Hechos 7

1Chaura mayur cüra Estebanta tapuran: ¿Rasunpachu juchayqui? nir. 2Estebanna niran: Israel-masicuna, taytacuna, tantiyacunquiman. Musyashanchinuypis auquillunchi Abraham Mesopotamia quinrançhu tiyaycaptillan Jarán marcaman manaraj aywaptillanshi, munayniyuj Tayta Diosninchi ricaripuran. 3Ricaripaycurshi, niran: Marcayquita, yawar-masiquicunata jaguiycur, ricachinaj çhacraman aywacuy. 4Chayshi Caldea quinranpita Jarán marcaman Abraham aywacuran. Chay marcaçhu tiyaycaptinshi, papänin wañucuran. Chaypita cay marcamannash Tayta Diosninchi Abrahamta pushamuran. Chay marcaçhüna cawanchi. 5- 6Cayman çhayachimurpis, quiquinpaj çhacrata manash ricachiranchu. Mana ricachirpis Abrahampa wamran mana captillan, willcancunata çhacrata junanpaj Tayta Diosninchi auniran. Willcancunapis jäpa marcaçhu çhuscu paçhac wata (400) jurpay-tucullar juyänanpaj musyachiran: Willcayquicunata jäpa runacuna sumaj ñacachinga. Maquillançhu purichinga nir. 7Jananmanpis Tayta Diosninchi niran: Ñacachicuj runacunata marcantinta sumaj ñacachishaj. Chay marcapita shacamurmi ichanga, willcayquicuna taytachacamar alliman çhuramanga. 8Nircur parlanacushan mana jungacänanpaj Abrahamta jïrucachiran. Chayshi Abrahampis ullgu wamran Isaacta churiyäcur, pusaj junajyujllata jïruran. Isaacpis ullgu wamran Jacobta jïruran. Jacobpis ullgu wamrancunata jïruran. Jacobpa çhunca ishcaywan (12) ullgu wamrancuna cashanman-tupu Israel runacunapis çhunca ishcaywan marca. Auquillunchicuna Jacobpa çhunca ishcaywan wamrancunapita miraran. 9Auquillunchi Jacobpa wamrancunana chiquicuywan Egipto marcaman shullcan Joséta ranticaycäriran. Juclä marcaman ranticuptinsi, Tayta Diosninchi Joséta mana caçhariranchu. 10Egipto marcaçhu sumaj ñacachiptinsi, washaran. Yaçhaj-sapa cananpaj yanaparan. Yarpay-sapa captinshi, Egipto marca mandaj Faraón Joséta alli ricaran. Chayshi Egipto marcacunatapis, wasi ruraynincunatapis Josépa maquinman çhuraran. 11Chay wichanshi Egipto marcaçhüpis, Canaán marcaçhüpis muçhuy captin, juyupa ñacaran. Auquillunchicunapis paçhanpaj pishiptin, juyupa yargaran. 12Chaura Egipto marcaçhu micuy juturashanta mayar, micuy rantij wamrancunata Jacob caçharan. Chayräshi auquillunchicuna Egipto marcaman aywaran. 13Auquillunchicuna yapay micuy rantij cutiptinshi ichanga, José ricsichicuranna: Wauguiquim caycä nir. Chaynuypash mandaj Faraónpis Josépa yawar-masincunata ricsicuran. 14Chaypita Egipto marcaman papänin Jacobta, llapan yawar-masincunata José jayachiran. Chayshi jançhis çhunca pichgajwan (75) Israel-masinchicuna Egipto marcaman aywaran. 15Chaynuypash Jacob Egipto marcaçhu tiyacuran. Jinallançhu Jacobpis, auquillunchicunapis wañucuran. 16Tulluncunatash ichanga Siquem marcaman apaycur-apaycur pamparan. Siquem çhacrata Hamorpa wamrancunapitash auquillunchi Abraham jillaywan rantish caran llapan yawar-masincuna pampacunanpaj. 17Abrahampa willcancunata jishpichimunanpaj Tayta Diosninchi aunishan wallcana pishiptin, Egipto marcaçhu yawar-masinchicuna sumaj achcayaran. 18Chay wichanshi Egipto marca juc runapa maquinçhu caycaran. Payga José pï cashantapis mana musyaranchu. 