Hechos 24

1Chaypita pichga junajta mayur cüra Ananíaswan waquin mayur Israel runacunapis, yaçhaj Tértuluta pushacurcur, Cesarea marcaman aywaran. Mandaj Félixman çhayaran Pabluta ñauquinanpaj. 2Mandaj Félixna Pabluta jayachiran. Dispächunman çhayachiptin, yaçhaj Tértulo niran: Mandaj Félix, ima allish allilla juyächimanqui. Tantiyay-sapa cayniquipa marcäcuna alli cawananpaj imatapis rurashcanqui. 3Tayta Félix, allilla cawachimashayquipita chay-tucuyçhu alli cawapäcurcaycä. Jatunpa cushicullä. 4Alli shungu captiquipis, alläpa mana jamarächicümanchu. Chaymi juc-ishcayllatasi wiyaycallämay, ari. 5Cay runash aypäcuj jishya-yupay chay-tucuyçhu Israel runacunata ticrapanacaycächin. Payga Nazaret marca Jesústa çhasquicujcunapa mayur runash. 6Jerusalén marcaçhüpis Tayta Diosninchipa wasintash pampaman çhurasha. Chaymi nuwacuna rïsu charirä. Quiquïcuna yarpashänuylla llapantapis ushyacächiyta munarä. 7Ichanga ushyacächinäpaj charirpaycaptï, cumandanti Claudio Lisias jaticämusha. Jiçhuramasha. 8Jinarcur ñaupayquiçhu ñauquinäpaj caçhamasha. Tayta Félix, quiquiquisi sumaj tapurga, rimashänuyllam juchanta taripanquipaj. 9Tértulo rimashallanta waquin Israel runacunapis rimarcäriran: Rasunpam nir. 10Chaura: Shimiquita wiyashun, Pablo nir mandaj Félix rimachiran. Rimachiptin, Pablo niran: Tayta, ima allish rimachicamanqui. Unaypita-pacha marcäcunata alli ricanqui. Chaynuypa manacajta jitapämashanpita chapacushaj. 11Chayraj çhunca ishcaywan (12) junaj Jerusalén marcaman Tayta Diosninchita alliman çhuraj aywashäpis. Shimï rasunpa cashanta musyanayquipaj, pitapis tapunquiman. 12Mana piwanpis piñanacuycajtachu, pitapis piñanacaycächijtachu tarimasha. Tayta Diosninchipa wasinçhüsi, shuntacäna wasiçhüsi, jinan marcaçhüsi mana pitapis ticrapanacachishcächu. 13Manchäga cay runacuna tumpaycäman. Rasunpa juchallicush captï, jajlläçhu mä, nimächun. 14Jesúspa shiminta çhasquicushäpita: Pantacash nimaptinsi, Tayta Diosninchipa maquinçhu cawaycä. Payllata manchapacü. Moiséspa shimin nishannuylla, unay willacujcunapa shimin nishannuylla, auquillunchicuna cawashannuylla cawaycä. 15Israel-masïcuna wañushcunata Tayta Diosninchi cawarachinan yupachicushan-jina nuwapis yupachicü. Payga shiminta wiyacujcunatapis, mana wiyacujcunatapis cawarachinga. 16Chaymi jucha aparicuyta mana munächu Tayta Diosninchipa ricay ñawinçhüpis, runa-masïcunapa ricay ñawinçhüpis. 17Unayga achca wata juclällaçhu juyar, pishipacujcunata yanapänäpaj cuyachicuynïcunatapis Tayta Diosninchipaj apar, Jerusalén marcäman cutirä. 18-19 Chaypita Tayta Diosninchipa wasinman ushyacuj aywarä. Ushyacurä Tayta Diosninchi alli ricamänanpaj. Jinarcur ruriman yaycurä. Juc-ishcaj runallawan Asia quinranpita shamuj Israel-masïcuna tarimasha. Piwanpis mana piñanacuycarächu. Paycunaraj shamunman ñauquimänanpaj. Llutanta ruraycajta tarimash carga, juchäta jurgapämänanpaj shamuchun. 20Manchäga cay runacuna jajlläçhu nimächun. Jerusalén marcaçhu mayur Israel runacunapa sisyunninçhu ñauquimarpis, mana ima juchätapis tarishachu. 21Nuwapa juchä shimïta jugarishallä. Shimïta jugarir, nirä: Wañushcuna cawarinanta yupachicü. Chaypita ñauquircaycämanqui. 22Chaynuy niptin, Tayta Jesúspita rimashanta sumaj musyar, juc junajpaj mandaj Félix jitaparan: Cumandanti Lisias shamuptinraj, imapita ñauquinacushayquitapis sumaj tapucushayqui nir. 23Jinarcur mandaj Félix täpaj murucunta niran: Pabluta ama wiçhgaychu. Manchäga täpaylla sumaj täpay. Ricsinacushancuna watucunantapis, imata apapämunantapis ama miçhanquichu. 24Warannincuna warmin Drusilawan ishcanin mandaj Félix çhayamuran. Warmin Drusila Israel warmi caran. Ishcanin Pabluta jayarcachir, rimashanta wiyapararan: Washäcuj Jesústa wiyacushun nir willapaptin. 25Pablo willaparan: Llapan runa allillata ruranman. Shungun munapashallanta ama ruranmanchu. Cay pacha ushyacaptin, Tayta Diosninchi llapan runapa juchanta jurgapanga nir. Chayta willapaptin, mancharicäcur Félix niran: Chayllapäna. Jäcur, yapay jayachishayqui. 26Chaynuypa parlaj tumpaylla achca cutipa Pabluta jayachiran: Caçhariycunäpaj jillayta jutupämanga nir. 27Jillayta mana jutupaptin, Pabluta mana caçhariranchu. Chaypita ishcay watata cargunpita mandaj Félix llucshicuran. Porcio Festuna cargunta çhasquiran. Mandaj Félix mayur Israel runacunawan alli ricanacuyta munar, Pabluta wiçhgaraycajllata jaguiycuran.

will be added

X\