Hebreos 4

1Tayta Diosninchim ichanga aunishanta jinalla shuyaraycächimanchi: Alli cawayçhu jamachishayqui nir. Chaymi llapan shungunchiwan shiminta wiyacushun. Manchäga mana çhayashunpächu. 2Unay auquillunchicunasi nuwanchi-jina Tayta Diosninchipa shiminta wiyaran. Alli willapa caycaptinsi, mana wiyacuranchu. Wiyacujcunawanpis jutucayta mana munaranchu. 3Nuwanchim ichanga alli cawayçhu jamachimänanchita munar, Tayta Diosninchita wiyacunanchi. Payga mayna nisha: Ullgucäcur, nirä: Aunishä çhacraman imaypis mana yaycungapächu. Imaypis jamayta mana taringapächu. Jamaypita rimar, Tayta Diosninchi cay pachata camayta ushyarcur jamashanpita rimaycan. 4Jamay junajpita Tayta Diosninchipa shiminpis nin: Jançhis-caj junajçhu llapallanta camarcur, Tayta Diosninchi jamaycuran. 5Yapaypis Tayta Diosninchipa shimin nin: Jamanä pachaman mana imaypis çhayachishächu. 6Jamana pacha caycashanta tantiyashcanchi. Waquin runacuna çhayan; waquinmi ichanga mana. Tayta Diosninchipa shiminta wiyaycarsi, mana wiyacushanpita mana çhayaranchu. 7Chaymi jamana pachaman yaycuchinanpaj juc junajpaj Tayta Diosninchi jitapuran. Jitapushan junaj canan wichan caycan. Unay Tayta Diosninchi mandaj Davidwan shiminta musyachicur niran: Canan junaj Tayta Diosninchipa shiminta wiyacushun. Shungunchita ama chucruyächishunchu. Ama upa-tucushunchu. 8Unay auquillunchicunata Canaán marcaman Josué pushaptin, alli cawayta mana tariranchu. Jamaytapis mana tariranchu. Chaymi: Alli cawayçhu jamachishaj nirga, Tayta Diosninchi mana rimacunmanchu caran. 9Sumaj tantiyacunquiman. Wawancunapaj Tayta Diosninchi alli cawayta shuyaraycächin. Alli cawayçhu jamanga. 10Chay pachaman çhayar, runacuna mana arunganachu. Manchäga alli cawayllaçhu jamanga. Tayta Diosninchipis cay pachata, janaj pachata camayta ushyarcur, jamaran. 11Jamana pachaman çhayananchipaj llapan shungunchiwan callpachacushun. Upa-rinri runacunapa llupinpa ama jatishunchu. Paycuna mana wiyacushanpita ñacayman çhayaran. 12Tayta Diosninchipa shimin munayniyuj. Cawaj. Ishcanläpa afilash cuchillupitasi mas cuchuj. Runapa shunguncaman çhayan. Imapis mana chapanmanchu. Runa imata yarpashallantapis, imata munashallantapis taripan. Llap-llapanta musyacächin. 13Llapan camashancuna Tayta Diosninchipa ricay ñawinçhu caycan. Llapan pacarashantapis ricaycan. Chaymi ima-imata rurashanchitapis tapumäshunpaj. 14Jesús janaj pachaman ñaupashana. Payga Tayta Diosninchipa Wawan. Mayur cüranchi cashpan mañacapaycämanchi. Chaymi payllaman llapan shungunchiwan yupachicushun. Paypita ama ashucushunchu. 15Mayur cüra carsi, runa cashanchita tantiyamanchi. Paytapis cay pachaçhu purishan wichan juchacachiyta munaran. Ñacachiran. Paymi ichanga juchata mana aparicuranchu. 16Chaymi mayur cüranchi caycaptin, Tayta Diosninchiwan parlayta munar, ama manchacushunchu. Payga llaquipäcuj. Ima ñacayçhu caycaptinchisi, alli shungu. Llaquipämashpanchi sumaj yanapämanchi.

will be added

X\