Hechos 5

1Warmin Safirawan Ananíaspis çhacranta ranticuycur, llutanta ruraran. 2Sumaj parlanacur, çhacranpa çhaninta puchuchicuran. Waquillanta Jesúspa caçhancunapa maquinman çhuraran. 3Chaura waquillanta çhayachishanta musyar, Pedro tapuran: Ananías, ¿imanirtaj Supay maquichacushunayquita aunishcanqui? ¿Imanirtaj Espíritu Santuta llullapaycanqui? ¿Imanirtaj: Çhacräpa çhaninta llapanta apamushcä nir waquinta puchuchicushcanqui? 4Çhacrayqui quiquiquipa casha. Çhacrayquipa çhaninpis quiquiquipa casha. Quiquiquipa caycaptin, ama llullacunquimanchu caran. Mana nuwatachu llullapämashcanqui. Manchäga quiquin Tayta Diosninchita llullapashcanqui nir. 5- 6 Nishanta wiyar, Ananías wañucäcusha. Müsucuna yaycurcur, ayanta pituran. Jinarcur pampaycäriran. Ananías wañucäcushanta mayar, llapan runa juyupa manchapacuran. 7Chaypita ishcay-quimsa ürata Ananíaspa warmin Safirapis çhayasha. Payga runan wañushanta mana musyaranchu. 8Çhayaptin, Pedro tapuriran: ¿Rasunpachu majayqui willamashanuylla çhacrayquita ranticushcanqui? nir. Chaura Safira niran: Au, chayllaçhümi ranticushcä. 9Pedruna niran: ¿Imanirtaj majayquiwan parlanacushcanqui Espíritu Santuta llullapänayquipaj? Majayquita pampaj müsucuna yaycaycämunna. Jamtana pampaj apacushunquipaj. 10Niycaptillan, Pedrupa ricay ñawinçhu Safira wañucäcuran. Müsucuna çhayar, wañushta tariran. Wañushta tarir, apacuran majanwan jaganacushllata pampaycärinanpaj. 11Ananíaswan Safira wañushanta mayar, jutucaj irmänucunapis, mana irmänucunapis sumaj mancharicäcuran. 12Jesúspa caçhancuna Tayta Diosninchi camacächiptin, runacunata sumaj yanaparan. Ricashanta tantiyayta mana atiparsi, runacuna sumaj cushicäriran: Tayta Diosnillanchi chay-niraj jishyaçhucunata allchacächin nir. Irmänucunapis Tayta Diosninchipa wasinman yaycur, Salomónpa puncunçhu jutucaj. 13Waquin runacuna irmänucunata alli ñawinpa ricarsi, tallupayta manchacuran. 14Chaynuy captinsi, warmi ullgupis waran-waran Tayta Diosninchipa shiminta çhasquicuran. Payman yupachicuran. Çhasquicujcuna achcajmi yapacaran. 15- 16 Jerusalén marcaçhu Pedro puriptin, mashtacuntinta, jirgantinta jishyaçhucunata wajtaman jurguran: Pedrupa llantuyllanwansi allchacangam nir. Chimpan marcacunapitasi chay-chicaj shuntacaran. Apamuran jishyaçhucunata, supay pucllacushan runacunata. Jesúspa caçhancuna llapallanta allchacächiran. 17Chaura mayur cürawan achcaj saduceucunapis juyupa ullgucaycäriran. 18Chaymi Jesúspa caçhancunata charicurcur, carsilman wiçhgaran. 19Wiçhgaraycächiptin, Tayta Diosninchi caçhamushan anjil chacaypa çhayar, carsil puncuta quiçhariran. Jesúspa caçhancunata jurgurir, niran: 20Tayta Diosninchipa wasinman ayway. Llapan runata sumaj willapay Tayta Diosninchipa maquinçhu cawananpaj. 21Warannin tuta anjil nishannuylla Jesúspa caçhancuna Tayta Diosninchipa wasinman yaycurir, llapan runata willapaycaran. Chaycaman yanapajnincunawan mayur cüra jayachiran llapan mayur Israel runacunata sisyunta rurapäcunanpaj. Jinarcur: Jesúspa caçhancunata apamuy nir carsilman caçharan. 22Carsilman çhayarmi ichanga, Jesúspa caçhancunata mana tariranchu. Chaymi cutircur, willaran: 23Taytacuna, carsil puncuta sumaj wiçhgaraycajta tarishcä. Puncunçhüpis täparcaycasha. Puncuta quiçharirmi ichanga, ruriçhu pitapis mana tarishcächu nir. 24Chaura Tayta Diosninchipa wasinta täpaj murucucunapa capitanninwan mayur cüracuna: ¿Imaraj canga, au? nir mancharicäcuran. 