19Chayshi auquillunchicunata llullaparcur-llullaparcur aruchiran. Ñacachiran. Ullgu wamrancunatapis yurircuptillan, wicapachiran. 20Moiséspis chay wichanshi yuriran. Payta sumaj camarajlla captin, maman-taytan pacayllapa uywacuran quimsa quillacaman. 21Chaypita jaguiycushallanta mandaj Faraónpa jipashnin tarir, wamrachacurcuran. 22Chaynuypash Moisés Egipto runacunapa yarpashanta yaçhacuran. Yarpay-sapayar, imatapis alli ruraran. Alli rimaran. 23Moisés çhuscu çhunca (40) watata aywaycarnash, Israel-masincunawan tincuyta munaran. 24Watucuj çhayaptin, juc Egipto runa Moiséspa marca-masin Israel runata magaycaran. Payta washashançhüshi Egipto runata Moisés wañuycachiran. 25Marca-masinta washar, Moisés yarparan: Israel-masïcuna ñacaypita jishpichinäpaj Tayta Diosninchi caçhamashanta tantiyacungaçhi nirshi. Chaynuy yarpaptinsi, Israel-masincuna mana tantiyacuranchu. 26Chaypita Egipto runata wañuchishan warannin Israel-masincuna quiquin-purana maganacurcaycaran. Paycunata raquirshi, Moisés piñacuran: ¿Imanirtaj maganacurcaycanqui Israel-masilla caycar? nir. 27Chaura magacuj runa Moisésta tangariycuran: Raquimänayquipaj, ¿pitaj canqui? Mana maquiquiçhüchu juyaycä. 28¿Nuwatapis wañuchimaytachu munaycanqui? Egipto runataçhi janyan wañuchirayqui nir. 29Chaynuy niptinshi, Madián marcaman Moisés jishpicuran. Chay marcaçhu jurpay-tucullar juyaycashançhüshi ishcay ullgu wamranta churiyäcuran. 30Çhuscu çhunca (40) watapitanash chunyaj Sinaí punta quinrançhu Moisésta Tayta Diosninchi ricaripuran ratataycar shira-shiraçhu. 31Ricaripuptin, manchapayllapa Moisés aywapuran. Yaycapuycaptinshi, Tayta Diosninchi nimuran: 32Unay auquilluyqui Abrahampa, Isaacpa, Jacobpa Tayta Diosnin caycä. Paycuna manchapacamaranmi. Chayta wiyarshi, Moisés manchariywan sicsicyaran. Ricäriytapis manchacuran. 33Tayta Diosninchina niran: Içhirashayqui pacha nuwapam. Llanguiquita llushtiy. 34Egipto runacuna Israel wawäcunata ñacachishanta ricashcä. Llaquicuywan mañacamashantapis wiyashcä. Chaymi jishpichinäpaj yarpamushcä. Canan sumaj wiyacamay. Egipto marcaman caçhashayqui. 35Yawar-masincuna Moisésta: Mana maquiquiçhüchu juyä nir wasguipash caycaptinsi, shira-shiraçhu ricaripaycur Tayta Diosninchi caçharan Israel-masincunata maquinçhu purichinanpaj, jishpichinanpaj. 36Unayllatana Moisés Israel runacunata Egipto marcapita rasunpa jishpichisha. Çhuscu çhunca (40) watantin Tayta Diosninchi camacächiyninpa sumaj yanapasha Egipto marcaçhüpis, Puca yacu püsuçhüpis, chunyaj pachaçhüpis. 37Israel-masincunatana Moisés niran: Jamcunapita nuwata-jina juc willacujninta Tayta Diosninchi jatarachinga. 38Chunyaj pachaçhüshi Israel-masinchicunawan Moisés juturpaycaran. Sinaí puntaçhu Tayta Diosninchi llapan yarpashanta Moisésta willaparan. Moisésna auquillunchicunata willaparan. Paypa shiminta pipis wiyacur, alli cawayta tarinan caran. 39Auquillunchicunash ichanga wiyaytapis mana munaranchu. Wasguiparirshi, Egipto marcaman cuticuyta munaran. 40Chayshi Aarónta niran: Egipto marcapita jurgamajninchi Moisés, ¿mayparaj aywacusha? Illaricusha. Juctana manchapacushun pusharämänanchipaj. Yaya jircaman ricchacujta rurapämay. 41Chaynuy niptin, manta türituman ricchacujta rurapuran. Rurashan manta türitutapis manchapacur, uywacunata jararan. Rurashan ushyapayninta tünapäcuran. 