Hebreos 1

1Unay wichan Tayta Diosninchi shungun munashanta sumaj musyachicuran. Unay auquillunchicunata achca cutipa, tucuy-jinanpa willacujnincunawan musyachicuran. 2- 3Canan wichanmi ichanga Wawanwanna shungun munashanta musyachimashcanchi. Paywanmi Tayta Diosninchi llap-llapanta camaran. Llapan camashancunata Wawanpa maquinman çhurasha. Quiquishllan cashpan Tayta Diosninchipa shungun yarpashantapis musyachimanchi. Payga sumaj munayniyuj. Janaj pachapis, cay pachapis maquinçhu caycan. Paypa shiminta llap-llapan wiyacun. Llapan runapa juchanta Tayta Diosninchi mana imaysi yarparänanpaj nuwanchi-raycur rusçhu wañuran. Jinarcur janaj pachaman cuticur, Tayta Diosninchita mandäshinanpaj dirïcha-caj lädunman jamacuran. 4- 5Tayta Diosninchi Wawanta sumaj alli ñawinpa rican. Wawanman anjilcuna mana tincunchu. Anjilcunata maygantapis mana wamrachacuranchu. Wawanta ricsichicurmi ichanga, Tayta Diosninchi niran: Wawämi canqui. Nuwapita cawanqui. Maygan anjiltapis mana musyachiranchu: Taytayqui cashaj. Wawä canqui nir. 6Manchäga japallan Wawanta ricsichicur, Tayta Diosninchi niran: Llapan anjilnïcuna Wawäta manchapacur alliman çhuranman. 7Anjilcunapaj musyachicur niran: Anjilcuna caçhä cashpan wayra-jina shimïta purichinga. Nina-jina shungü munashanta ruranga. 8Wawanpämi ichanga niran: Taytallau Tayta, munayniyuj cayniquiga mana imaypis ushyacangapächu. Maquiquiçhu cawajcunatapis allilla cawachinqui. 9Jucha aparicuyta wasguipashcanqui. Imatapis rurar, Tayta Diosninchipa shungun munashannuylla cawashcanqui. Chaymi runa-masiquicunapita jamllata acracushcaj. Cushi-cushilla cawanayquipaj camacächishcä. Nuwalla Tayta Diosniqui cä. 10Tayta Diosninchipa shiminçhu juctapis nin: Taytallau Tayta, manaraj imapis captillan, cay pachata camarayqui. Janaj pachatapis maquiquiwan rurarayqui. 11Llapan camashayquicuna ushyacangapaj. Quiquiquim ichanga imaysi mana ushyacanquipächu. Janaj pachawan cay pacha müdana-jina maucayangapaj. 12Mauca müdanata-jina lluyllurinquipaj. Müdanata rucaycaj-jina rucarinquipaj. Quiquiquim ichanga mana rucacanquipächu. Imaysi mana ushyacanquipächu. 13Maygan anjiltapis Tayta Diosninchi mana niranchu: Dirïcha-caj lädüman jamacuy cunçharyuyquicunata pampaman çhurashäcaman. 14Payga anjilcunata caçhacaycämun mandunta rurananpaj, shiminta çhasquicujcunata ricananpaj. Çhasquicujcunata Tayta Diosninchi jishpichinga.

will be added

X\