Hebreos 12

1Unaypis chay-chicaj mama-warmicuna, mayur runacuna Tayta Diosninchiman yupachicuran. Nuwanchipis paycunata ricacushun. Imamanpis ama jaticäshunchu. Juchatapis ama aparicushunchu. Ima captinsi, mana yamacällar Tayta Diosninchipa shungun munashanta rurar cawashun. 2Yupachicuyta sumaj yaçhacunanchipaj Jesústapis sumaj ricacushun. Payga Tayta Diosninchiman sumaj yupachicuran. Yupachicunanchipäpis camacächiran. Tayta Diosninchipa ñaupanmanpis çhayachimäshunpaj. Ñacachiptinsi, rusçhu wañuchiptinsi, pingayman çhuraptinsi, cushish çhasquicuran. Alliman çhayananta musyar, mana jishpicuranchu. Chaypita mandäshinanpaj Tayta Diosninchi dirïcha-caj lädunman jamachiran. 3Jesús imanuy-imanuy ñacashantapis ama jungashunchu. Allita ruraptinsi, juchaçhu arujcuna sumaj chiquiparan. Chay-jina chiquipämaptinchipis, ama yamacäshunchu. Jesúspita ama jishpicushunchu. 4Mayganinchitapis mana wañuchimashcanchichu juchata ticrapushanchipita. 5¿Tayta Diosninchipa shiminta jungaycärishcanquichuraj? Shiminçhu anyapämanchi: Wawallau wawa, Tayta Diosninchi tantiyachishuptiqui, ama wasguipanquichu. Piñapäshuptiquipis, ama jagayanquichu. 6Tayta Diosninchi shungunman tincujcunallata piñacun. Wamrachacushancunallata wascan nir. 7Pï runapis wamranta piñacun. Tayta Diosninchipis wamran cashpanchi allipaj piñapämanchi. Chaymi ñacayçhu caycar: Allipaj Tayta Diosninchi piñapaycäman nir çhasquicunchi. 8Tayta Diosninchipis llapan wawanta piñacun. Jucpa churintam ichanga, mana rimapanchu. 9Piñapämaptinchi, mamanchi-taytanchipa shimintapis çhasquicuranchi. Chaymi cawachicuj Tayta Diosninchi piñapämaptinchi, ¿manachu çhasquicushuwan? Au, çhasquicunanchi. Paypita cawaycanchi. 10Mamanchi-taytanchi quiquinpa yarpashanta rurananchipaj piñacamanchi. Tayta Diosninchim ichanga allipaj piñapämanchi quiquin-jina juchaynaj cawananchipaj. 11Piñapämaptinchi, mana cushicunchichu. Manchäga nanämanchi. Wiyacurmi ichanga, alli cawayta yaçhacunchi. Tayta Diosninchipa shungun munashannuypis cawanchi. 12Chaymi ama jutucäcunquichu. Manchäga Tayta Diosninchiman yupachicur shungun munashannuy cawashun. Maquinchi, jungurninchi uticash captinsi, callpachacushun. 13Maypa aywananchipäpis wicsu caminucunata allchashun wijrucuna mana tuninanpaj. Chaymi shungun munashannuy cawaptinchi, Tayta Diosninchipita witiycaçhajcunapis mana witicungachu wijru runa tunishan-jina. Juchamanpis mana tuningachu. Manchäga allillana cawanga. 14Llapanwan allilla ricanacunqui. Tayta Diosninchipa shungun munashallanta ruranqui. Manchäga Tayta Diosninchiwan pipis mana tincungachu. 15Tayta Diosninchi llapan runata llaquipan. Chaymi llapan runata alli ricanquiman. Pitapis ama jagayächinquimanchu. Jagayächiptiqui, paypis waquinniquicunata jagayächinga. 16Esaúpa llupinpapis ama jatinquichu. Payga warmi-paçha caran. Tayta Diosninchitapis mana manchapacuranchu. Tayta Diosninchi jichpacunata alli rican. Niycaptinsi, paçhanpaj pishiptin, juc mati micuyllapaj jichpa cayninta Esaú ranticuycuran. 17Jinarcur, jichpa cayninta çhasquinanpaj wiguinpawanraj taytanta mañacuran. Çhasquinanmi ichanga mana camacaranchu. 18Unay auquillunchicuna Sinaí puntallaçhu Tayta Diosninchiwan tincuran. Manchariypaj warauyaypa-warauyar nina ratacurcuran. Juyupa chacacäcuran. Shucucuy wayra içhicurcuran. 19- 20 Curnïta tututuylla suynaran. Tayta Diosninchipa shiminpis sumaj wiyacaran. Chaura auquillunchicuna niran: Taytallau Tayta, ama rimamuynachu. Shimiquita wiyayta manchacurcaycä. Tayta Diosninchi nish caran: Cay puntaman çhancamujta runatapis, uywatapis sajmayllapa wañuchinqui. 21Llapanpis manchariypaj captin, Moiséspis niran: Manchacü. Janäcunapis jutucäcuycan. 22Jamcunam ichanga Sión puntaman, janaj pachaçhu Jerusalén marcaman çhayashcanqui. Chay marcaga cawaj Tayta Diosninchipa marcan. Wasinçhu yupaysi mana atipaypaj anjilcuna cushish fiestata rurarcaycan. Tayta Diosninchita alliman çhurarcaycan. 23Tayta Diosninchipa jichpa wamran-yupay cushi-cushilla fiestata rurarcaycan. Jutiquicunapis janaj pachaçhu apuntaraycan. Tayta Diosninchipa ñaupanman çhayashcanqui. Payga llapan runapa shungunta musyapan. Maquinçhu cawaj runacunapa almanwanpis tincushcanqui. 24Jesúswanpis tincushcanqui. Juc parlanacuypita parlapaycämanchi. Chaypämi nuwanchi-raycur wañuyman çhayasha. Yawarninwan juchanchita illarachisha. Tayta Diosninchi alli ñawinwan ricamänanchipäpis mañacapuycan. Abel wañushanmi ichanga Caín ñacananta mañacuycan. 25Chaymi Tayta Diosninchipa shiminta wiyar, ama upa-tucushunchu. Unay auquillunchicuna cay pachaçhu Tayta Diosninchipa shiminta wiyaran. Mana wiyacuptinmi ichanga, unyanta cutichinanpita pipis mana jishpiranchu. Cananga janaj pachapita Tayta Diosninchipa shiminta wiyarcaycanchi. Paypa shiminta mana wiyacur, ¿jishpishuwanchuraj? 26Auquillunchicunata Sinaí puntaçhu willapaptin, cay pachata tapsichisharaj. Canan wichanpäpis Tayta Diosninchi nin: Yapay cay pachata tapsichishaj. Janaj pachatapis tapsichishaj. 27Yapay tapsichishaj nirga, llapan camashancunata illarachinanta musyachimanchi. Tayta Diosninchipa wasinmi ichanga mana ushyacangachu. 28Tayta Diosninchipa maquinçhu cawaycar, nuwanchipis mana ushyacäshunchu. Chaymi Tayta Diosninchita alliman çhurashun. Shungun munashallanta rurashun. Manchapacushun. 29Manchäga ushyaramäshuwan. Tayta Diosninchiga warau-warauyaycaj nina-yupaymi.

will be added

X\