42Chayshi Israel runacunapita Tayta Diosninchi witicuriran. Camacächiran intillaman, quillallaman, istrïllacunallaman manchapacunanpaj. Jipata willacujnincunawan piñacachir, musyachicuran: Israel runacuna, çhuscu çhunca (40) wata chunyaj pachaçhu puriycarpis, uywacunatapis, cuyachicuyniquitapis mana jaramashcanquichu. 43Manchäga yaya jirca Molocta manchapacur, capillantinta yaya Molocman ricchacujta matancashcanqui. Yaya jirca Refántapis manchapacur, istrïllaman ricchacujta jipirpashcanqui. Manchapacunayqui-cashan yaya jircaman ricchacujcunata rurashcanqui. Chaypitam Babilonia marca wajta quinranman jargushayqui nir. 44Chunyaj pachaçhüpis unay auquillunchicuna purichina jiru çhaqui capillata purichiran Tayta Diosninchiwan ricanacunanpaj. Capillata Moisés ruraran Tayta Diosninchi tantiyachishannuylla. 45Josuépis auquillunchicunapa capillanta matancash çhayachiran Tayta Diosninchi acrashan çhacraman. Acrashan çhacraman yaycuptinshi, llapan jäpa runacunatapis Tayta Diosninchi jarguran. Marca-masinchicunapis mandaj Davidpa maquinçhu cawashan wichancamanshi purichina jiru çhaqui capillata chararäcuran. 46Mandaj Davidwan Tayta Diosninchi sumaj yaçhänacuran. Chayshi David tapuran: Taytallau Tayta, ¿Jacobpa willcancuna jarashunayquipaj wasiquita rurämanchu? nir. 47Munaptinsi, mandaj Davidpa wamran Salomónräshi Tayta Diosninchipa wasinta rurachiran. 48Llapanta Camaj Tayta Diosninchim ichanga mana runa rurashan wasicunaçhüchu tiyan. Chayshi juc willacujta musyachir, Tayta Diosninchi unayna niran: 49Janaj pacha jamanä. Cay pacha çhaquïta çhurarächinalläpaj. Chaynuy caycaptin, ¿wasita rurapämanquimanchuraj? ¿Tiyanäpaj camacächinquimanchuraj? 50Mana. Quiquï llapantapis camashcä. 51Tayta cüracuna, jamcuna auquilluyqui-jina rumi shungu canqui. Upa canqui. Tayta Diosninchipa wawan caycarpis, mana wiyacunquichu. Juchallaçhu arunqui. Wiyacunayquipaj Espíritu Santu shacyächishuptiquipis, wasguipanqui. 52Auquilluyquicunapis: Tayta Diosninchipa shungun munashallanta ruraj runa shamunga nir willacuptin, llapan willacujcunata wañuchiran. Tayta Diosninchi acracushan runa, änir ricarimuptin, ticrapur wañuycachishcanqui. 53Unaypis caçha-anjilnincuna Tayta Diosninchipa shiminta willapäcuran. Chay willapata musyarpis, wasguipashcanqui. 54Chaura Estebanpa shiminta wiyar, mayur Israel runacuna chigaypa ullgur, sijçhicurcuranraj. 55Estebannam ichanga Espíritu Santu maquinçhu charaptin, janaj pachaman ricärishançhu Tayta Diosninchi achic-achicyaycämujta, Jesúspis dirïchan lädunçhu içhiraycämujta ricaran. 56Ricar, wiyacächipaypa niran: Mä ricay. Janaj pachapa puncun quiçharaycämun. Caçhamushan Jesústapis, Tayta Diosninchita-ima ricaycä. 57Niptin, wiyayta mana munar, rinrintapis chapacarcäriran. Japarir, Estebanta llapan açhcucarcäriran. 58Marca wajtanman jurgurir, sajmar ushyaran. Tumpar ñauquijcunapis Estebanta sajmananpaj punchunta paytacuran müsu Sauluman. 59Sajmaycaptin, Esteban mañacuran: Tayta Jesús, shuntacallämay, ari nir. 60Jungurpacuycur japariypa niran: Tayta, cay runacunapa juchanta ama yarparaychu. Nircur, wañucäcuran.

will be added

X\