Hechos 23

1Chaura Pablo mana chapacullar llapan mayur Israel runata ricärir niran: Marca-masïcuna, canancaman Tayta Diosninchipa ricay ñawinçhu alli cawashcä. Chaymi allilla cawaycä. 2Chaynuy niptin, mayur cüra Ananías Pabluta shimiçhu cutachiran. 3Chaura Pablo shiminta jugarir niran: Ishcay cära runa, jamtapis Tayta Diosninchi cutashunquipaj. Moiséspa shiminman tupurraj juchayuj cashäta, mana cashätapis ashipämanquiman. Juchäta tarirraj wascamanquiman. Mayur Israel runa caycar juchäta mana tarillar cutachimarga, quiquiqui juchata aparicuycanqui. 4Chaynuy niptin, runacuna Pabluta ullgüparan: Tayta Diosninchi acracushan mayur cürata ashllishcanqui nir. 5Pabluna niran: Taytacuna, mayur cüra cashanta mana musyaynïwan rimarcushcä. Tayta Diosninchipa shiminpis nin: Mayur runata ama ashlliychu. 6Chaura Israel mayur runacuna ishcay yarpayyuj runacuna caran: fariseucunapis, saduceucunapis. Chayta musyar, Pablo wiyacächiypa niran: Israel-masicuna, taytäpita-pacha fariseu runa cä. Chaymi wañushcuna cawarinanta yupachicushäpita mayur Israel runacunapa sisyunninman apaycamar dimandarcaycamanqui. 7Wañushcuna cawarinanta rimaptin, fariseucunapa shungun Pabluman ticracurcuran. Chaymi fariseucunawan saduceucuna piñacuyta jallaycärisha. Quiquin-puralla mayur Israel runacuna ticrapanacuran. 8Saduceucunapa yarpashan fariseucunapa yarpashanwan mana tincuranchu. Saduceucuna yarpan: Wañushallanchiwan ushyaräcunchi. Anjilpis, almapis mana canchu nir. Fariseucunana yarpan: Wañushanchipita cawarimushun. Anjilpis, almapis caycan nir. 9Chaura wichaypa-uraypa jayapänacuycaptin, waquin Moiséspa shiminta yaçhaj fariseucuna niran: Cay runa juchallicushanta mana tarinchichu. Almacunapis, anjilcunapis cay runata ricaripushaçhi. 10Chaynuy niptinsi, runacunapa ullguynin mana jasacaranchu. Alläpa ullguptin, cumandanti manchariran: Pabluta wañuchirunman nir. Chaymi murucucunata niran: Cuartilman jishpichiy. 11Chay pagas ricapacuyninçhu Pabluta Tayta Jesús niran: Ama imatapis manchacunquichu. Cay marcaçhu shimïta willacushayquinuylla Roma marcaçhüpis willapäcunquipaj. 12Chaura warannin junaj waquin Israel runacuna parlanacuran: Pabluta mana wañuchishanchicaman micuytasi, yacutasi ama mallishunchu. Shiminchita mana çharcuptinchi, Tayta Diosninchi ñacachimäshun nir. 13Chaynuy parlanacuran çhuscu çhunca-yupay (40) runacuna. 14Parlanacuriycur, mayur cüracunata, mayur runacunata willaj aywaran. Çhayaycur, niran: Nuwacuna parlanacushcä: Pabluta mana wañuchishanchicaman micuytasi, yacutasi ama mallishunchu. Shiminchita mana çharcuptinchi, Tayta Diosninchi ñacachimäshun nir. 15Taytacuna, canan cumandantita mañacunqui: Sumaj tapunäpaj Pabluta caçhamuy. Ima juchan cashantapis sumaj musyayta munä nillar. Manaräsi çhayamuptillan, nuwacuna wañuchinäpaj shuyaraycäshaj. 16Chaynuy parlanacärishanta Pablupa paninpa wamranpis wiyaran. Wiyar cuartilman aywarcur, willaycuran. 17Chaura juc capitanta jayarcur, Pablo niran: Cay müsuta cumandantiman pushay. Shungun musyashanta willamuchun. 18Niptin, cumandantiman çhayaycachir, niran: Wiçhgaraj Pablo jayarcachimar, cay müsuta pushamunäpaj mañacamasha. Shungun musyashantash willashunqui. 19Niptin, yatalla pusharcur, cumandanti tapuran: ¿Imatataj musyaraycanqui? nir. 20Chaura müsu willaran: Waquin Israel runacunawan mayur runacuna parlanacärisha. Paycuna mañacushunquipaj: Sumaj tapunäpaj sisyunnïman Pabluta caçhapaycallämay, ari nillar. 21Chaynuy nishuptiqui, ama auninquichu. Çhuscu çhunca-yupay (40) runacuna parlanacusha: Pabluta mana wañuchishanchicaman micuytasi, yacutasi ama mallishunchu. Shiminchita mana çharcuptinchi, Tayta Diosninchi ñacachimäshun nir. Paycuna caçharcunallayquita shuyarpaycan. 22Chaura cumandanti niran: Shimiquita pashtapacurunquiman. Upällalla cuticunqui, ari. 23Jinarcur cumandanti ishcaj capitanta jayarcachir niran: Sumaj chacarcuptin, Cesarea marcaman Pabluta apanayquipaj camaricuy. Camaricuchun ishcay paçhac (200) murucucuna çhaquipa aywananpaj, jançhis çhunca (70) cawallun muntash aywananpaj, ishcay paçhac (200) tucsicunanwan-caman aywananpaj. 24Pablo muntacunanpäpis cawalluta camariy. Cawaycajta mandaj Félixman çhayachinayqui. 25Pabluta apaj murucucunawan cartatapis apachiran. Cartaçhu niran: 26Tayta Félix, nuwa mayur mincayniqui Claudio Lisias cartacallämü. ¿Allillachu juyapaycanqui? 27Israel runacuna charircur, cay runata wañuchinanpaj caycaran. Chaymi Roma runa cashanta musyar, murucücunawan washashcä. 28Jinarcur imapitasi tincupänacushanta musyayta munar, mayur Israel runacuna sisyunta rurashanman aparä. 29Chayçhu quiquincunapa yarpashan-janallan tincupänacushanta tantiyacurä. Wañuchicänanpäpis, carsilçhu wiçhgaränanpäpis achäqui mana caranchu. 30Canan mayur Israel runacuna wañurachinanpaj parlanacushan rinrïman çhayamuptin, apaycächimü. Chiquij runacunatapis ñaupayquiçhu juchanta jurgapänanpaj nishcä. 31Chaura murucucuna capitanninta wiyacur, chay chacaylla Antípatris marcaman Pabluta çhayachiran. 32Warannin junaj çhaquipa aywaj murucucuna cuartilninman cuticäriran. Cawalluwan aywajcunalla Cesarea marcaman çhayachiran. 33Cesarea marcaman çhayar, cartatapis, Pablutapis mandaj Félixpa maquinman çhuraran. 34Chaura cartata liguircur, maypita cashantapis Pabluta tapuran. Cilicia marca runa cashanta willaptin, niran: 35Chiquishujniqui runacuna çhayamuptinraj, shimiquita wiyashaj. Chaynuy nir wañucuj mandaj Herodespa wasillançhu Pabluta täpachiran.

will be added

X\