Lucas 11

1Juc junaj Tayta Diosninchita Jesús mañacuycaran. Mañacuyta ushyarcuptin, juc purïshijnin niran: Tayta Jesús, Tayta Diosninchita mañacunäpaj yaçhachimay, ari. Ushyachicuj Juan purïshijnincunata yaçhachishannuylla yaçhachimay. 2Jesúsna niran: Tayta Diosninchita mañacur ninqui: Papäninchi, Llapanpis manchapacuyculläshunqui. Maquiquiçhu cawaycachillämay. 3Waran-waran cawanäpäpis tariycachillämay, ari. 4Juchäcunatapis ama yarparaynachu. Manchäga chiquimajcunata alli ricashäpita alli ricaycallämay. Juchaman çhayanätapis ama camacaycachillaychu. 5Jananmanpis Jesús niran: Pullan-pagasshi ricsinacushayquita jayacunquiman: Tayta, quimsa tantallata mañacushayqui. 6Ricsinacushä runa yargaycar çhayamusha. Jaranäpaj mana imäpis canchu nir. 7Jayacuptiquishi, nishunquiman: Ama rimapämaychu. Puncü wiçhgaraycan. Wamräcunapis puñuycan. Mana jatarimümanchu. 8Chaypis yaparir-yaparir jayacuptinshi, jatarimunman. Mañacushantash tarichinman. Jatarimunga manash ricsinacushayquipitachu, manchäga: Runacuna pampaman çhuramanga nishpan. 9Chay-jina mañacuptiqui, Tayta Diosninchi jushunquipaj. Ashiptiqui, tarichishunquipaj. Puncupita jayacuptiqui, quiçhapushunquipaj. 10Mañacujcuna çhasquin. Ashijcunapis tarin. Puncupita jayacujcunatapis quiçhapun. 11Wamrayqui yarganar piscäduta mañacushuptiqui, ¿wañuchicuj curuta jaranquimanchuraj? 12Runtuta mañacushuptiqui, ¿alacranta jaranquimanchuraj? 13Jamcuna jucha-sapa carcaycarsi, wamrayquicunata allita jaranqui. Tayta Diosninchipis llaquipäcuj. Mañacuptiqui, janaj pachaçhu caycashpan alli-allillata tarichishunquipaj. Espíritu Santupa maquinçhüpis purichishunquipaj. 14Juc cuti upayächicuj supayta Jesús jarguran. Jarguriptin, upa runa rimariran. Upa runa rimariptin, llapan runa manchariran. 15Waquin runam ichanga Jesústa pampaman çhurar, niran: Supaycunapa mandajnin Beelzebulta jayararshi, supaycunata jarguycan. Mana Tayta Diosninchitachu jayaraycan. 16Waquin runana achäquita ashipashpan Jesústa niran: Tayta Diosninchi camacächiyninpa mä, imallatapis ruray. 17Supay yanapashanta yarpaptin, tincuchiypa Jesús niran: May marcaçhüshi quiquin-pura ticrapanacur, wacpa-caypa aywacärin. May wasiçhüpis majanwan ticrapanacur, raquicaymanshi çhayan. 18Chaymi mayur supaypis supay-masinwan ticrapanacur, ima ruraytapis mana camäpacunmanchu, ¿au? Chaynuy captin, ¿imanirtaj Beelzebulta jayarar supaycunata jargushäta yarpanqui? 19Mä, tapushayqui. Waquinniqui supayta jargur, ¿pita jayarartaj jarguycanqui? ¿Tayta Diosninchitachu, supaytachu jayaraycanqui? Tayta Diosninchita nimaptiqui, tumparcaycämashayquita tantiyacushaj. 20Sumaj tantiyacunquiman. Tayta Diosninchi camacächiyninpa supaycunata jargur, Tayta Diosninchi munayniyuj cashanta musyachicuycä. Chayta ricar, tantiyacunquiman maquinçhüna Tayta Diosninchi runacunata puriycächishantapis. 21Tincuchiypa willapäshayqui. Callpayuj runa garutinwan wasinta täpaptin, pipis manash yaycunchu. 22Sumaj-sumaj callpayuj runa ricarimurshi ichanga garutintapis jiçhurir, wicaparinga. Maquinpita imantapis jiçhurirshi, jucninta-jucninta raquiparinga. Nuwapis sumaj callpayuj runa-jina supaycunata jarguycä. 