25Upatash caycaptin, juc runa çhayaran: Carsilman wiçhgachishayqui runacuna Tayta Diosninchipa wasinçhu carcaycan. Runacunata willapaycan nir. 26Chaynuy niptin, Tayta Diosninchipa wasinta täpajcunapa mandajnin murucuncunata pushacurcur, Tayta Diosninchipa wasinman aywaran Jesúspa caçhancuna ashij. Tarirga, mana yatapällar aparan: Runacuna sajmaramäshun-ima nir. 27Llapan mayur Israel runacuna juturpashanman çhayachiptin, mayur cüra niran: 28Rinriquiçhu willaraj chay Jesúspa shiminta mana willapäcunayquipaj. Rinriquiçhu willaycaptï, ¿imanirtaj mana wiyacamashcanquichu? Cananga Jerusalén marcaçhu llapan runata tantiyachishcanqui. Jinarcurpis jitapaycämanqui: Paycuna Jesústa wañuchisha nir. 29Chaura caçha-masincunawan Pedro niran: Jamcuna mana munaptiquisi, Tayta Diosninchita wiyacunä. Runapa shiminta mana wiyacümanchu. 30Jamcuna rusçhu Jesústa wañuycachiptiquisi, unay auquillunchicuna manchapacushan Tayta Diosninchi payta cawarachimusha. 31Jinarcur dirïcha-caj lädunman çhurasha mandäshinanpaj. Jesústa çhurasha maquinçhu cawachimänanchipaj, washämänanchipaj. Chaymi Israel runacuna wanacuptin, jucha aparicushantapis jungaycur mana yarparanganachu. 32Rimashäta musyä. Espíritu Santupis musyan. Paypa maquinçhümi llapan wiyacujcunata Tayta Diosninchi purichin. 33Chaynuy niptin, sisyun ruraj mayur Israel runacuna juyupa ullgucaycäriran. Jesúspa caçhancunata wañurachiyta munaran. 34Mandaj-masin Gamalielmi ichanga wañuchinanta miçharan. Payta fariseu runa captin, yaçhaj captin, llapan Israel runacuna alli ricaran. Paymi Jesúspa caçhancunata wajtaman jurgurachiran. 35Jurguriptin, llapan mayur Israel runa-masincunatana niran: Taytacuna, cay runacunata imatapis ruranayquipaj sumajraj yarpaçhacunquiman. 36Teudaspa willapanta musyanqui, ¿au? Ishcay-quimsa watatanash ullgur: Mandaj cä nir auturdäcunata ticrapuran. Maquinçhüpis çhuscu paçhac (400) runatash purichiran. Chay Teudasta wañuycachiptinshi ichanga, mashtaypa-mashtar jatirajnincuna aywacäriran. Llapallan illaricäcuran. 37Jipatapis llapan runata yupachishan wichan Galilea marcapita Judas auturdäcunata ticrapuran. Payta achcaj runa jatirpararan. Judasta wañuycachiptinmi ichanga, llapan mashtaypa-mashtar aywacäriran. Llapallan illaricäcuran. 38Taytacuna, sumaj wiyaycallämay. Cay runacunata imatapis ama rurashunchu. Imata ruracuptinpis, ama miçhäshunchu. Umallanpita jurgurcur willapäcuptin, jungacaypa aywangapaj. 39Tayta Diosninchipa shiminta willacuptinmi ichanga, imanuypa jungacächiyta munarpis, mana camäpacushunpächu. Chaymi sumaj yarpaçhacushun. Tayta Diosninchita ima chapata rurarushuwan. Gamaliel piñacuptin, llapan mayur Israel runa-masincuna wiyacuran. 40Chaypita Jesúspa caçhancunata yapay ruriman jayachiran. Jinarcur sumaj wascarillar, caçhariycuran: Cananpita shimiquita amucuy. Jesúspita ama willacunquinachu nir. 41Jesús-janan wascaptinsi, pampaman çhuraptinsi, cushicuran. Sisyunpita mayur Israel runacuna ricapaycaptin, cushishallana llucshicuran. 42Miçhaycaptinsi, Jesúspa caçhancuna Tayta Diosninchipa wasinçhüpis, wasicunaçhüpis waran-waran willapäcuran: Jesúsga Washäcujninchi. Payta Tayta Diosninchi caçhamusha jishpichimänanchipaj nir.

will be added

X\