GÁLATAS 1

1- 2 Galacia quinran marcacunaçhu jutucaj irmänucuna, nuwa Pablo, Tayta Diosninchipa caçhan cashpä waquin irmänunchicunawan-ima cartacallämü. Nuwata Washäcuj Jesúswan quiquin Tayta Diosninchi çhuramasha shiminta willapäcur purinäpaj. Tayta Diosninchi Jesústa cawarachijmi. Paycuna acracamasha; mana runa-masinchichu. 3Tayta Diosninchipis, Tayta Jesucristupis llaquipayculläshunqui. Maquinçhu allilla puriycachilläshunqui, ari. 4Cay pachaçhu jucha mana pishinchu. Chaypis Tayta Diosninchi camacächiptin, Washäcuj Jesús wañuyta tarisha juchata aparicushanchipita jishpichimänanchipaj. 5Tayta Diosninchi munayniyujmi. Payllata llapan runa imaycamanpis alliman çhuranman. Chaynuy caycullächun. 6Irmänucuna, Tayta Diosninchi llaquipämashpanchi maquinçhu cawananchi-raycur Washäcuj Jesústa caçhamusha. Chaymi: Galacia marca irmänucuna Jesúspa shiminta çhasquicurpis, Tayta Diosninchita wasguipaycan nimaptin, tantiyacuyta mana atipächu. ¿Piraj shimiyashcashunqui jucpa shiminta çhasquicunayquipaj? 7Jesúslla Washäcuj. Juc mana canchu. Chaypis pantachicujcuna llutanta willapashcashunqui Jesústa ticrapunayquipaj, shimintapis wasguinayquipaj. 8Pipis Washäcuj Jesústa pampaman çhurar: Moiséspa shimintaraj çharcushun nir yaçhachicurga, ñacayman çhayachun. Llutanta rimaptin, willacuj-masïcunatasi, anjilcunatasi chacaj pachaman Tayta Diosninchi jitarpunga. 9Mayna piñacushcaj. Chaymi sumaj wiyacäriy. Pipis jucpa shiminta willapar Washäcuj Jesúspa shiminta ticrapur, ñacayman çhayangapaj. 10Mä, tapushayqui. ¿Piwantaj alli ricanacuyta munanqui: Tayta Diosninchiwanchu, runa-masiquiwanchu? Runacuna alli ricamänanta mana ashïchu. Manchäga Tayta Diosninchi alli ricamänanta munä. Chaymi maquinçhu cawar, Washäcuj Jesúspa shimintapis wiyacü. 11Irmänucuna, mana runa yarpashallantachu willacur puriycä; manchäga Jesúspa alli willapanta. 12Mana runachu Washäcuj Jesúspa shiminta willamasha. Manchäga quiquin Jesúswan tincushcä. Ricaripamasha. 13Ñaupata Israel-masïcuna cawashannuylla cawarä. Jutucaj irmänucunatapis jaticaçhar ushyarä. Llapanta illarachiyta munarä. 14Israel runacuna yarpashanta wiñay-masïcuna janan shungulla çharcuptinsi, llapan shungüwan çharcurä. Auquillücuna yaçhachimashantapis mana juctapis jungarächu. 15- 16 Ima-niraj captïsi, llaquipäcuj cashpan mana yuriptillä, Tayta Diosninchi acracamasha Wawan Jesústa ricsicunäpaj, jäpa runacunatapis willapänäpaj. Jesústa ricsichimaptin, pï runatapis mana ashishcächu Tayta Diosninchipa shiminta tantiyachimänanpaj . 17Jerusalén marcaçhu punta-caj caçhancuna juturaptinsi, mana tapucuj aywashcächu; manchäga Arabia quinranman aywashcä. Chaypita Damasco marcaman cuticushcä. 18Chaypita quimsa watataraj Jerusalén marcaman Pedruwan tincuj aywashcä. Tincur, ishcay simänalla juyapärirä. 19Jerusalén marcaçhu mana llapan caçhacunawanchu tincushcä; manchäga Jesúspa wauguin Santiagullawan. 20Irmänucuna, cartacur rasullanta willapaycaj. Tayta Diosninchipis musyan. 21Jerusalén marcapita Siria quinranmanpis, Cilicia quinranmanpis aywashcä. 22Judea quinrançhu jutucaj irmänucunam ichanga mana ricsimashachu. Paycunawan mana tincushcäpishchu. 23Chaypis nuwapaj rimaran: Unayga chay runa jaticaçhar ushyamashcanchi. Cananmi ichanga Jesúspa shiminta willapäcur puriycan nir. 24Juyu cashäpita Tayta Diosninchi alli cayman ticrachimaptin, paycuna Tayta Diosninchita sumaj alliman çhurarcaycan.

will be added

X\