1 - 2 Colosas marcaçhu jutucaj irmänucuna, nuwa Pablo, Timoteuwan-ima cartacallämü. Washäcuj Jesúsman yupachicuptiqui, llapaniquita wamayämuj. Allilla cawanayquipaj imaçhüpis quiquin Tayta Diosninchi yanapayculläshunqui. Llaquipayculläshunqui. Shungun munaptin, shiminta willacur purinäpaj nuwata caçhacamasha. 3 - 5 Jamcunata mana jungajchu. Chaymi imaypis Taytanchi Jesucristupa Taytanta mañacur, jamcunapäpis mañacuycä: Taytallau Tayta, Colosas marcaçhu irmänucunata yanapaycullay, ari nir. Irmänucuna, Washäcuj Jesúsman yupachicushayquipita, irmänu-masinchicunata alli ñawiquiwan ricashayquipita sumaj cushicü. Chaynuy cawaycanqui janaj pachaçhu Tayta Diosninchipa maquinçhu imaycamanpis cawayta yupachicur. Tayta Diosninchipa shiminta wiyashayquipita yupachicuycanqui. Paypa shimin alli willapa. 6 Tayta Diosninchipa alli willapanta chay-tucuyçhu willacuptin, runacuna yupachicurcaycan. Paypa shungun munashannuy cawarcaycan. Jamcunapis paypa shiminta wiyar: Tayta Diosninchi rasunpa llaquipämanchi nir çhasquicurayqui. 7 Llapantapis yaçhänacushanchi irmänu Epafrasmi sumaj tantiyachishurayqui. Payga Washäcuj Jesúspa maquinçhu purir, nuwatapis sumaj yanapämasha. 8 Espíritu Santu yanapäshuptiqui, llaquinacärishayquitapis willamasha. 9 Alli cawashayquita wiyar, mana jamallar Tayta Diosninchita mañacushcä: Colosas marcaçhu irmänucunata Espíritu Santuwan yanapaycullay yarpashayquita sumaj tantiyacunanpaj, shunguyqui munashanta sumaj rurananpaj nir. 10 Pay yanapämaptinchiga, shungun munashannuy cawashunpaj. Manchapacur juyäshunpaj. Shungun yarpashantapis tantiyacushunpaj. 11 Paymi sumaj munayniyuj yanapämänanchipaj, shacyächimänanchipaj. Chaymi ñacay çhayapamaptinchisi, runa jagayächimaptinchisi, Tayta Diosninchita cushish mañacushuwan. 12 Payllata alliman çhurar cawashun. Payga alli ñawinwan ricamashpanchi wamrachacamashcanchi. Janaj pachaçhu alli cawaymanpis çhuramäshunpaj. 13 Supaypa maquinpita jishpichimashcanchi. Jinarcur Wawan Jesúspa maquinman çhuramashcanchi. 14 Paymi jucha aparicuypita jishpichimashcanchi. Llapan jucha aparicushanchita Tayta Diosninchi jungananpäpis nuwanchi-raycur wañusha. 15 Quiquin Tayta Diosninchita mana ricanchichu. Wawan Jesústa ricarmi ichanga, Tayta Diosninchipa shungun imanuy cashantapis sumaj tantiyacunchi. Jesúswan Tayta Diosninchi quiquishllan. Payman imasi mana tincunchu. Imatapis mana camallarraj, Tayta Diosninchi ricsichicusha. 16 Jesúspa ricay ñawinçhu llap-llapantapis camasha. Washäcuj Jesús-ima Tayta Diosninchi cay pachatapis, janaj pachatapis camasha. Ricashanchitapis, mana ricashanchitapis camasha. Munayniyuj anjilcunatapis camasha. Llapanta maquinçhu purichinanpaj Washäcuj Jesús-ima camasha. Chaymi Jesústa llapanchi alliman çhurashun. 17 Chaura mana imasi caycaptillan, Jesús cawaycaran. Paymi Tayta Diosninchi camashanta llapantapis maquinçhu purichin. 18 Jutucaj irmänucunapis maquinçhu cawanchi. Tayta Diosninchi cawarachishanpita-pacha maquinçhu charämanchi. Payman mana pipis tincunchu. 19 Chaymi Tayta Diosninchi shungun imanuy cashantapis Washäcuj Jesúswan sumaj musyachimanchi. 20 Washäcuj Jesúspita Tayta Diosninchi llapan camashancunatapis alli ñawinwan rican. Nuwanchi-raycur rusçhu wañushanpita alli ñawinwan rican janaj pachaçhu-cajcunatapis, cay pachaçhu-cajcunatapis. 21 Unayga Tayta Diosninchita mana wiyacurayquichu. Payta ticrapur, juchata aparicullar cawarayqui. 22 Chaypis Washäcuj Jesús nuwanchi-raycur wañushanpita Tayta Diosninchipa shungunman tincunchi. Llapantapis rurasha ricay ñawinçhu juchaynajta ricamänanchipaj. 23 Ricay ñawinçhu alli cawananchipaj llapan shungunchiwan Jesúsman yupachicushuwan. Alli willapanta wiyacushuwan. Ama yamacäshunchu. Alli willapanta may-chayçhüpis willacurcaycan. Nuwapis willacuycä. 24 Tayta Diosninchipa shiminta jamcunata willapashä-janan ñacachimaptinsi, cushicü: Washäcuj Jesústa ñacachishan-jina runacuna wiçhgarächimasha jutucaj irmänunchicunata willapashäpita nir. 25 Jamcunata llaquipar, Tayta Diosninchi çhuramasha shiminta willacur purinäpaj. Chaymi llapan irmänunchicunata mayçhu juturaptinpis, Tayta Diosninchipa shiminta sumaj tantiyacunanpaj yanapä. 26 Shungun yarpashanta canancaman Tayta Diosninchi mana musyachicushachu. Yupachicuptinchim ichanga, musyaycächimanchi. 27 Camacächishanga sumaj-sumaj alli captin, tantiyayta mana atipanchichu. Chaypis llapan runata llaquipar, nuwanchi-raycur wañunanpaj Washäcuj Jesústa caçhamusha. Payga maquinçhu purichimanchi. Tayta Diosninchipa ñaupanmanpis çhayachimäshunpaj. 28 Nuwacuna Washäcuj Jesúspa shiminta willapäcü. Pï-maytapis piñapä juchata mana aparicullar cawananpaj. Alli shimilläpa yaçhachïpis Washäcuj Jesúspa shungun munashannuy cawananpaj. 29 Chaymi shiminta llapan runa wiyanan-raycur llapan shungüwan willapaycä. Willapänäpaj Washäcuj Jesús sumaj shacyächiman.
