GÁLATAS 2

1Chaypita çhunca çhuscuwan (14) watataraj Jerusalén marcaman Bernabíwan Tituwan cutirä . 2Tayta Diosninchi ricaripamar: Ayway nimaptin, Jerusalén marcaman aywarä. Israel-masï irmänucunata willarä: Jäpa runacunata Jesúspa alli willapanta willapashcä nir. Mayur irmänucunatapis yata jayaycur, allipaj willacur purishäta willaparä. Çhasquicamänanta munarä. 3Chay junaj griego runa car jïrucüni captinsi, Tituta mana jïrucachiranchu. Payga Jerusalén marcaman aywäshimaran. 4Waquin runacunam ichanga irmänu-tucullar pantachicuycaran. Chaymi mayur irmänucunawan sumaj parlanacurä. Chay pantachicujcuna Washäcuj Jesúspa maquinçhu cawaptinchisi, Moiséspa shimintaraj çharcunanchita munan. 5Ichanga pantachimänanchipita shiminta ama çhasquipäshuwanchu. Manchäga Jesúspa alli willapällanta çhasquicushuwan. 6Parlanacuptïpis waquin mayur irmänucuna sumaj yaçharpis, yarpashäpita mana imatapis rimacushanachu. Sumaj tantiyacushuwan. Shungunchipitam Tayta Diosninchi alli ricamanchi; mana runa yarpashancunata çharcushanchipitachu. 7Mayur irmänucuna quiquincuna niran: Tayta Diosninchi Pabluta çhurasha jäpa runacunata Jesúspita willapänanpaj; Pedrutana Israel runacunata willapänanpaj. 8Chaura Israelcunata willapänanpaj Pedruta caçhacushan-jina nuwatapis Tayta Diosninchi caçhacamasha jäpa runacunata Jesúspa shiminta willapänäpaj. 9Chaymi Santiagupis, Pedrupis, Juanpis nimaran: Juc shungulla cawashun. Jamcunapis Tayta Diosninchipa caçhan carcaycanqui. Bernabíwan ishcaniqui jäpa runacunata willapämunqui, ari; nuwacunana Israel-masinchicunata. Paycuna quimsanin mayur caçhacuna caran. Maquinçhu jutucaj irmänucunata purichiran. 10Rimayta ushyaycur, nimaran: Jerusalén marcaçhu irmänunchicuna pishipaycuyçhu juyarcaycan. Paycunata ama junganquichu, ari. Mañacamashanta llapanta cushi-cushilla çharcushcä. 11Chaypita unayllata Antioquía marcaman Pedro çhayamuptin, piñaparä. Mana allitachu ruraycaran. Ishcay cära runa caran. 12Ñaupataga jäpa irmänucunawan micupacärij. Santiago caçhamushan Israel irmänunchicuna çhayamuptinmi ichanga, ashucuriran. Juturaytapis mana munaranchu. Israel-masincuna jamurpänanta alläpa manchacuran. Chaymi jäpa runacunawan mana juturarannachu. 13Waquin Israel irmänunchicunapis Pedro-jina quiquin-pura alli ricanacuyta munar, jäpa irmänunchicunapita ashucuriran. Bernabípis Pedro rurashanta ricar, llutanta ruraran. 14Chaymi Jesúspa alli willapanta mana çharcuptin, llapanpa ricay ñawinçhu Pedruta piñacurä: Israel runa caycar jäpa irmänucunawan alli ricanacur, micur upur juturpashcanqui. Cananmi ichanga jäpa irmänucunapis Israel runacuna-jina cawananta munaycanqui, ¿au? Llutanta ruraycanqui nir. 15Jäpa runacuna Moiséspa shiminta mana ricsir, mana wiyacunchu. Nuwanchim ichanga Israel runacuna cashpanchi yurïninchipita-pacha wiyacushcanchi. 16Chaypis mana Moiséspa shiminta çharcushanchipitachu alli ñawinpa Tayta Diosninchi ricamanchi; manchäga Washäcuj Jesúspa shiminta çhasquicushanchipita. Mana Moiséspa shiminta wiyacushanchipitachu alli ñawinpa ricamanchi; manchäga Washäcuj Jesúspa shiminta çhasquicur maquillançhu cawashanchipita. Moiséspa shiminta çharcuyta munajcuna Tayta Diosninchipa shungunman mana tincunchu. 17-18 Washäcuj Jesúspa shiminta çhasquicushanchipita Tayta Diosninchi alli ricamaptinchisi, waquin Israel-masinchicuna jamurpämanchi: Washäcuj Jesúspa llupillanpa jatir, juchata aparicuycanqui nir. Jamurpämashpanchisi llutanta yarpaycan. Juchaman mana Jesúschu jançhamanchi. Moiséspa shimillanta wiyacuyta munaptinchim ichanga, jucha-sapa cashanchita llapan musyanga. 19Moiséspa shimin allitaga allim. Chaypis çharcuyta mana camäpacur, Tayta Diosninchipa ricay ñawinçhu jucha-sapa caycä. Chaymi Moiséspa shimillanman mana yupachicüchu. Manchäga Washäcuj Jesúspa shimintana wiyacuycä. Maquinçhu cawar, shungun munashanta rurä. 20Cananga mana shungü munashantachu ruraycä. Mana quiquilläpitachu cawaycä. Manchäga Washäcuj Jesúsman yupachicuptï, cawachiman. Llaquipämashpanchi washämänanchi-raycur Tayta Diosninchipa Wawan wañuytapis tarisha. 21Chaymi Tayta Diosninchi llaquipämashanta pampaman mana çhurämanchu. Jamurpämajcuna nin: Moiséspa shiminta çharcuptinchiraj, Tayta Diosninchi alli ricamanchi. Chaynuy nir nuwanchi-raycur Washäcuj Jesús wañushantapis manacajman çhurarcaycan.

will be added

X\