Hechos 25

1Chaura cargunta çhasquircur, Cesarea marcaman mandaj Porcio Festo çhayaran. Quimsa junajta Jerusalén marcaman aywaran. 2Çhayaptin, mayur cüracunapis, mayur Israel runacunapis Pablupita willaparan. 3Yaparir-yaparir mañacuran: Tayta Festo, Israel runacunata llaquipar, Pabluta apachimuy, ari nir. Rasunpa apachiptin caminuçhüshi shuyaycur, wañurachinan caran. 4Chaura mandaj Festo niran: Cesarea marcaçhu murucucunawan Pabluta sumaj täpaycächï. Waracunallana aywashaj. 5Mayganiquipis jäcuptiqui, Cesarea marcaman aywashun. Chay runa llutanta rurash captinga, ñaupäçhu ñauquinquiman. 6Pusaj junajlla-yupay Jerusalén marcaçhu juyapärir, Cesarea marcaman Mandaj Festo cuticuran. Warannin dispächunman Pabluta jayachiran. 7Pabluta çhayachipuptin, Jerusalén marcapita aywaj mayur Israel runacuna tucuyta jitaparan. Ichanga juchanta mana taripuranchu. 8Chaymi chapacur Pablo niran: Imaçhüpis mana juchallicushcächu. Moiséspa shimintapis llapanta wiyacushcä. Tayta Diosninchipa wasintapis mana pampamanchu çhurashcä. Roma marcaçhu mandaj Césarpa shimintapis çharcushcä. 9Chaynuy niptin, mayur Israel runacunawan alli ricanacuyta munar, mandaj Festo Pabluta tapuran: ¿Jerusalén marcapa aywashuwanchu? Llapan jitapäshushayquipita quiquï ashipushayqui nir. 10Pabluna niran: Pï-maypa dimanduntapis ushyacächinayquipaj Roma marcaçhu mandajninchi César çhurashcashunqui. Chaymi cay dispächullaçhu imapitasi ushyacächinquiman. Musyashayquinuypis Israelcuna chiquipämänanpaj mana ima achäquillatapis rurashcächu. 11Juchallicush caycar wañuchimaptin, mana chapacümanchu. Mana imatapis rurash caycaptïmi ichanga, Israel runacunapa maquinman pipis mana çhuramanmanchu. Mandaj Césarman apachimay. 12Chaura tantiyachijnincunawan parlanacuriycur, mandaj Festo niran: Pablo, mandaj Césarpa maquinman çhayayta munaptiqui, Roma marcaman apachishayqui. Payraj shimiquita wiyanman. 13Chaypita mana aycällatana mandaj Festo cargunta çhasquishanpita Cesarea marcaman warmin Bereniciwan mandaj Agripa ishcanin wamayaj aywaran. 14Achca junaj juyapacaptin Pabluta täpaycächishanta willar, mandaj Festo niran: Tayta Agripa, mandaj Félix cargunpita llucshicur, juc rïsu runata mana caçhariranchu. 15Chaymi Jerusalén marcaman aywaptï, mayur cüracunawan mayur Israel runacuna maquichacamayta camar mañacamasha. Juclla munasha: Chay runa rasunpa wañunman juchanpita ninäta. 16Munaptinsi, nirä: Roma runacuna mana sumaj tapucaçhällar, pitasi mana wañuchinchu. Chiquinacushanwan ñauquinacunantaraj shuyan. 17Chaymi Israel runacunawan shamur, warannin junajlla chay runata dispächüman jayachirä. 18Rasunpa juchan cashanta yarpashcä. Ñauquijcunam ichanga yarpashänuychu mana ñauquisha. 19Manchäga cawashan-janan, wañush Jesús-janan tincupänacuran. Wañush niptinsi, Pablo: Jesús cawaycan nin. 20Ima ruraytapis mana camäpacur, tapushcä: ¿Juchayquita sumaj ashinäpaj Jerusalén marcaman aywashunchu? nir. 21Chay Pablum ichanga mana munashachu. Manchäga mañacamasha: Roma marcaçhu mayur mandajninchi Augusto Césarraj juchäta ashipamächun nir. Chaymi Roma marcaman apachinäcaman täpaycächï. 22Chaynuy niptin, mandaj Agripa niran: Tayta Festo, chay runapa shiminta nuwapis wiyaycüman. Festuna niran: Yä. Wara jayachimushun shiminta wiyananchipaj. 23Warannin junaj dispächuman mandaj Agripa warmin Bereniciwan çhayaran. Llapan cumandanticunapis, jinan marca auturdäcunapis aywäshiran. Achic-achicyaycaj müdanash aywaran. Llapan shuntacarcuptin, mandaj Festo Pabluta jayachiran. 24Çhayachiptin, mandaj Festo niran: Tayta Agripa, llapallayquita willashayqui. Israel runacuna Jerusalén marcaçhüpis, cayçhüpis cay runata wañuchinäta munan. Pabluta wañurachinäta munar ullgurcaycan. 25Sumaj tapucaçharmi ichanga, juchallicushanta mana taripushcächu. Roma marcaçhu mandajninchi Augusto Césarman apachinäpaj quiquin mañacamaptin, aunishcä. 26Taytacuna, llapaniqui yanapaycallämay. Cay runapa juchanta mana tarir, mandaj Césarman imata nir cartacuytapis mana camäpacüchu. Tayta Agripa, ¿imata nirtaj cartacüman? Tapüshimay ari, imata nir cartacunäpäpis. 27Jucha aparicushanta mana tariycar apachiptï, pingaypaj canga, ¿au?

will be added

X\