Hebreos 9

1Unay-caj parlanacushançhu Tayta Diosninchi niran: Israel runacuna, manchapacamar purichina jiru çhaqui capillaçhu jaramanqui. Chay wasillaçhu tincushunpaj. Chay wasi runa jatarachishallan caran. 2Ishcay cuartuyuj caran. Puncu-caj cuartuçhu achqui ratachicunapis, jarashan tantata çhuraränan mïsapis caycaran. Chay cuartullata ricsin: Lugar santu nir. 3Ruri-caj cuartutana ricsin: Lugar santísimu nir. Ishcan cuartuta bayïtawan raquiraycächiran. 4Ruriçhu caycaran juripita insinsu saumachicuna tacshalla tullpapis, Tayta Diosninchipa babulninpis. Chay babul juriwan chapash caycaran. Babul rurinçhüna juri angarawan Tayta Diosninchi ricarachishan tantapis, Aarónpa chillguij garutinpis, läja rumiçhu isquirbiraycashan Tayta Diosninchipa shiminpis çhuraraycaran. 5Babul janançhüna Tayta Diosninchi caycashanta musyachicushpan cäpan mashtapacush ishcay quirubin içhiraycaran. Cäpanwan babulta chaparaycaran. Chayçhu runacunapa juchan aparicushanta Tayta Diosninchi jungaycuj. Ima captinpis, alläpa ama rimashunnachu. 6Unay cüracuna rurashanta sumaj musyanqui. Waran-waran Tayta Diosninchita jarananpaj purichina jiru çhaqui capillaman yaycuj; ichanga puncu-caj cuartullaman. 7Lugar Santísimu nishan cuartumanmi ichanga wataçhu juc cutilla uywapa yawarninta apacurcur, mayur cüra yaycuran. Mana musyayninwan juchallicushanpita yawarta Tayta Diosninchita jararan marca-masincunapa juchantapis, quiquinpa juchantapis jungananpaj. 8- 9 Tincuchiypa Espíritu Santu tantiyaycächimanchi. Unay purichina jiru çhaqui capillaçhu: Lugar santísimu nishan ruri-caj cuartuta juc bayïta chaparaycaran pipis mana yaycunanpaj. Cananpis chaparaycaj-yupay shungunchi caycan. Jarayninchitapis, cuyachicuyninchitapis Tayta Diosninchita jaraycarsi, jucha aparicushanchita mana junganchichu. Shungunchiçhüraj pacaraycächinchi. 10Jarayninchipis, cuyachicuyninchipis ricsish-ricsishllata jarashanchi-jina ricsish micuyllata micurpis, ricsish yacullata upurpis, yaçhachimashannuylla awicurcurpis, janan-janallanman çhayan. Shungunchicaman mana çhayanchu. Tayta Diosninchipaj pishiranraj. Chaymi paywan alli ricanacunanchipaj juc yarpayta camacächiran. 11Camacächishannuylla Washäcuj Jesús mayur cüra cayman çhayasha. Tayta Diosninchi aunishanta tarichimanchi. Tayta Diosninchitapis parlapaycämanchi. Ichanga mana runa rurashan wasiçhüchu; manchäga janaj pacha achic-achicyaycaj wasiçhüna parlapaycämanchi. 12Janaj pachaçhu mana capshipa yawarnintapis, türitupa yawarnintapis jarashachu; manchäga quiquinpa yawarninta. Wañuyman çhayar, quiquinpa caway-bïdantaraj Tayta Diosninchita jararan Lugar Santísimu nishanman yaycuycur. Yawarninta juc cutilla jaraycur, Tayta Diosninchipa maquinman çhuramashcanchi imaycamanpis cawananchipaj. Juchata rurar wañuyman çhayananchipita Jesús jishpichimashcanchi. 13Unayga cüracuna capshipa yawarnintapis, manta türitupa yawarnintapis juchayuj runacunaman chajchuran. Tirnïra rupachishan uçhpatapis machipuran. Chaycuna alli caran runa ricanallanpaj; Tayta Diosninchipämi ichanga pishisharaj. 