1 Israel-masicuna, chay-tucuy marcaçhu cawaptiquipis, nuwa Santiago cartacallämü. Munashallanta ruranäpaj maquinçhu Tayta Diosninchipis, Tayta Jesucristupis purichiman. Llapaniqui allilla juyaycärinqui, ari. 2 Irmänucuna, ima ñacayman çhayarpis, ama llaquicunquichu. Manchäga sumaj-sumaj cushicunquiman. 3 Ñacashpanchiraj llapan shungunchiwan Tayta Diosninchiman yupachicuyta yaçhacunchi. 4 Mana yamacällar yupachicur, Tayta Diosninchipa shungun munashannuy cawashunpaj. Imatapis mana sasächicushunpächu. 5 Mayganiquipis imatapis mana tantiyar, Tayta Diosninchita mañacunquiman. Mana ricapäshunquipächu. Manchäga wiyashunquipaj. Sumaj yanapäshunquipaj shungun munashannuy cawanayquipaj. 6 - 7 Ichanga llapan shunguyquiwan mañacunqui. Mañacur ama yarpaçhacunquichu: ¿Mañacushäta çhasquimangachuraj, manachuraj? nir. Ishcayta yarpaptiqui, Tayta Diosninchi mana wiyashunquipächu. Chaqui üjata wayra apacushan-jina ishcayta yarpaj runacunapis wacpa-caypa mashtacäcun. 8 Chay-niraj runacuna imata yarparpis, imata munarpis, waran-waran jucta-jucta yarpaçhacun. 9 Irmänucuna, lluta runa car pishipacuyçhu cawaptiquisi, cushicärinquiman. Tayta Diosninchi alli ñawinwan ricaycäshunqui. 10 Puchuy-puchuy janançhu cawar pishipacuyman çhayaptiquisi, cushicärinquiman. Tayta Diosninchi alli ñawinwan ricaycäshunqui. Puchuy-puchuy janançhu cawajcuna wayta-jina ushyacajlla. 11 Waytapis shanaywan uyucurin. Camarajlla carpis, chaquicurin. Chay-jina puchuy-puchuy janançhu cawajcunapis rurayninwan tincuypa-tincushançhu ushyapacayman çhayan. 12 Ñacayman çhayarpis, cushicärinquiman. Tayta Diosninchita mana wasguiptinchi, imaycamanpis ñaupançhu cawachimäshun. Aunimashanchinuylla llapan manchapacujcunata alli cawayta tarichinga. 13 Llutan rurayta yarpar, ama ninquichu: Tayta Diosninchi juchaman jitarpaycäman. Payga jucha aparicuyta mana yarpanchu. Pitapis mana juchata aparicachinchu. 14 Manchäga quiquin runa jucha rurayta munapan. Imanuypapis aywapun. 15 Munapashanta rurar, juchallicun. Juchallaçhu cawar, mana imaypis Tayta Diosninchipa ñaupançhu cawangachu. Manchäga wañuyllata taringa. 16 Irmänucunallau irmänu, llutanta ama yarpanquichu. 17 Tayta Diosninchi alliman çhayachimanchi. Allillata rurananchipäpis yarpächimanchi. Shimintapis çharcun. Mana ishcay-quimsatachu riman. Tayta Diosninchi camashanpita intipis, quillapis caycan. 18 Shiminta çhasquicuptinchi, quiquin munayninpa wamrachacamashcanchi. Chaymi pirwata-jina allina ricamanchi. 19 Irmänucunallau irmänu, imatapis wiyanayquipaj rinriquita sumaj quiçhanqui. Rimayta munarmi ichanga, shimiquita chapacunqui. Juclla imapitapis ama rimarinquichu. Ama warminquichu. Ama ullgunquichu. 20 Warmijcunapis, ullgujcunapis Tayta Diosninchi munashanta mana ruranchu. 21 Chaymi juchata ama aparicunquichu. Manchäga Tayta Diosninchipa shiminta sumaj wiyacunqui. Mana ticrapällar wiyacuptiqui, Tayta Diosninchi washäshunqui. 22 Ichanga wiyashallayquiwan ama ushyaräcuchunchu. Manchäga llapanta çharcunayqui. Wiyashallayqui ushyaräcuptin, upa-yupayna caycanqui. 23 Tayta Diosninchipa shiminta wiyaycar mana çharcujcunaga rama-rama ispïjuçhu runa jajllanta ricacur jungaycushanwan tincun. 24 Jajllan imanuy cashantapis ricacurir, ima-niraj cashantapis mana yarpannachu. 25 Tayta Diosninchipa shiminta sumaj wiyacur allita rurarmi ichanga, alli cawayta taringa. Tayta Diosninchi yanapaptin, imaçhüpis alliçhu llucshinga. 26 Tayta Diosninchita manchapacur, pipis shiminta chapacunman; manchäga manacajllapämi manchapacushanpis. Shungun munashannuypis mana cawannachu. 27 Rasunpa manchapacurga, biyüdacunatapis, wacchacunatapis yanapanman. Juchaçhüpis ama cawanmanchu. Chaynuy cawaptinchi, Tayta Diosninchi sumaj cushicun.
