Lucas 10

1Chaypita jançhis çhunca ishcaywan (72) purïshijnincunata acracuran caçhacunanpaj. Ishcaycaman-ishcaycaman caçharan: Çhayanä marcacunaman ñaupay nir. Nircur tincuchiypa niran: 2Micuy puguraycaj-yupay chay-chicaj runa Tayta Diosninchipa shiminta wiyaj-wiyajlla shuyarpaycan. Shiminta willacujcunam ichanga wallcajlla. Chaymi willacujcuna juclla yapacämunanpaj Tayta Diosninchita mañacäriy. Shiminta çhasquicujcunata shuntamunan carcaycan. 3Ichanga sumaj tantiyacäriy. Shimïta willacuptiqui, runacuna chiquishunquipaj. Uyshata liyun rurinman jaycurij-yupay caçhaycaj. Aywayna. 4Shimïta willapäcuj aywar, jillayniquitapis, jipiquitapis, rucanayqui llanguiquitapis ama apanquichu. Piwanpis caminuçhu tincur, ama mayaräcunquichu. 5Juc wasiman çhayar: ¿Jaucallachu? Allilla juyaycullay nir wamayanqui. 6Allilla cawayta munar çhasquishuptiqui, Tayta Diosninchipis yanapanga allilla cawananpaj; mana çhasquishuptiquim ichanga, mana. 7Pachächishuptiqui, chay wasillaçhu pachacunqui. Wasin-wasin ama purinquichu. Jarashuptiqui, llapanta çhasquicunqui. Shimïta willacujcunaga micush-upush cawanan camacan. 8May marcaçhüpis jarashuptiqui, çhasquicunqui. 9Jishyaçhucunatapis allchacächinqui. Willapanqui: Tayta Diosninchi shuyaraycämanchi. Maquinçhüna purichimäshun nir. 10Juc marcaçhu mana çhasquishuptiquim ichanga, llapanta ninqui: 11Tayta Diosninchi shuyaraycämanchi. Maquinçhüna purichimäshun. Jamcunam ichanga wasguishcanqui. Chaymi ñacayman çhayanquipaj. Jamcunata mana ricanäpaj çhaquïtapis pichacurir aywacü. Shimïta ama junganquichu. 12Sumaj tantiyacunquiman. Cay pacha ushyacaptin Sodoma runacunata ñacachirpis, Tayta Diosninchi llaquipangaraj. Payta wasguipajcunatam ichanga mana llaquipällar ñacachinga. 13Corozaín runacuna, Betsaida runacuna, Israel runa captiquisi, juyupa Tayta Diosninchi ñacachishunquipaj. Pay camacächiyninpa shiminta willapaycaptïsi, jishyaçhucunata allchacaycächiptïsi, chay-chicaj runata jaraycaptïsi, supaycunata jarguycaptïsi, maquinçhu cawayta mana munashcanquichu. Jäpa Tiro marca runacunawan jäpa Sidón marca runacunam ichanga jishyaçhucunata allchacächishäta ricar, supaycunata jargushäta ricar, mayna Tayta Diosninchipa shiminta çhasquicur juchanpita wanacunman caran. Wanacushan musyacänanpaj llaquicuywan mayna waganman caran. Umanman uçhpata piçhucunman caran. Jaçhga müdananta ushtucunman caran. 14Chaymi Tiro runacunatawan Sidón runacunata Tayta Diosninchi yangallaraj ñacachingapaj. Jamcunatam ichanga ricaycarsi mana wanacushayquipita cay pacha ushyacashan junaj juyupa ñacachishunquipaj. 15Cafarnaún runacuna: Janaj pachaman aywashaj niptiquisi, yarpashayqui mana camacangachu. Chacaj pachaman Tayta Diosninchi jargushunquipaj. 16Jinarcur caçhancunata niran: Shimiquita wiyacujcuna nuwatapis, Tayta Diosninchitapis wiyacun. Shimiquita mana wiyacujcunam ichanga nuwatapis, caçhamaj Tayta Diosninchitapis wasguiycan. 17Juc junajçhu jançhis çhunca ishcaywan (72) caçhacuna cushish cutiran. Jesúswan tincur, niran: Tayta, shimiquita wiyacur jarguptï, supaycunapis änir, aywacun. 18Jesúsna niran: Jarguptiqui, supaycunapa mandajninta janaj pachapita shicwamushanta ricashcä. Räyu-jina pampaman shicwamusha. 19Jamcunata munayniyuj canayquipaj çhurashcaj. Chaymi supaycunapis mana içhipushunquipächu. Wañuchicuj curucunatapis, alacrancunatapis lluchcar ushyarinquipaj. 