Hechos 3

1Juc junaj mallway intina Pedruwan Juan Tayta Diosninchipa wasinman aywaycaran Tayta Diosninchita mañacuj. Chay üra Israel runacuna Tayta Diosninchita mañacärij. 2Cumllu runapis Tayta Diosninchipa wasinçhu Cuyayllapaj nishan puncunçhu mañapacuycaran. Payga yuriyninpita-pacha cumllu caran. Chaymi waran-waran yawar-masincuna apaj mañapacunanpaj. 3Tayta Diosninchipa wasinman Pedruwan Juan çhayaptin, jillayta mañacuriran. 4Mañacuriptin cumllu runata ricapärir, Pedro niran: ¿Ricäramanquimanchu? 5Chay runa: ¿Aycataraj jillayta jumanga? nishpan ricaraycaran. 6Pedruna niran: Jillayta mana charächu. Ichanga Nazaret marca Washäcuj Jesúsman yupachicü. Paypa maquinçhu cawä. Paymi yanapäshunqui. Jatariy. Puripacuyna. 7Chaynuy nir dirïcha-caj maquinpita jatarcachiran. Jatarcachiptin, llapan muguncunapis allchacäcuran. 8Içhishpan puriranna. Wancacaçhar Tayta Diosninchita alliman çhurar, wasinmanpis yaycuran Pedruwan, Juanwan. 9Tayta Diosninchita alliman çhurar purishanta llapan runacuna ricaran. 10Chaypis tantiyacuyta mana atipar, quiquin-pura tapunacuycaran: ¿Tagay runa manachu Cuyayllapaj nishan puncuçhu mañapacuj? ¿Imanuyparaj puriycanna? nir. 11Allchacaj cumllu runa Pedrutawan Juanta mana caçhariranchu. Chaymi runacuna mancharir ricäcunanpaj juclla shuntacaran Salomón nishan puncuman. 12Runacunata ricar, Pedro niran: Israel-masïcuna, ¿imanirtaj mancharish ricaparcaycämanqui? Alli cayninwançhi, munayniyuj cayninwançhi allchacächisha nir yarpaptiquisi, mana nuwacunachu allchacächishcä. 13- 14 Manchäga Jesúsman yupachicuptin, Tayta Diosninchi allchacächisha. Unaypita-pacha auquillunchicuna Tayta Diosninchita manchapacuj. Auquillunchi Abrahampis, Isaacpis, Jacobpis manchapacuran. Tayta Diosninchi mandu-rurajnin Jesústa alliman çhurasha. Chaypis jamcuna mandaj Pilato: Jesústa caçhariycushaj niptin, mana munashcanquichu. Manchäga Tayta Diosninchipa shungun munashanta ruraptinsi, allillata ruraptinsi wasguipashcanqui. Wañuchicuj runata caçhariycachir Tayta Diosninchi caçhamushan Washäcujta wañuchishcanqui. 15Quiquin cawachimajninchita wañuchishcanqui. Wañuchish captiquipis, Tayta Diosninchi cawarachisha. Cawarachishanta ñawïwan ricashcä. 16Jesúsman yupachicur, cay cumllu runapis allchacasha. Ricay ñawiquiçhu içhiraycan. Cumllu runawan ricsinacunqui. Jesúsman yupachicur llapan ricapaycaptin, allchacasha. 17Israel-masicuna, upa cayniquiwan Jesústa wañuchishcanqui. Mayur runacunapis upa cayninwan llapanta camacächisha. 18Chaynuypa unay willacujnincunawan Tayta Diosninchi musyachicushan çharcucasha. Paycuna niran: Washäcuj wañungaraj. 19Cananga Tayta Diosninchita wiyacäriy. Jucha aparicushayquipita wanacäriy. Wanacuptiqui, Tayta Diosninchi juchayquita jungaycur, mana yarparanganachu. 20Maquinçhu cawaptiqui, shunguyquitapis shacyächinga. Unaypita-pacha aunishan-jina Washäcuj Jesústapis yapay caçhamunga. 21Cananga janaj pachallaçhüraj Washäcuj Jesús caycan Tayta Diosninchi llapanta camacächishancaman. Chaynuy cananpaj unay acracushan willacujnincunawan musyachicush caran. 22Moiséspis auquillunchicunata willapash caran: Jamcunapita nuwata-jina juc willacujninta Tayta Diosninchi acracusha. Paypa shiminta wiyacunqui. 23Mana wiyacujcunatam ichanga marcanpita illarachinga nir. 24Canan wichanpaj Tayta Diosninchipa unay willacujnin Samuel cashanpita-pacha llapan willacujcuna musyachicuran. 25Nuwanchi-raycur unay willacujnincunawan Tayta Diosninchi shiminta musyachicuran. Nuwanchi-raycur auquillunchicunawan parlanacuran. Auquillunchi Abrahamta niran: Willcayquicunapita jucta acracushaj. Payga llapan runata sumaj yanapanga alli cawananpaj. 26Chaymi acracushan Jesústa cawarircachimur, nuwacunamanraj caçhamusha. Juchaçhu cawashanchipita wanacunanchipaj sumaj yanapämäshun.

will be added

X\