14Juchaynajta ricamänanchipaj Espíritu Santu yanapaptin, Washäcuj Jesús quiquinpa caway-bïdanta yawarnintinta Tayta Diosninchita jararan. Juchaynaj caycar, caway-bïdanta jarasha wañuypita jishpichimänanchipaj. Chayga rasunpa shungunchiman çhayasha. Ichanga mana çhayashachu yaparir-yaparir imatapis jarashanchipitachu. Quiquinchi jarashanchi wañuyman çhayachimänanchi caran. Cananmi ichanga alli ñawinwan Tayta Diosninchi ricamashanchita tantiyacunchi. Cawacuj captin, paypa shungun munashallanta rurar cawashun. 15Chaura unay parlanacushanta mana çharcur, runacuna wañuyman çhayaran. Chaymi jishpichimänanchi-raycur Washäcuj Jesús wañuyman çhayayninpa juc parlanacuyta camacächisha. Cananga llapanchita alli ñawinwan Tayta Diosninchi ricaycämanchi. Quiquin acracamashcanchi imaycamanpis maquinçhu cawananchipaj. 16Cananga tistamintuta rurashanpita tantiyacushun. Tistamintu nishannuylla çharcucänanpaj tistamintucuj wañucunanraj. 17Tistamintucuj cawaycaptillan, tistamintu rurashan mana çharcucanrächu. Tistamintucuj wañucuptinmi ichanga, çharcucanga. 18Chay-jina unay parlanacushan çharcucänanpaj uywata pishtaj. Chayta ricar, Israel runacuna niran: Cananga shiminta çharcucächinanpaj yawarwan llanguichisha. 19Tayta Diosninchipa shiminta sumaj willapariycur, llapan Israel runatapis yawarwanraj Moisés chajchuran. Puca jïluwan jaçhacunata watarcur, türitucunapa, capshicunapa yawarninta yacuwan tallurcachir, llapan runatapis, Tayta Diosninchi isquirbishan shimintapis chajchuran. 20Chajchur niran: Tayta Diosninchi aunishanta çharcunanpaj cay yawarwan llanguichisha. 21Yawarwan purichina jiru çhaqui capillatapis, llapan imancunatapis chajchuran. 22Tayta Diosninchipa shiminta isquirbir, Moisés niran: Tayta Diosninchi alli ricananpaj imatapis yawarwan chajchunan. Yawarwanraj runacuna jucha aparicushantapis Tayta Diosninchi jungaycun. 23Janaj pachaçhu-niraj rurash captinsi, purichina jiru çhaqui capillatapis, llapan imancunatapis uywapa yawarninwan Moisés chajchuran Tayta Diosninchi alli ricananpaj. Chay yawarllawan janaj pachaçhu caycaj wasitawan llapan imancunatapis chajchunan mana camacaranchu. Manchäga juc alli yawarraj pishiraycaran. 24Tayta Diosninchipa wasin-niraj captinsi, runa jatarachishan capillaman Washäcuj Jesús mana yaycuranchu. Manchäga janaj pachaman yaycur, Tayta Diosninchipa ñaupallançhu parlapaycämanchi. 25Cay pachaçhu watan-watan mayur cüra uywacunapa yawarninta apacurcur, purichina jiru çhaqui capillaman yaycuran. Jesúsmi ichanga quiquinpa bïdanta çhurar, juc cutilla yawarninta jararan. Juc cuti jarashallan imaycamanpis aypäcun. 26Quiquinpa caway-bïdanta juc cuti jarashan mana aypaptin, cay pachata camashanpita-pachaçhi yaparir-yaparir wañunman caran. Tayta Diosninchi camacächishan wichan çhayamuptinmi ichanga, quiquinpa bïdanta jararan. Nuwanchi-raycur wañuptin, yawarninpa çhaninwan Tayta Diosninchi: Juchayquita jungashcäna nir alli ricamanchi. 27Runapis juc cutilla wañunchi. Chaypitaraj jucha aparicushanchipita Tayta Diosninchi jurgapämäshunpaj. 28Washäcuj Jesúspis nuwanchi-raycur juc cutilla wañuyman çhayasha. Caway-bïdanta jarasha llapan runacunapa juchanta Tayta Diosninchi jungananpaj. Cay pachaman yapay cutimur, mana runacunapa juchan-jananchu cutimunga. Manchäga shiminta çhasquicujcunata llapanta jishpichingapaj.

will be added

X\