San Judas 1

1Irmänucuna, nuwa Judas cartacallämü. Santiagupa wauguin caycä. Jesucristupa maquinçhu cawar, mandu-rurajnin caycä. Nuwanchita Tayta Diosninchi sumaj llaquipämanchi. Wawan cananchipaj acracamashcanchi. Washäcuj Jesúspis sumaj ricamanchi. 2Llapaniquita llaquipäcuj Tayta Diosninchi yanapayculläshunqui. Allilla cawaycachilläshunqui. Sumaj llaquipaycullaäshunqui. 3Wawacuna, unaypita-pacha cartacamuyta yarparpis, cananraj camäpacushcä. Washäcuj Jesúspita llapanchipis Tayta Diosninchipa maquinçhu cawanchi. Chaypis sumaj tantiyacushun. Tayta Diosninchiga rimashanta çharcunmi. Wawan caycar, shimintapis ama jungashunchu. Washäcuj Jesústapis ama caçharishunchu. Payman yupachicushanchi musyacänanpaj llapantapis allillata rurashun. 4Waquin runa irmänu-tucullar, pantachicur puriycan. Paycuna Taytanchi Jesucristutapis pampaman çhuran. Maquinçhu cawayta mana munar, shimintapis mana wiyacunchu. Manchäga marca-pingay cawan. Juchata aparicullar puriptinchisi, Tayta Diosninchi mana ñacachimäshunpächu. Payga llaquipäcuj nir quiquinpa shungun munashallanta ruran. Unaypita-pacham ichanga Tayta Diosninchi shiminta musyachicuran: Pantachicujcuna ñacayman çhayanga nir. 5Unay Israel runacunapa willapanta musyaptiquisi, mä, yarpärishun. Israel runacunata llaquipar, Egipto marcapita Tayta Diosninchi jishpichicamuran. Mana wiyacuptinmi ichanga, chaqui pacha quinrançhu ushyaypa ushyaran. 6Mana wiyacuj anjilcunatapis chacaj pachaman Tayta Diosninchi wiçhgaycuran cay pacha ushyacänan junajcaman. Paycuna quiquinpa cargun captinsi, alliman çhurash caycaptinsi, Tayta Diosninchita apäriyta munaran. Chaypita cadinawan wancuraycur chacaj pachaman wiçhgaycuran. Cay pacha ushyacänan junaj ima juchan cashantapis jurgapanga. 7Sodoma marca runacunatapis, Gomorra marca runacunatapis, chay quinran marca runacunatapis Tayta Diosninchi mana upij ninaçhu ñacaycächin llapanchi ricacunanchipaj. Paycuna mana wiyacur, jucwan-jucwan cacuran. Marca-pingay cawaran. 8Paycuna imaman çhayash captinsi, chay pantachicujcunapis: Tayta Diosninchi ricaripamasha nir marca-pingay cawarcaycan. Washäcuj Jesústapis pampaman çhurarcaycan. Tayta Diosninchipa anjilnincunatapis ashllir ushyarcaycan. 9Mayur anjil Miguelmi ichanga Moiséspa ayanta supaywan jiçhunacurpis, mana ullgüparanchu. Manchäga niran: Supay, quiquin Tayta Diosninchi piñacushunqui. 10Pantachicujcunam ichanga imata rimashantapis mana tantiyar, pitapis pampaman çhuran. Ricaycarsi, uywacuna-jina imatapis mana tantiyanchu. Chaypis tucuyta ruran ushyacayman çhayanallanpaj. 11Paycuna llaquipaypaj ñacanga. Caínpa llupinpa jatin. Balaampa llupinpa jatir, jillay-raycullar imatapis ruran. Coré-jina Tayta Diosninchita ticrapacushanpita wañuytapis taringa. 