Santiago 3

1Irmänucuna, yaçhajcunata llap-llapanpitam Tayta Diosninchi tapunga. Chaymi quiquillayquipita yaçhaj cayta ama ashinquimanchu. 2Llapanchi imallaçhüpis llutanta ruranchi. Shiminta chapacujcunam ichanga juchata mana aparicunchu. Quiquinpa shungun munashanta mana ruranchu. 3Sumaj yarpaçhacushun. Cawallupa shiminta shingawarcur, munashanchipa purichinchi. Maypapis apanchi. 4Jatun-caray bütitapis tacsha timunllawan purichin. Wayra pücaptinsi, munashanpa chaufir purichin. 5Shingacuna watu-jina, timun-jina shiminchipis imamansi çhayachimanchi. Ichiclla shanshapis ratarir, jircantinta ushyan. 6Shiminchipis shansha-yupay caycan. Juchaman çhayachimänanchipäpis munayniyuj caycan. Chaymi supay llutanta rimachiptin, llapan runa juchata aparicun. 7Runacuna chucaru uywacunatapis, pichuysacunatapis, curucunatapis, yacuçhu tiyajcunatapis yaçhacächiyta yaçhan. 8Shiminta chapacuytam ichanga pipis mana camäpacunchu. Runapa shimin wañuymanpis jitarpun. Wañuchicuj. 9Shimillanchiwan Tayta Diosninchitapis alliman çhuranchi. Runa-masinchitapis quiquin-nirajta Tayta Diosninchi camasha caycaptinsi, ashllir ushyanchi. 10¿Juc shimillanchiwanchuraj Tayta Diosninchita alliman çhuraycar, runa-masinchitapis ashllir ushyaycäshun? Irmänucuna, chay-niraj ama cawashuwanchu. 11Irmänucuna, imata rurananchipäpis sumaj tantiyacushun. ¿Juc ñawillapita mishquij yacuwan puchguj yacu pashtamunmanchuraj? 12Rayanpis jarata mana wayunmanchu, ¿au? Durashnupis rayanta mana wayunmanchu, ¿au? Chaymi juc ñawillapita mishquijwan puchguj yacu mana pashtamunmanchu. 13Mayganiquipis yaçhaj caycar, alli shungu cashayquita musyachicunquiman. Tayta Diosninchipa shungun munashannuy cawaycar, runa-masiquitapis yanapanquiman. 14Warmij carmi ichanga, ullguj carmi ichanga, nanaparänacurmi ichanga, juyu carmi ichanga, ama yupachicuychu: Yaçhaj caycä. Tayta Diosninchipa maquinçhu cawaycä nir. 15Mana janaj pacha Tayta Diosninchichu chiquicuyta yarpächishunqui. Manchäga payman mana yupachicur shunguyqui munashallanta ashinqui. Supaypa maquinçhu cawanqui. 16Chiquinacullar, nanaparänacullar cawar, pipis juc shungulla mana cawanchu. Manchäga juchallaçhu arun. 17Tayta Diosninchipita yaçhaj cayta çhasquicurmi ichanga, paypa shungun munashannuylla pipis cawan. Juchata mana aparicunchu. Pï-maywanpis alli ricanacun. Piwanpis wiyanacun. Piwanpis tantiyanacun. Llaquipänacun. Yanapänacun. Llapanta alli ñawinwan rican. Alli shungu. 18Alli ricajcuna quiquinpis allilla cawanga.

will be added

X\