23Tayta Diosninchi caçhamashanta mana çhasquicuyta munar, chiquircaycämanqui. Tayta Diosninchipa maquinman runacunata shuntayta mana yanapämar, chapata rurarcaycämanqui. 24Supay imata rurashantapis tantiyacunquiman. Runapita jargush car, chunyajçhüshi purin. Jamaytapis manash tarinchu. Mayçhüpis jamayta mana tarir, yarpaçhacun: Chay runaman cuticushaj nirshi. 25Cutirshi, chay runata pichapacush wasita-jina, jäcuycaj wasita-jina tarin. 26Chayshi jançhis mas juyu supay-masincunata pushacurcur, runaçhu tiyananpaj cutin. Supaycuna cutiptin, juyu cashanpita masnash runa juyuyacäcun. 27Jesús rimaycaptillan, llapanpa çhaupinpita juc warmi jayacuran: Tayta Jesús, mamayqui imaraj cushicun. Ima allish jishpichishcashunqui. 28Jesúsna niran: Llapan wiyacujcuna cushish cawan. Shiminta wiyacuptin, pitapis Tayta Diosninchi yanapan. 29Chay-chicaj runa shiminta wiyananpaj jutucaptin, Jesús niran: Juyu runa carcaycanqui. Tayta Diosninchi camacächiyninpa imallatapis ruranäta munarcaycanqui. Tantiyayta munar, unay willacuj Jonáspa willapanta yarparanquiman. 30Chaypis unay willacuj Jonás imamanpis çhayashallanta ricanquipaj. Paytaga Tayta Diosninchi caçharan Nínive marca runacunata willapaj. Jonás caçhashan-jina nuwatapis caçhamasha canan wichan runacunata willapänäpaj. Tantiyacuyta munar, ricamanquipaj. 31Sumaj tantiyacunquiman. Cay pacha ushyacaptin, llapan runata jucha aparicushanpita Tayta Diosninchi ñauquiptin, Saba marca mandaj warmipis cawarimunga. Paymi ñauquishunquipaj: Mandaj Salomónpa shiminta wiyar, Tayta Diosninchi llaquipäcuj cashanta tantiyacushcä. Jamcunam ichanga mana tantiyacärishcanquichu nir. Chay warmi carupita-pacha shamuran mandaj Salomón rimashanta wiyananpaj. Wiyar, Tayta Diosninchipa shiminta çhasquicuran. Mandaj Salomón yaçhaj carsi, nuwaman mana tincushachu. Chaypis shimïta wiyacuyta mana munanquichu. 32Cay pacha ushyacaptin, Nínive marca runacunapis cawarimunga. Paycuna ñauquishunquipaj: Tayta Diosninchipa shiminta mana wiyacushcanquichu nir. Nínive runacuna Jonás willapäcuptin, wanacäriran. Jonás Tayta Diosninchipa willacujnin carsi, nuwaman mana tincunchu. Chaypis shimïta wiyacuyta mana munanquichu. 33Achquita ratarcachir, pipis manash pacaycunmanchu. Manchäga patacmanshi çhuran llapanta achquipänanpaj. 34Achquiga shimïwan tincun. Ñawinchiwan llapantapis ricanchi. Ñawinchi achquita ricaptin, shungunchipis achicyacäcun. Shunguyquiman shimï çhayaptin, Tayta Diosninchipa shungun munashanta tantiyacunquipaj. Shunguyquiman mana çhayaptinmi ichanga, jucha aruyllaçhu cawanquipaj. 35Chaymi Tayta Diosninchipa shungun munashanta sumaj tantiyacunquiman. Ama upa-tucunquimanchu. 36Tayta Diosninchipa shiminta llapan shunguyquiwan wiyacur, manchapacur cawanquiman. Tayta Diosninchipa maquinçhu cawashayquita llapan runa musyanga. Achäquitapis mana taringachu pampaman çhurashunayquipaj. 37Rimayta ushyarcuptin, juc fariseu runa Jesústa wasinman pusharan: Micupacushun nir. Wasiman çhayar, maquinta mana awicullar micunanpaj Jesús jamacuycuran. 