1 Nuwata wiçhgaraycächiman jamcunata Washäcuj Jesúspa shiminta willapashä-janan. 2 Chayta mayna musyanqui. Jäpa runa captiquisi jamcunata llaquipar, Tayta Diosninchi caçhacamasha shiminta willapäcunajpaj. 3 Quiquin tantiyachimaptin, Tayta Diosninchi yarpashanta tantiyacushcä. Tantiyachimashanpita mayna cartacamushcaj. 4 Cartäta liguir, Washäcuj Jesús yarpashanta sumaj musyashäta tantiyacunquipaj. 5 Unayga Tayta Diosninchi shungun yarpashanta pitapis mana musyachishachu. Cananraj acracushan caçhancunawanpis, willacujnincunawanpis Espíritu Santu Tayta Diosninchipa shungun yarpashanta musyachicusha. 6 Sumaj tantiyacushuwan. Washäcuj Jesúspa shiminta çhasquicur, jäpa runacunapis Tayta Diosninchipa wawanna caycan. Israel runacuna-jina Tayta Diosninchi aunishan irinsatapis çhasquinga. Washämänanchi-raycur Jesús wañuyman çhayashanpita llap-llapanchim çhasquishunpaj. 7 Llaquipämar, Tayta Diosninchi çhuramasha shiminta willapäcur purinäpaj. Mana quiquïpitachu willapäcur puriycä. Manchäga munayniyuj cashpan Tayta Diosninchi çhuramasha. 8 Washäcuj Jesús sumaj alli. Tucuy-jinanpa yanapämashanchitapis tantiyayta mana atipanchichu. Nuwaga jipataraj paypa shiminta çhasquicushcä. Chaypis llaquipämashpan Tayta Diosninchi çhuramasha jäpa runacunata Jesúspa shiminta willapänäpaj, 9 unaypita-pacha Tayta Diosninchi yarpashanta tantiyachinäpaj. Paymi llapan ricashanchicunatapis camasha. 10 Cananga jutucaj irmänucunata ricar, anjilcunapis, supaycunapis Tayta Diosninchi sumaj yarpay-sapa cashanta tantiyacunga. 11 Tayta Diosninchi unaypita-pacha yarparashanta camacächisha jishpichimänanchi-raycur Taytanchi Jesucristu ricarimuptin. 12 Canan paypa maquinçhu cawar, llapan shungunchiwan Tayta Diosninchita imatapis mañacunchi. 13 Chaymi Jesúspita jamcunata willapaptï ñacachimaptin, ama llaquicunquichu. Manchäga jatunpa cushicärinquiman. 14 Llapan runata Tayta Diosninchi llaquipashanta musyar, jungurpacuycur jamcunapaj mañacü. 15 Paypa maquinçhu cawan janaj pachaçhu cawajcunapis, cay pachaçhu cawajcunapis. Llap-llapanta quiquin cawachin. 16 Tayta Diosninchi sumaj munayniyuj. Llaquipäcuj. Chaymi payta mañacü Espíritu Santuwan shacyächishunayquipaj. Espíritu Santu Tayta Diosninchipa shiminta shunguyquiman çhayachin pay munashannuy cawanayquipaj. 17 Chaynuypis mañacü Washäcuj Jesúspa shimin shunguyquiman çhayaptin, maquinçhu cawanayquipaj, quiquiqui-pura sumaj llaquipänacärinayquipaj. 18 - 19 Chayraj Washäcuj Jesús sumaj llaquipäcuj cashanta tantiyacushunpaj. Tayta Diosninchipa wawan captinchi, mayganinchitapis mana jungamanchichu. Llaquipämashanchitapis sumaj tantiyayta mana atipanchichu. Chaypis jamcunapaj mañacü llaquipäcuj-cashan shunguyquiman çhayananpaj. Mañacü Tayta Diosninchipa maquillançhu cawanayquipaj. Pay alli shungu cashan-jina nuwanchipis alli shungu cashuwan. 20 Canan Tayta Diosninchita alliman çhurashun. Payga sumaj munayniyuj. Mañacushanchipitapis mas-masraj yanapämanchi. 21 Washäcuj Jesúspa shiminta çhasquicur jutucaj irmänucuna llap-llapanchi Tayta Diosninchita alliman çhurashun. Payllam imay-imaypis munayniyuj. Chaynuy caycullächun.
