Colosenses 4

1Piyunta mincacuj irmänucuna, mincayniquicunata alli ricanquiman. Jamcunapis Tayta Diosninchipa maquinçhu cawarcaycanqui. Payga llapanchita ricaycämanchi. 2Irmänucuna, llutalla ama cawacunquichu. Manchäga Tayta Diosninchita mañacur cawanquiman. Imaman çhayaptiquipis, cushicärinquiman. 3Washäcujpa shungun yarpashanta willapäcunäpaj nuwacunapäpis mañacunqui, ari. Jishpichimänanchipaj willacushäpita runacuna wiçhgaraycächiman. 4Llapan runata sumaj tantiyachinäpaj mañacunqui, ari. 5Mana yupachicujcunapa ricay ñawinçhüpis cuyay-munaypaj cawashun. Jäcurpis, mana jäcurpis, Tayta Diosninchipa shiminta willapäcunqui. 6Pitapis mana nanächipällar willacunqui, ari. Imata tapushuptiquipis, alli shimillayquipa tantiyachinqui. 7Imanuy cawashätapis willashunayquipaj yaçhänacushä irmänunchi Tíquicuta caçhaycämü. Payga Washäcuj Jesúspa mandunta ruran. Washäcujpa shiminta willacuptïpis, willacäshimasha. 8Chaymi imanuy juyarcaycashäta willashunayquipäpis, sumaj shacyächishunayquipäpis caçhaycämü. 9Tíquicutawan-ima marca-masiqui Onésimutapis caçhaycämü. Paycuna imanuy carcaycashätapis willashunquipaj. Onésimuwanmi sumaj yaçhänacü. Payga Tayta Diosninchita sumaj wiyacun. 10Carsilçhu wiçhgaraj-masï Aristarcupis wamayäshunqui. Bernabípa yawar-masin Marcospis wamayäshunqui. Marcos imata rurashantapis musyanqui. Chaymi çhayamuptin, alli ricanqui, ari. 11Jesús jutiyuj Justupis wamayäshunqui. Israel casta irmänunchicuna quimsajlla Tayta Diosninchipa shiminta willacuptï, yanapämasha. Sumaj shacyächimasha. 12Marca-masiqui Epafraspis sumaj wamayäshunqui. Payga Washäcuj Jesúspa mandunta ruran. Jamcunapäpis Tayta Diosninchita mañacun: Colosas irmänucunata yanapaycullay, ari. Yarpashayqui shungunman çhayachun. Munashallayquita rurachun nir. 13Epafras llaquishushayquita rinrïwan wiyashcä. Laodicea marcaçhu, Hierápolis marcaçhu irmänunchicunapis sumaj llaquishunqui. Mana jungashunquichu. 14Yaçhänacushä jampicuj Lucaspis, Demáspis sumaj wamayäshunqui. 15Laodicea marcaçhu jutucaj irmänunchicunatapis wamayapämanqui, ari. Irmäna Ninfatapis, wasinçhu jutucaj irmänucunatapis wamayapämanqui. 16Cay cartata liguircur, Laodicea marcaman apachinqui jutucaj irmänucuna liguinanpaj. Laodicea marcaman apachishä cartatapis liguinquiman. 17Yupachicuj-masinchi Arquiputa piñapay: Washäcuj Jesúspa maquinçhu cawar, shiminta çharcunqui nir. 18Quiquïna cay cartapa ushyananta isquirbiycämü. Llapaniquita sumaj wamayaj. Carsilarashäta ama junganquichu, ari. Llapaniquitapis Tayta Diosninchi yanapayculläshunqui. Chayllana.

will be added

X\