38Maquinta mana awicuptin, fariseu runa jamurparan: Tayta Diosninchita mana manchapacur, yaçhacashanchitapis mana çharcunchu nir. 39Jesúsna niran: Tayta, fariseu-masiquicunawan janallan awish mati-niraj carcaycanqui. Runa ricanallanpaj alli-tucunqui. Mallaj cashayquita shunguyqui musyaraycan. Jucha rurayllapaj wañunqui. 40Upa-rinri canqui. Tayta Diosninchi mana janallanchitachu camasha. Manchäga shungunchitapis camasha. 41Tayta Diosninchi alli ricashunayquipaj wacchacunataraj llapan shunguyquiwan yanapanquiman. 42Fariseucuna, llaquicärinquiman. Juyupa ñacanquipaj. Alli ricash cayta munar, llapan imayquicunapitapis Tayta Diosninchipaj raquinqui. Irbabuynatasi, rüdatasi, caldu jaçhatasi raquinqui. Chaypis runa-masiquita mana llaquipanquichu. Tayta Diosninchitapis mana manchapacunquichu. Paypa-cajta raquir, allita ruraycanqui. Ichanga llapan shunguyquiwanpis manchapacunquiman. Runa-masiquitapis alli ricanquiman. 43Fariseucuna, llaquicärinquiman. Juyupa ñacanquipaj. Shuntacäna wasiman çhayar, ñaupa-ñaupallaçhu jamayta ashinqui. Läsacunaçhüpis llapan runa manchapacushunayquita munanqui. 44Fariseucuna, llaquicärinquiman. Juyupa ñacanquipaj. Waquin runacuna shunguyqui ima-niraj cashantapis mana musyar: Alli runa nishunqui. Chaypis mïchu-jina carcaycanqui. Jananga alli. Rurinçhüna aya ismuycan. 45Jesús piñacuptin, Moiséspa shiminta yaçhaj runa jataricurcuran: Tayta, fariseu-masïcunata piñacur, nuwacunatapis ashlliycamanqui nir. 46Jesúsna niran: Moiséspa shiminta yaçhajcuna, llaquicärinquiman. Juyupa ñacanquipaj. Runacunata tucuy-tucuyta yaçhachinqui. Çharcunan sasa-cajcunatapis yaçhachinqui. Quiquiquicunam ichanga juc maquillasi mana yanapanquichu. 47Moiséspa shiminta yaçhajcuna, llaquicärinquiman. Juyupa ñacanquipaj. Unay auquilluyquicuna Tayta Diosninchipa willacujnincunapa shiminta mana wiyacur, wañuycachiran. Jamcunana unay willacujcunapa mïchunta picharcaycanqui. Ichanga shiminta mana wiyacärinquichu. 48Mïchunta pichar: Auquillücuna willacujcunata wañuchir, allita rurasha nir yarparcaycanqui. Auquilluyquicuna wañuycachisha. Jamcuna mïchunta pichaycar, auquilluyquicunapa llupinparaj aywarcaycanqui: Allipämi wañush nir. 49Chayçhi Tayta Diosninchipis niran: Shimïta willapäcunanpaj willacujnïcunatapis, caçhäcunatapis, achcajta caçhamushaj. Paycunata waquinta wañuchinquipaj. Waquinta marcan-marcan jaticaçhar ushyanquipaj. 50Willacujninta wañuchir, cay pacha camashanpita-pacha wañuchicushantapis aparicunquipaj. 51Aparicunquipaj Abelta wañuchishanpita-pacha Zacaríasta wañuchishancaman. Payta Tayta Diosninchipa wasi puncunçhu, tullpa wajtallançhu wañuchiran. Paycunata wañuchishanpita jamcunatana Tayta Diosninchi ñacachishunquipaj. 52Moiséspa shiminta yaçhajcuna, llaquicärinquiman. Juyupa ñacanquipaj. Yaçhaj carsi, Tayta Diosninchipa shiminta mana manchapacunquichu. Runa-masiquitapis mana yaçhachinquichu. Manchäga Tayta Diosninchipa shungun munashannuy cawayta munarcaycaptin, miçharcaycanqui. 53Rimayta ushyarcur wasipita llucshir, Jesús aywacuran. Chay junajpita-pacha Moiséspa shiminta yaçhajcunawan fariseucuna ullgucäcuran. Achäquita ashipällar, jucta-jucta Jesústa tapupaj. 54Achäquita ashiparan: Llutanta rimaptin, wañuycachishun nir.

will be added

X\