1 Washäcuj Jesús jishpichimashcanchi Tayta Diosninchipa shungun munashannuylla cawananchipaj. Chaymi shimillanta wiyacushuwan. Moiséspa shimillanman ama yupachicushuwannachu. Paypa shimin maquichacush-yupay charämaranchi. 2 Sumaj wiyacushun. Jïrucunquiman nishuptiqui aunirga, Washäcuj Jesústapis pampaman çhurarcaycanqui. 3 Mana jïrucushallanchipitachu Tayta Diosninchi alli ricamäshun; manchäga Moiséspa shiminta llap-llapanta çharcuptinchiraj. Ichanga sumaj çharcuyta pipis mana camäpacunchu. 4 Chaymi çharcuyta camaj-tucujcuna Washäcuj Jesústa pampaman çhuraycan. Llaquipäcuj Tayta Diosninchitapis wasguipaycan. 5 Jesúspa shiminta çhasquicushanchipitam ichanga Tayta Diosninchi alli ricamanchi. Çhasquicunanchipaj quiquin Espíritu Santu yanapämanchi. Canan alli cawayta shuyaraycanchi. 6 Washäcuj Jesústa wiyacuptinchi, jïrucush cashanchipis, mana jïrucush cashanchipis mana imananchu. Jesúspa shiminta çhasquicushcä nirga, runa-masinchitapis alli ricashuwan. 7 Chaura Jesúspa maquinçhu alli cawaycaptiqui, ¿pitaj llullapashcashunqui ashucunayquipaj? 8 Chayta Tayta Diosninchi mana camacächinmanchu caran. Payga wamrachacamashcanchi. 9 Pantachicujcuna allita rimarcushanchitapis llapanta pampaman çhuran. Rimaypis purin: Libadüra ichiclla arinatapis achcamanshi jacachin nir. Juc runa juchata aparicuptinpis, achcaj llupinpa aywan. 10 Jamcunatam ichanga maquinçhu Tayta Diosninchi puriycächishunqui. Chaymi shimïta tantiyacunquiman. Juc shimiyäshuptiquipis, ama çhasquipanquimanchu. Pantachicujcunata Tayta Diosninchi sumaj ñacachinga. 11 Irmänucuna, Israel-masïcuna chiquiman: Ama jïrucuynachu nir willapäcushäpita. Allipaj jïrucunchi niptïmi ichanga, mana chiquimanmanchu. Jïrucunanchi alli nirga, nuwanchi-raycur rusçhu wañuchish caycaptin, Washäcuj Jesústa pampaman çhuranchi. 12 Chay pantachicujcunam ichanga purircaycan: Jïrucushunraj Tayta Diosninchi alli ricamänanchipaj nir. Chaymi nï: Jïrucuyta munar, quiquincuna capacurinmanpis. 13 Irmänucuna, mana runapa maquinçhünachu puriycanchi. Chaypis shungunchi munashanta ama rurashunchu. Manchäga jucninchi-jucninchipis llaquinacushun. Yanapänacushun. 14 Tayta Diosninchipa shimin nin: Quiquiqui alli ricacushayqui-jina runa-masiquitapis alli ricanquiman. Llaquinacushpanchi Tayta Diosninchipa shiminta llapanta çharcuycanchi. 15 Çhapçhupänacurmi ichanga, ticshaparänacurmi ichanga, mashtacar ushyacanquipaj. Chayman ama çhayanquimanchu. 16 Chaymi Espíritu Santupa maquinçhu cawashun. Shungunchi munaptinsi, juchata ama rurashunnachu. 17 Tayta Diosninchipa shungun munashanwan shungunchi munashan sumaj apaycaçhänacun. Chaymi shungunchi munashallanta ama rurashunchu. 18 Espíritu Santupa maquinçhüna cawaycanchi. Chaymi ama nishunchu: Tayta Diosninchi alli ricamänanchipaj Moiséspa shimintaraj llapanta çharcushun. 19 Shungun munashallanta rurajcuna ricsipayllam. Paycuna jucwan-jucwan puricun. Warmillata, runallata munapan. Imata rurarpis, mana pingacunchu. 20 Tayta Diosninchita mana manchapacur, jircacunata manchapacun. Chapata rurar, jircata jaran. Chiquicun. Çhapçhupänacun. Yargaj. Imallapitapis alläpa warmin. Alläpa ullgun. Piwanpis ticshaparänacun. 21 Imapitapis jagayan. Upyallaçhu arun. Paçhallanta ashir purin. Sumaj tantiyacunquiman. Mayna willapashcaj. Chay-niraj runacuna mana Tayta Diosninchipa maquinçhüchu cawan. Irinsantapis mana çhasquingapächu. 22 Espíritu Santupa maquinçhu cawarmi ichanga, llaquipänacunchi. Cushi-cushilla purinchi. Jaucalla cawanchi. Tantiyanacunchi. Alli shungu canchi. Manchapacur cawanchi. Rimashanchita çharcunchi. 23 Cuyapänacunchi. Shiminchita chapacunchi. Chaynuy cawaptinchi, pipis mana imatapis jurgapämäshunchu. 24 Washäcuj Jesúspa maquinçhu cawajcuna quiquinpa shungun munashanta mana ruranchu. Jucha aparicuytapis mana yarpanchu. 25 Espíritu Santupa maquinçhu cawar, shacyächimashanchita rurashuwan. 26 Ama alli-tucushunchu. Ama jagayächinacushunchu. Ama chiquinacushunchu.