20Chaypis supayta jargushayquipita alläpa ama cushicärinquimanchu. Cushicurga, Tayta Diosninchipa wawan cashayquipita cushicunquiman. Janaj pachaçhu acta librunçhüpis jutiquicuna isquirbiraycanna. 21Niycaptillan Espíritu Santu shacyächiptin, Jesúspa shungun achicyacäcusha. Chaymi niran: Papällau Papä, jatunpa cushicü. Alli shungu runacunata wamra-jina wiyacuj captin, yarpashayquita musyachishcanqui. Yaçhaj-tucujcunatam ichanga shunguyqui yarpashanta mana musyachishcanquichu. Cay pachapis, janaj pachapis maquiquiçhu caycan. Shunguyqui munashanta llapanta camacächishcanqui, Papä. 22Jinarcur llapan runata niran: Papänï llap-llapanta maquïman çhurasha. Wawan cashäta Papänï musyan. Wawan carmi, Papänï pï cashantapis musyä. Yanapaptïraj, pipis Papänïpa shungunta musyapanga. 23Chaypita purïshijnincunallata niran: Cushicärinquiman. Llapan rurashäta ricanayquipaj Tayta Diosninchi yanapaycäshunqui. 24Sumaj tantiyacunquiman. Unay willacujcunapis, mandajcunapis ricamayta munaran. Ima-imata rurashätapis ricayta munaran. Shimïtapis wiyayta munaran. Ichanga mana camäpacuranchu. 25Moiséspa shiminta yaçhaj runa achäquita ashipällar, Jesústa tapucuran: Tayta, ¿imatataj ruräman Tayta Diosninchipa maquinçhu imaycamanpis cawanäpaj? nir. 26Jesúsna niran: Moiséspa shiminta musyanqui, ¿au? ¿Imanintaj liguishayqui? 27Chaura niran: Moisés isquirbishançhu nin: Llapan shunguyquiwan Tayta Diosninchita manchapacäriy. Quiquiqui alli ricacushayqui-jina runa-masiquitapis alli ricanquiman. 28Jesúsna niran: Rasullanta rimashcanqui. Rimashayquita çharcur, Tayta Diosninchipa maquinçhu imaycamanpis cawanquipaj. 29Chaypis alli llucshiyta munar, yaçhaj runa Jesústa tapuran: ¿Pitaj runa-masï? nir. 30Chaura tincuchiypa willapar, Jesús niran: Juc junajshi Israel runa Jerusalén marcapita Jericó marcaman aywaycaran. Asaltanticunash shuyaycur, llapan imancunatapis jiçhuran. Müdanantapis jiçhuran. Wañunashancamanshi magaran. Chutaraycajtash jaguiycuran. 31Mayllanta mana yarpashpita cürapis aywaycaran. Runa chutaraycajta ricar carunijpa tumarcurshi, aywacuran. 32Cüra yanapaj runapis chay quinranpa aywaycaran. Runa chutaraycajta ricar carunijpa tumarcurshi, aywacusha. 33Samaria runapis chay quinranpa aywaycaran. Runa chutaraycajta ricarshi ichanga, sumaj llaquipasha. 34Jucllash charipacusha. Jirincunatapis jampircurshi watapasha. Bürunman jigarcachirshi, wasiman apasha. Sumaj ricasha. 35Waranin tuta wasiyujta nisha: Cay runata ricapaycallämay. Catay jillay. Pishiptin-imaptin, jillayniquita çhurapamanqui. Cutimur, cutichilläshayqui Jinarcurshi Samaria runa aywacusha. 36Willapayta ushyarcur, yaçhaj runata Jesús tapuran: ¿Maygantaj runa-masinta llaquipasha? ¿Cürachu? ¿Cüra yanapajchu? ¿Samaria runachu? nir. 37Moiséspa shiminta yaçhajna niran: Llaquipar yanapaj-cajmi. Jesúsna niran: Cananpita llaquipäcuj runa-jina jampis runa-masiquita llaquipanquiman. 38Jerusalén marcapa aywaycashançhu juc marcaman purïshijnincuna-ima Jesús çhayaran. Martapa wasinman çhayaptin, pachächiran. 39Martapa ñañan caran María. Jesús willapäcuptin, jamacuycur María sumaj wiyacuran. 40Martam ichanga wasi rurayninwan tincuypa-tincuycaran. Chaymi Jesústa niran: Tayta, ñañäta piñacamuy. Yanapamächun. Quiquilläta ima ruraytapis jaguiparamasha. 41Jesúsna niran: Martallau Marta, ¿imanirtaj warminqui? Wasi rurayniquicunallawan tincuypa-tincuycanqui. Allipaj willapashäta mana wiyayta munanquichu. 42Maríam ichanga sumaj wiyacuycan. Wiyacushanta shungunpita pipis mana jiçhungapächu.

will be added

X\