Hebreos 7

1Melquisedec Salem marcapa mandajnin caran. Cüra cashpan Llapanta Camaj Tayta Diosninchita mañacapuran. Chay wichan auquillunchi Abraham mandajcunata magar ushyariycur cuticamuran. Cuticamuptin, Melquisedec tariparan. Tincur, Tayta Diosninchita mañacapuran: Taytallau Tayta, Abrahamta ima-aycaçhüpis yanapaycullay nir. 2Chaynuy ruraptin, cuyachicuyninta Abraham raquipuran. Marcacunata maganacuyçhu içhipurir, imatapis jiçhupacamushanta çhuncapita jucta-caman Melquisedecta jararan. Rimayninçhu: Melquisedec ninan: Tayta Diosninchi munashallanta ruraj mandaj. Salem ninanna: Allilla cawachicuj mandaj ninan. 3Melquisedecpa maman-taytan pï cashanpis, auquillun pï cashanpis mana musyacanchu. Imay yurishanpis, imay wañushanpis mana musyacanchu. Payga Tayta Diosninchipa Wawanwan tincun. Chaymi cüra cayninpis mana imaypis ushyacangachu. 4Melquisedec sumaj alli ricash caran. Chayçhi unay auquillunchi Abraham cuyachicuyninta çhuncapita jucta-caman jararan. 5Jipatapis Levípa yawar-masincuna cüra cayman çhayar, Moiséspa shimin mayna camacächish caycaptin, imatapis marca-masincunapita mañacuran çhuncapita jucta-caman. Paycuna llapanpis Abrahampa willcancuna caran. 6-7 Melquisedecmi ichanga Levípa yawar-masin mana caycarsi, auquillunchi Abrahampita çhuncapita jucta-caman çhasquiran. Jinarcur alli cawayman çhurar, Tayta Diosninchita mañacapuran: Taytallau Tayta, sumaj yanapaycullay, ari nir. Musyashanchinuypis mayur runa Tayta Diosninchita mañacapun pampa runata sumaj yanapänanpaj. Chaymi Abrahamta Tayta Diosninchi aunish caycaptinsi, Melquisedecman mana tincushachu. Payga Abrahampaj Tayta Diosninchita mañacapuran. 8Levípa yawar-masincuna çhuncapita jucta-caman mañacurpis, wañucuj runalla caran. Melquisedecshi ichanga cawaycanraj. Chayta tantiyacunchi Tayta Diosninchipa shiminçhu wañucushanpita mana rimacuptin. 9- 10 Canancamanpis Levípa yawar-masin cüracuna çhuncapita jucta-caman mañacurcaycan. Mañacurpis, Melquisedecta quiquincunapis jarash caran. Melquisedecta Abraham jaraptin mana yurillaptin, willcan Levícunapis jarash-yupay ricacuran. Chaymi jipataraj yurish carpis, Melquisedecta jarashana caran. 11Levípa yawar-masincuna cüra cayman çhayaran Israel-masincunata Tayta Diosninchiwan tincuchir alli ricanacunanpaj. Mana camäpacuptinmi ichanga, juc casta cüra ricarimunanpaj alli caran. Ichanga mana ricarimushachu Levípa willcancunapita, Aarónpa yawar-masincunapita. Manchäga cüra Melquisedec-jina ricarimunan caran. Ricarimuj cüra sumaj camacächisha Tayta Diosninchiwan alli ricanacunanchipaj. 12Chaura jucpa yawar-masin cüra cayman çhayaptin, Moiséspa shiminpis juc-nirajman ticracäcunan caran. 13- 14 Ricarimuj cüraga caycan Tayta Jesús. Payga mana Levípa willcanchu; manchäga Judápa willcan. Judápa willcancuna cüra cayman çhayananpaj Moisés imaypis mana musyachicuranchu. 15Melquisedec-jina juc cüra ricarimuptin, mana sasachu Tayta Diosninchipa shiminta tantiyacunanchipaj. 16Mushuj cürata mana çhurashachu Levípa yawar-masin cashanpita; manchäga imaycamanpis cawacuj cashanpita. 17Unaypita-pacha Jesúspaj Tayta Diosninchipa shiminçhu nin: Melquisedec-jina cüra cayniquipita imaypis mana llucshinquipächu. 18Chaynuy nir Moiséspa shimin llapanpaj mana aypäpacushanta, chaycamalla cashanta musyachimanchi. Israel-masinchicuna Moiséspa shiminta wiyacuyta munarsi, mana Tayta Diosninchipa shungun munashannuychu cawaran. 19Moiséspa shimin mana sumajchu caran. Mana yarpashannuychu imatapis camacächiran. Chaymi jucpa shiminta çhasquicunanchi caran Tayta Diosninchipa ricay ñawinçhu alli cawananchipaj. Paypa shiminman yupachicunanchi camacan. 20- 21 Cüracunalla cüra cayman çhuranacuptin, Tayta Diosninchi mana rimacuranchu. Jesúspämi ichanga auniran: Cüra cayniquipita mana imaysi llucshinquipächu. Nuwa, Tayta Diosniqui, quiquïpa shimïwan aunishcaj. Shimïta çharcümi nir. 22Chaynuypa ñaupa-caj parlanacushanta jipaçhu jaguisha. Juc parlanacushanmi ichanga sumaj alli. Aunishanta çharcucächinanpäpis quiquin Jesústa çhurasha. 23Unay cüracuna jatinaylla aruran. Juc wañucuptin, jucna yaycuran. 24Jesúsmi ichanga imaypis mana wañungachu. Cüra cayninpis jucpa maquinman mana çhayangachu. 25Mana ushyacaypa cawar, Tayta Diosninchitapis mañacapaycämanchi. Shiminta çhasquicur Tayta Diosninchipa maquinçhu cawayta munaptinchi, quiquin imay-imaycamanpis jishpichimanchi. Mana ushyacaypa cawar, nuwanchi-raycur waran-waran Tayta Diosninchita mañacapaycämanchi. Tayta Diosninchipa maquinçhu cawayta munar Jesúspa shiminta çhasquicuptinchi, quiquin Jesús jishpichimanchi. 26Chay-niraj mayur cüra pishïmaranchi. Jesúsga Tayta Diosninchipa shungunman tincun. Ima juchanpis mana canchu. Imaysi mana juchallicushachu. Juchayuj runacunapa çhaupinpita raquir, Tayta Diosninchi janaj pachaman shuntacuran ñaupallançhu cawacunanpaj. 27Waquin mayur cüracuna quiquinpa juchantawan marca-masincunapa juchanta waran-waran Tayta Diosninchita mañacuran mana imaysi juchancunata yarparänanpaj. Ricay ñawinçhu alli cawayta tarinanpäpis uywacunata pishtarcur jararan. Jesúsmi ichanga wañuyman çhayar, quiquinpa bïdanta Tayta Diosninchita jararan. Juc cutilla jararan imaycamanpis aypäcunanpaj. 28Unay wichan Moiséspa shiminta çharcur mayur cüracunata cargunman çhuraran mañacapamänanchipaj. Chaypis canancaman cargunta sumaj çharcuyta mana camäpacunchu. Cananmi ichanga Tayta Diosninchi çhurashan mayur cüra llapanta çharcun. Wawan cashpan imaycamanpis Tayta Diosninchipa shungun munashannuylla cawan.

will be added

X\