Efesios 4

1Jesúspa shiminta willapäcushäpita wiçhgaraycächiman. Chaypis Tayta Diosninchipa maquinçhu cawar, juc shungulla cawanquiman. Chaynuy cawanayquipaj Tayta Diosninchi acracushcashunqui. 2Chaymi ama alli-tucunquimanchu. Manchäga alli shungulla cawapäcunquiman. Pampamanpis ama çhuranacärinquichu. Llaquipänacushpayqui tantiyanacärinquiman. 3Jucniqui-jucniquipis alli ricanacärinquiman. Espíritu Santupa maquinçhu cawar, piwanpis juc yarpaylla cawapäcunquiman. 4Jesúspa shiminta çhasquicushanchipita juc shungullana carcaycanchi. Espíritu Santupis jucnaylla. Llapanchisi Tayta Diosninchi aunishallanman yupachicunchi. 5Taytanchi Jesúspis jucnayllam. Paypa shimillanta çhasquicushcanchi. Llapanchipis juc cutilla ushyacushcanchi. 6Jucnayllam Tayta Diosninchi. Paypita llapanchi cawanchi. Llapanchita maquinçhu charämanchi. Maquinçhu purichimanchi shungun munashanta rurananchipaj. Llapanchi wamran caycanchi. 7Yaçhaytam ichanga Washäcuj Jesús camapämanchi shungun yarpashanman-tupu ima-imatapis rurananchipaj. 8Tayta Diosninchipa shiminçhüpis nin: Juc runapa maquinpita achcajta jiçhusha. Punta jananman pushasha. Waquin runacunata imatapis jarasha. Yaçhaytapis camapusha. 9¿Imanirtaj: Punta jananman aywasha nin? Punta jananman aywasha nishanga tincun janaj pachapita chacaj pachaman Jesús yarpamushanwan. 10Janaj pachapita yarpamujga janaj pachaman yapay cuticusha llap-llapanta maquinçhu purichinanpaj. 11Paymi waquinta yaçhayta camapusha shiminta willacuj caçhananpaj, waquintana Tayta Diosninchipa shungun yarpashanta willacunanpaj, waquintana Jesúspita willapäcur purinanpaj, waquintana irmänucunata ricananpaj, waquintana Tayta Diosninchipa shiminta tantiyachicunanpaj. 12Llapantapis çhurasha Washäcuj Jesúspa shiminta sumaj-sumaj tantiyachimänanchipaj. Tantiyachimäshunpaj Jesúspa shungun munashallanta rurar cawananchipaj. Paypa maquillançhu juc shungulla cawananchita sumaj munan. 13Tayta Diosninchipa Wawan Jesúspa shungun yarpashanta tantiyämi. Shiminta çhasquicushcämi nirga, juc shungulla cawayta yaçhacushuwan. Washäcuj Jesús Tayta Diosninchipa shungun munashannuy cawashan-jina nuwanchipis paypa shungun munashannuylla cawashuwan. 14Chaymi sapu wamracunata-jina pipis mana riguichicamäshunpächu. Waquin runa shungun munashallanta yaçhaycächin. Tucuy-jinanpa runacunata riguiycächin. Paycuna wayra wacman-cayman imatapis apashan-jina jucta-jucta willapar munashanta llullapämanchi. 15Nuwanchim ichanga Tayta Diosninchipa shiminta sumaj tantiyacushun. Llaquipänacushun. Maquillançhu cawananchipaj waran-waran Tayta Jesucristu pï cashantapis tantiyacushun. Paypitam cawanchi. 16Yata-yata cawaptinchipis, juc-niraj-juc-niraj captinchisi, juc shungulla cawananchipaj pay camacächin. Yaçhayta camapamashanchiman-tupu imatapis rurar, llapanchi alli ricanacunchi. Llaquipänacunchi. Jesúspa maquinçhu cawar, juc shungullana llapanchi cawanchi. 17Tayta Jesús nimashannuylla willapashajta ama junganquichu. Juchaçhu aruj runacuna-jina ama cawanquichu. Paycuna Tayta Diosninchita mana manchapacur, cawashanpa cawacärin. 18Jucha aparicuyllata yarpan. Imatapis mana tantiyacunchu. Chucru shungu. Chaymi Tayta Diosninchipa shiminta mana wiyacunchu. Maquinçhüpis cawayta mana munanchu. 19Manchapacuyta mana yaçhar, mana pingacullar allgu-jina jucwan-jucwan cacun. Jucwan-jucwan mana cacushancaman jamaytapis mana tarinchu. 20Chay rurashancuna Washäcuj Jesúspa shiminwan mana tincunchu. 21Shiminta wiyashcanquim. Çhasquicushcanquim. Shungun munashanta rurar cawanayquipaj willapashcashunqui. Willapäshushayqui Jesúspa shiminwan tincun. 22Willapashcashunqui unay cawashanchi-jina juchata mana aparicunayquipaj. Unay juchallaçhu aruptinchi, wañuy jananchiçhu caycaran. 23Cananmi ichanga willapämashcanchi Tayta Diosninchipa shungun munashallanta shungunchiman çhuracunanchipaj. 24Chaymi ima juchatapis ama rurashunnachu. Manchäga Tayta Diosninchipa maquillançhu cawashun. Payga camamashcanchi shungun munashallanta rurar cawananchipaj, runa-masinchiwan allillata rurar cawananchipaj. 25Jesúspa maquinçhu cawaycarga, ama llullapänacushunchu. Manchäga rasun-cajllata pï-maywanpis rimashun. 26Warmirpis ullgurpis, juchata ama aparicunquichu. Warmishalla, ullgushalla ama juyanquichu. Manchäga chay junajlla ushyacächinquiman. 27Mana ushyacächiptiqui, jucha aparicuyman supay jançhashunquipaj. 28Suwa carga, ama suwacunquinachu. Manchäga imapis mana pishïshunayquipaj sumaj arunquiman. Arucuptiqui, pishipacujcunata tarichinayquipäpis aypanga. 29Runapa washantapis ama rimanquichu. Manchäga alli shimillayquipa imatapis tantiyachinquiman. Allita rimaptiqui, llaquipäcuj cashayquita tantiyacunga. 30Runa-masiquita jagayächirmi ichanga, Espíritu Santutapis jagayächinqui. Chayta ama rurashunchu. Tayta Diosninchi Espíritu Santuta caçhamusha maquinçhu purichimänanchipaj. Maquinçhu cawaptinchi, Tayta Diosninchi jishpichimäshunpaj cay pacha ushyacaptin. 31Chaymi ama ticshaparänacunquichu. Ama jagayächinacunquichu. Ama chiquinacunquichu. Ama ashllinacunquichu. Jucpa washashantapis ama rimanquinachu. Ima juchatapis ama ruranquinachu. 32Manchäga alli ricanacur yanapänacunquiman. Llaquipänacur tantiyanacunquiman. Imasi captinga, juclla ushyacächinquiman. Washäcuj Jesúspa shiminta çhasquicuptinchi, Tayta Diosninchipis llapan juchanchita jungasha. Mana yarparannachu.

will be added

X\