Santiago 4

1Irmänucuna, ¿imapitataj chiquinacunqui? ¿Imanirtaj tincupänacunqui? Shunguyqui yarpashallanta munaparçhi chiquinacuyllaçhu aruycanqui. 2Ashishayquita mana tarir, chiquinacunqui. Maganacunqui. Munapashayquita miçhäshuptiqui, wañuchinacunqui. Ima-imata munarpis, mana tarinquichu Tayta Diosninchita mana mañacushpayqui. 3Mañacursi, waquinniqui shunguyqui munashallanta ashinqui. Chaymi Tayta Diosninchipita mana imatapis çhasquinquichu. 4Ishcay cära runacuna, shunguyqui munapashallanta ashirmi, Tayta Diosninchipa cunçhan jatariycanqui. ¿Manachu musyashcanqui jucha aparicujcuna Tayta Diosninchipa cunçhan jatarishanta? 5Shiminçhu nin: Tayta Diosninchi runacunata llaquipar, sumaj michin. 6Tayta Diosninchi jatunpa llaquipämanchi. Chaymi jananmanpis nin: Alli-tucujcunata Tayta Diosninchi wasguin. Wiyacujcunatam ichanga sumaj llaquipan. 7Chaymi supay maquichacuyta munashuptiqui, ama çhasquipanquichu. Manchäga Tayta Diosninchita wiyacunquiman. Wiyacuptiqui, supay jishpir aywacunga. 8Tayta Diosninchipa maquillançhu caway. Chaura paypis maquinçhu purichishunqui. Juchata aparicush-imarga, wanacunquiman. Janan shungulla yupachicur, llapan shunguyquiwanna yupachicunquiman. 9Wanacushayqui musyacänanpaj llaquicuy. Atar wagay. Asicaçhar ama puriychu. Manchäga wiguiquita jiçhay. Ama cushicuj-tucunquichu. Manchäga llaquicuy. 10Llapan shunguyquiwan Tayta Diosninchita wiyacuy. Chayrämi Tayta Diosninchi alliçhu jurgushunquipaj. 11Irmänucuna, ama jamurpänacunquichu. Jamurpänacur Tayta Diosninchipa shiminta jungaycur, quiquillayquipita yaçhaj-tucuycanqui. ¿Tayta Diosninchipa shiminta pampaman çhuranquimanchuraj? Mana. Manchäga wiyacunayqui. Llaquinacunayqui. 12Tayta Diosninchi jucnaylla. Ima-imata rurashanchitapis llap-llapanta jurgapämäshunpaj. Payllam munayniyuj jishpichimänanchipäpis, ñacayman jitarpamänanchipäpis. Chaynuy caycaptin, ¿imanirtaj jamurpänacunqui? 13Juctana tantiyacushun. Ama jatun-tucunquimanchu: Waracuna juc marcaman aywashun. Juc wata juyämushun. Imatapis rantipacamushun. Chay-chica jillayta rurariycur, cutimushun nir. 14Waracuna imaman çhayanayquitapis mana musyanquichu. Runa ushyacajllam. Juçhgutay-jina ricarircur, manasi aycällata illaricäcun. 15Chaymi ninquiman: Tayta Diosninchi cawananchita camacächiptinraj, imatapis rurashun. 16Chaypis waquinniqui alläpa jatun-tucunqui. Jatun-tucur, juchata aparicuycanqui. 17Pipis musyaycar allita mana rurar, juchata aparicun.

will be added

X\