçhac (100) uyshan caran. Jucta ujraycur, ¿manachu waquinta juc pachaman jutuycur ujrashan-cajta ashin tarishancaman? 5 Tarir, aparicurcurshi cushish wasinman apacun. 6 Llapan yawar-masincunatawan bisïnuncunata jayachin: Tünashun. Ujracash uyshäta tarirü nirshi. 7 Juchaçhu aruj runa wanacuptinpis, taricash uyshapaj cushicushan-jina Tayta Diosninchipis, anjilcunapis cushicun. Isgun çhunca isgunwan (99) alli runa captinsi juc juchaçhu aruj runa wanacuptin, janaj pachaçhu llapan sumaj cushicärin. 8 Yapaypis tincuchiypa willapar Jesús niran: Juc warmish çhunca jillayta chararan. Jucta ujraycur achquita ratachicuycurshi, pichananpawan tarishancaman ashin. 9 Tariycur, llapan yawar-masincunata, bisïnuncunata jayachin: Tünashun. Ujracash jillaynïta tarirü nirshi. 10 Juchaçhu aruj runa wanacuptin, taricash jillaypaj cushicushan-jina Tayta Diosninchipa anjilnincunapis cushicun. 11 Juctapis tincuchiypa willapar Jesús niran: Juc runapash ishcay wamran caran. 12 Shullca wamranshi taytanta niran: Papä, çhacrayquita raçhishun. Dirïchüta raquipaycamay. Chaura papänin ishcantash ricachiran. 13 Shullca wamranga manasi aycallatash imancunatapis ranticuycuran. Jinarcur caru marcapash aywacuran. Caruçhu shungun munashallanta rurarshi, jillaynintapis llapanta ushyaran. 14 Jillayninta ushyashallantash muçhuypis jallacuycuran. Chaura micunanpaj imapis manash caranchu. 15 Imansi mana captin arupacuyta ashir, juc runaman çhayaran. Chay runa cuchillatash michichiran. 16 Muçhuy captin, juyupash yargaran. Cuchipa micuynintapis munaparan. Ichanga pipis manash jararanchu. 17 Chayräshi yarpaçhacuran: Papänïpa piyunnincuna micuy janançhu cawan. Nuwam ichanga yargaypita wañuycä. 18 Chaymi papänïman cuticushaj. Çhayar, nishaj: Papä, juchata aparicushcä. Shimiquitapis, Tayta Diosninchipa shimintapis mana wiyacushcächu. 19 Cananga piyunllayquipis cacushaj. Jucha-sapa caycaptï, ama: Wawä canqui nimanquimanchu nirshi. 20 Yarpaçhacuriycur, änir papäninman cuticuran. Wamranta caruta shaycamujta ricar, papänin jucllash tariparan. Llaquipashan macallacurcuran. 21 Mushçhincu wamrannash niran: Papä, juchata aparicushcä. Shimiquitapis, Tayta Diosninchipa shimintapis mana wiyacushcächu. Jucha-sapa caycaptï, ama: Wawä canqui nimaychu. 22 Papäninnash piyunnincunata niran: Wawä ushtucunanpaj mushuj müdanata, llanguita, surtïjata juclla apamuy. 23 Micupacunanchipäpis manta türituta pishtay. Canan tünashun. 24 Wañucush canga niycaptïpis, wamrä cutircamusha. Illarish carpis, taricasha. Chayshi mushçhincu wamra cutiyninta tüna jallacuycuran. 25 Shullcan çhayaptin, mayur wauguin çhacraçhüshi aruycaran. Wasiman yaycuycashançhüshi tünaycajta wiyaran. 26 Chaura papäninpa piyunnintash jayaran: ¿Wasiçhu imataj caycan? nir. 27 Piyunnash niran: Shullcayqui taricasha. Alli çhayamusha. Cushicushpan papäniqui manta türitutapis pishtachisha. 28 Chaura mayur wauguin juyupa ullgurshi, wasiman çhayaytapis mana munaranchu. Chaymi llucshircur, papänin jayaran. 29 Jayaptinsi mana munarshi, niran: Papä, chay-chica wata maquiquiçhu juyä. Shimiquitapis llapanta wiyacushcä. Chaypis mana juc capshillatapis jumashcanquichu tünata rurar micupacunäpaj. 30 Ñuñushniquipämi ichanga allinnin türitutaraj pishtaycachishcanqui. Payga runan-runan puricuj warmicunawanshi llapan jillayniquita ushyasha. 31 Papäninnash niran: Wawallau wawa, rasunpa maquïçhu juyaycanqui. Chaymi llapan imäcunapis maquiquiçhu caycan. 32 Shullcayquim ichanga wañushpita-jina cutircamusha. Ujracashpita-jina taricasha. Chaymi shungü achicyacäcuptin, tünananchi camacan.
