Hechos 6

1Chay wichan Tayta Diosninchipa shiminta çhasquicujcuna sumaj achcayaran. Ichanga hebreo rimaj irmänucunawan griego rimaj irmänucuna micuy-janallan ticshaparänacuran. Hebreo rimaj irmänucunata jamurparan: Waran-waran griego biyüdacuna ichic-ichicllata micuyta çhasquiycan nir. 2Chaymi Jesúspa çhunca ishcaywan caçhancuna llapan irmänucunata jayarcachir, niran: Jamcunapa paçhayquita, janayquita ricallar cawanä mana camacanchu. Tayta Diosninchipa shiminta willacunäpaj mana atipashänachu. 3Irmänucuna, chaymi jançhis runata acray. Alli ricashcunata, Espíritu Santupa maquinçhu cawajcunata, yarpay-sapacunata acray. 4Nuwacuna Jesúspa shiminta willapäcullar, Tayta Diosninchita mañacullar cawashaj. 5Chaynuy niptin, llapan auniran. Chaymi jançhista acraran. Acraran Estebanta. Payga llapan shungunwan Tayta Diosninchita wiyacuj. Espíritu Santupa maquinçhu cawaj. Chaynuypis acraran Felipita, Prócoruta, Nicanorta, Timónta, Pármenasta, Nicolásta. Payga Antioquía runa caycarpis, Israel runaman ticraran. 6Jançhis runacunata acrarcur, Jesúspa caçhancunaman pusharan. Jesúspa caçhancunana maquinta umanman çhuraycur paycunapaj mañacuran: Taytallau Tayta, cay runacuna aruyninta çharcunanpaj yanapaycullay, ari nir. 7Chaura Tayta Diosninchipa shiminta willacuptin, Jerusalén marcaçhu Tayta Diosninchipa shiminta çhasquicujcuna achcayaycaran. Tayta Jesúsmanna yupachicuran. Israel cüracunapis achcajmi payman yupachicuran. 8Estebanta Tayta Diosninchi llaquipar, alli ricaran. Sumaj yanaparan. Maquinçhu purichir, Tayta Diosninchi ruranantapis musyachicuran. Llapanpa ricay ñawinçhu munashantapis camacächiran. 9Chaypis waquin runacuna Estebanta ticrapuran. Ticrapuran Cirene runacuna, Alejandría runacuna, Cilicia runacuna, Asia runacuna. Paycuna Israel runa caran. Jutucaj Caçharishcuna shuntacäna wasi nishançhu. 10Espíritu Santu yanapaptin, Esteban yarpay-sapa caran. Chaymi tincupajcuna imata rimarpis, Estebanta mana içhipuranchu. 11Chaymi jillayta juycur, llullacujcunawan tumpachiran: Esteban Tayta Diosninchitapis, Moiséstapis pampaman çhuraycan nir. 12Chaynuy niptin, llapan runa ullgucaycäriran. Ullgucaycäriran mayur runacunapis, Moiséspa shiminta yaçhajcunapis. Ullgur, mayur Israel runacunapa sisyunninman Estebanta aparan. 13Tumpajcunatapis pusharan. Tumpacujcuna niran: Cay runa Tayta Diosninchipa wasintapis, Moiséspa shimintapis pampaman çhuraycan. 14Tayta Diosninchipa wasintapis Nazaret marca Jesússhi juçhurachinga. Moiséspa shimintapis jungaycachingash. Llapantapis quiquinpa shiminpita musyanchi. 15Chaura llapan mayur Israel runacuna ricapäriptin, anjilpa jajllan achic-achicyashan-jinaraj Estebanpa jajllan achic-achicyaycaran.

will be added

X\