Hebreos 3

1Irmänucuna, Tayta Diosninchipa acracuynin caycanchi. Maquinçhu puriycächimanchi. Chaymi Jesús pï cashantapis sumaj tantiyacushun. Payta Tayta Diosninchi caçhacamusha. Shiminta çhasquicuptinchi, mayur cüranchi cashpan mañacapaycämanchi. 2Cüra cayninta çharcur, Tayta Diosninchipa shungun munashallanta Jesús ruraran. Moiséspis Tayta Diosninchipa shungun munashallanta ruraran. Tayta Diosninchipa wasinta ricaj-jina marca-masincunata maquinçhu purichiran. 3Moisés alli ricash captinsi, Jesúsman mana tincuranchu. Mä, tantiyacushun. Wasi alli ricash captinsi, wasi rurajta alli rican. 4Llapan wasipis runacuna rurashallan caycan. Chay-jina cay pachatapis, janaj pachatapis Tayta Diosninchi camasha. 5Tayta Diosninchipa wasinçhu arur, mincay-yupay Tayta Diosninchipa shungun munashanta Moisés ruraran. Marca-masincunata Tayta Diosninchi ima-imata nishantapis tantiyachiran. 6Washäcuj Jesúsmi ichanga mana mincaychu. Manchäga Tayta Diosninchipa Wawan cashpan wasinçhu caycan. Nuwanchipis wasi wamrana caycanchi mana yamacällar cushi-cushilla Jesúsman yupachicushpanchi. 7Chaymi Espíritu Santuta wiyacushun. Payga nin: Ima alliraj canman canan junaj Tayta Diosninchipa shiminta wiyacäriptiqui. 8Unay auquilluyquicuna-jina ama chucru shungu canquichu. Ama ticrapäcunquichu. Chaqui pacha quinrançhu purishan wichan paycunapa shungunta musyaparä. Ticrapamar, paycuna maquichacamayta camaran. 9Çhuscu çhunca (40) watantin tucuyçhu yanapaycaptïsi, munayniyuj cashäta ricaycarsi, maquichacamayta camaran. 10Chaymi yamacar nirä: Cay runacuna shungun munashallanta rurar, juchallaçhu cawan. Shungü yarpashanta mana tantiyacunchu. 11Ullgucäcur, nirä: Aunishä çhacraman imaypis mana yaycunquipächu. Imaypis jamayta mana tarichishayquipächu. 12Irmänucuna, sumaj wiyacunquiman. Mayganiquipis ama upa-tucunquimanchu. Ama chucru shungu canquimanchu. Cawaj Tayta Diosninchipita ama witicunquimanchu. 13Manchäga waran-waran Tayta Diosninchipa shiminta wiyacurcaycar shacyächinacunquiman. Canan junajpis juchata mana aparicunayquipaj, nishayqui-nishayqui imatapis mana ruranayquipaj wiyacunquiman. 14Washäcuj Jesúspa shiminta aunishpanchi Tayta Diosninchipa maquinçhu cawashunpaj. Ichanga mana yamacällar yupachicunanchi. 15Chaymi shiminta ama jungashunchu. Paypa shiminçhu nin: Ima alliraj canman canan junaj Tayta Diosninchipa shiminta wiyacäriptiqui. Unay auquilluyquicuna-jina ama chucru shungu canquichu. Paycuna Tayta Diosninchita ticrapuran. 16Auquillunchicuna, ¿maygan-maygantaj Tayta Diosninchita ticrapuran shiminta wiyash caycarpis? Ticrapuran Moisés llapan auquillunchicunata Egipto marcapita jurgamushancuna. 17Auquillunchicuna, ¿maygan-maygantaj çhuscu çhunca watantin (40) Tayta Diosninchita ullgüchiran? Llapan jucha aparicuyllaçhu aruran. Chaymi chaqui pacha quinrançhu wañuptin, ayanpis jitarashançhu jitarpararan. 18Auquillunchicunata, ¿maygan-maygantataj Tayta Diosninchi piñacuran? Llapan auquillunchicunata mana wiyacushanpita mayna Tayta Diosninchi piñacuran: Aunishä çhacraman imaypis mana çhayanquipächu. Jamaytasi mana tarinquipächu nir. 19Payga shiminta çharcun. Mana yupachicushanpita chucru shungucuna jamaytapis mana tariranchu.

will be added

X\