12Alli ricanacur micupacäriptiquipis, pantachicujcuna pingaypaj imatapis manacajcunallata ruran. Manchapacuytapis mana yaçhanchu. Shungun yarpashallanta imatapis ashin. Yangalla alli-tucunpis. Pantachicujcuna alli-tucur purishanpita tincuchiypa tantiyacushun. Tamya jallarinan wichan pucutayta ricar: Allipaj tamyamunga nir cushicunchi. Pucutayta wayra jucläpa apacuptinmi ichanga: Pucutay yangalla ricarimusha ninchi. Rüta yüra wayunan wichanpis: Mishquita micushun nir cushicunchi. Chaquishta tarirmi ichanga, llaquicunchi: Chaquish caycaptin, sapirichun nir. 13Mayu çhayar pushgaynin ricarishan-jina pantachicujcunapis manacajcunallata rurar, pingayman çhayan. Shicwaj istrïlla illaricäcushan-jina pantachicujcunapis chacaj pachaman illarijpaj çhayanga. 14Pantachicujcuna ñacananta musyachicur, Adánpa willcan Henocpis niran: May-may anjilnincunawan Tayta Diosninchi shaycamunga. 15Llapan runapa juchanta jurgapänanpaj shamunga. Jucha aparicujcunata, pampaman çhurajcunata, llapantam ñacayman çhayachingapaj. Juchaçhu arushanman-tupu, ashllicushanman-tupu ñacachingapaj. 16Pantachicujcuna imallapitapis ullguycan. Imapitapis jagayaycan. Shungun munashallanta ashiycan. Imatapis munarmi ichanga, pitapis alli-tupan. Cushichipan. 17Wawacuna, nuwanchim ichanga Taytanchi Jesucristupa shiminta ama jungashunchu. Caçhancunawan shiminta tantiyachimashcanchi. 18Paycuna niran: Jesucristu cutimunanpaj wallcana pishiptin, runacuna mana manchapacunganachu. Manchäga Tayta Diosninchita ashllinga. Shungun munashallanta imatapis ruranga. 19Paycuna chiquinacuyllaçhu, irmänucunata raquicächiyllaçhu arun. Mana Espíritu Santupa maquinçhu cawar, quiquinpa shungun munashallanta imatapis ruran. 20Irmänucunallau irmänu, nuwanchim ichanga Tayta Diosninchiman sumaj yupachicushun. Shungun munashallanta rurar, juc shungulla cawashun. Espíritu Santu shacyächimashanchiman-tupu Tayta Diosninchita mañacushun. 21Tayta Diosninchi llaquiycämaptinchi, maquillançhu cawashun. Taytanchi Jesucristupis llaquipaycämanchi. Cutimur, shuntacamäshunpaj maquinçhu imaycamanpis cawananchipaj. Chaymi mana yamacällar shuyäcushun. 22Llutäpacujcunata llaquipar, tantiyachicushun Tayta Diosninchiman sumaj yupachicunanpaj. 23Supaypa maquinçhu purijcunatapis jishpichishun Tayta Diosninchipa maquillançhu cawananpaj. Manchäga ninaçhu ñacangapaj. Juchaçhu arujcunata llaquiparsi, llupinpa ama jatishunchu. Runapa rurin müdanan janra cashan-jina paycunapa shungunpis janra. Juchallaçhu arun. Chaymi llaquipar, juchan mana aypäshunayquipaj Tayta Diosninchita manchapacunquiman. 24- 25 Wawacuna, Tayta Diosnillanchita imay-imaypis alliman çhurayculläshun. Payga shungun munashanta imatapis camacächin. Payman pipis mana tincunchu. Payga sumaj munayniyuj. Munayniyuj jucha aparicuypita jishpichimänanchipäpis, juchaynajta ricay ñawinman çhayachimänanchipäpis. Quiquinmi Taytanchi Jesucristuta caçhamusha washämänanchipaj. Paypa ñaupanman çhayar, jatunpa cushicushunpaj. Chaynuy caycullächun.

will be added

X\