Hebreos 8

1Sumaj tantiyacushun. Mañacapamänanchipaj mayur cüranchi Jesús janaj pachaçhu caycan. Munayniyuj Tayta Diosninchipa dirïcha-caj lädunçhu jamaraycan. 2Paymi mañacapaycämanchi quiquin Tayta Diosninchipa ñaupallançhu, rasunpa-caj purichina jiru çhaqui capillaçhu. Chay wasi mana runa jatarachishanchu; manchäga quiquin Tayta Diosninchi jatarachishan. 3Cay pachaçhu mayur cüracuna caycan uywacunata Tayta Diosninchita jarananpaj, cuyachicuycunatapis çhurapunanpaj. Chaymi Jesúspis Tayta Diosninchita imatapis jaranan camacaran. 4Cay pachaçhu cüra cayman Jesús mana yaycunmanchu caran. Cay pachaçhu cüracuna mana pishinchu. Achcajraj Moisés yaçhachishannuylla cuyachicuycunata jararcaycan. 5Cay pachaçhu jarashancuna janaj pachaçhu jarashallanman tincun. Purichina jiru çhaqui capillaçhu imatapis rurananpaj yaçhachir, Sinaí jircaçhu tincur, Tayta Diosninchi Moisésta niran: Moisés, sumaj wiyacuy. Wasïta jatarachir, janaj pachaçhu ricachishajtanuylla llapanta tincuchiyllapa ruranqui. Chaymi cay pachaçhu jarashanpis, rurashanpis janaj pachaçhu rurashallanman tincun. 6Mayur cüra Jesúsmi ichanga janaj pachaçhüna cüra cayninta sumaj çharcuycan. Nuwanchipaj Tayta Diosninchita parlapaycämanchi. Aunishantapis sumaj camacaycächin. Jesús rurashanmanga cay pachaçhu cüracuna rurashan mana tincunchu. Unay Israel runacunawan Tayta Diosninchi parlanacur auninacushanmanpis mana tincunchu. 7Israelcunawan unay parlanacushan alli caycaptin, Tayta Diosninchi yapay parlanacunan mana camacarannachu. 8Unay parlanacushanta runacuna mana çharcuptinmi ichanga, juchanta taripur Tayta Diosninchi niran: Tayta Diosniqui caycä. Imayllapis Israel runacunawan, Judá runacunawan yapay parlanacushaj. 9Yapay parlanacur, mana unay parlanacushänuychu cangapaj. Unay Egipto marcapita jishpichicamur, llapan auquilluyquicunawan parlanacurä. Chaypis shimïta mana çharcuranchu. Mana wiyacamashanpita jaguiycurä. 10Parlanacunä junaj çhayamuptinmi ichanga, llapan Israel runacunawan yapay parlanacushaj. Shungü munashanta tantiyacunga. Shimï shungunman çhayanga. Tayta Diosnin captï, nuwallaman yupachicamanga. Maquïçhu cawanga. 11Llapallanwan alli ricanacushaj. Pampa runacunawanpis, mayur runacunawanpis alli ricanacushaj. Chaymi pipis yawar-masinta, marca-masinta mana ningachu: Tayta Diosninchita ricsichishayqui. 12Llaquipashpä llapan juchanta jungashaj. Juchallicushantapis mana yarparäshänachu. 13Tayta Diosninchi yapay parlanacuypita rimar, unay-caj parlanacushan sumaj mana aypäpacushanta tantiyachimanchi. Unay-caj parlanacushan yarpashannuylla mana aypäpacuptin, jungacaypana aywaycan.

will be added

X\