Hechos 21

1Chaura irmänunchicunata: Aywallä nir bütiman jigarcur, aywacurä. Cos marcaman çhayarä. Warannin junaj Rodas marcaman çhayarä. Chaypita Pátara marcaman çhayarä. 2Pátara marcapita Fenicia marcaman büti llucshiycajta tarir, jigacarcärirä. 3Siria quinranman aywar, wac chimpançhu Chipre marcata ricarä. Chaypitaraj Tiro marcaman çhayarä. Chayçhu apashan jipicunata büti jaguicuran. 4Irmänunchicunawan tincurmi ichanga, jançhis junaj juyapärishcä. Paycuna Espíritu Santu musyachiptin, Pabluta miçharan: Jerusalén marcaman ama aywaychu, ari nir. 5Chaura juyanä junaj çharcuptin, irmänunchicuna warmintin, wamrancunawan marcanpita lamar cantuncaman yanagämaran. Paycunawan jungurpacaycärir, Tayta Diosninchita mañacurä. 6Jinarcur: Aywallä nir bütiman jigarä. Paycunam ichanga wasinman-caman cuticäriran. 7Chaypita Tiro marcapita aywacur, Tolemaida marcaman çhayarä. Chaycamalla yacupa aywarä. Chay marcaçhu irmänunchicunawan wamayänacur, juc junaj juyapärishcä. 8Warannin junaj aywacur, yanaguïcunawan Cesarea marcaman çhayarä. Chay marcaman çhayar, Jesúspita willacuj Felipipa wasinçhu pachacushcä. Paytapis Jerusalén marcaçhu jançhis irmänucunata acrar, acracurunaj micuyta aypucunanpaj. 9Felipipa çhuscuj jipashnincuna Tayta Diosninchipa willacujnin caran. Paycuna Tayta Diosninchipa shungun yarpashanta musyachicuj. 10Ishcay-quimsa junaj juyaycaptï, Judea quinranpita çhayamuran Tayta Diosninchipa willacujnin Agabo. 11Payga Pablupa sinturunninta pascapariran. Sinturunninwan maquin-çhaquinta watacurcur, niran: Espíritu Santu nin: Sinturunyuj runata caynuy Jerusalén marcaçhu mayur Israel runacuna wancunga. Jinarcur, jäpa runacunapa maquinman çhuranga. 12Chayta wiyar, llapan irmänunchicunawan mañacurä: Pablo, Jerusalén marcaman ama aywaychu, ari nir. 13Pabluna nimaran: ¿Imanirtaj waganqui? Wagaptiqui, shungüpis ishquicäcun. Jerusalén marcaçhu wascamaptinsi, çhasquicushaj. Tayta Jesús-janan wañuchimaptinsi, mana chapacushächu. 14Chaura imanaypapis chapayta mana camäpacur: Tayta Diosninchi camacächishannuy caycullächun nir imatapis mana rimaparänachu. 15Chaypita llapanta sumaj camaricuriycur, Jerusalén marcaman aywacärirä. 16Aywacuptï, Cesarea marcapita waquin irmänunchicuna Jerusalén marcacaman yanagämaran. Çhayaptï, Chipre runa Nasónpa wasinman pachächimaran. Nasónga unaypita-pacha Tayta Jesústa wiyacuran. 17Chaura Jerusalén marcaman çhayaptï, cushi-cushilla irmänunchicuna çhasquicamaran. 18Warannin junaj Santiaguta watucuj Pablo aywaptin, nuwacunapis aywäshirä. Mayur irmänucunatawan tarirä. 19Paycunata wamayaycur, jäpa runacunapa marcançhu purishanta, ima-imatapis rurashanta, Tayta Diosninchi imaçhüpis yanapashanta Pablo willaparan. 20Llapallanta willaptin, Tayta Diosninchita alliman çhuraran. Jinarcur niran: Irmänu Pablo, Israelcuna achcajmi Jesúspa shiminta çhasquicuycan. Chayta quiquiquipis musyanquina. Chaypis Moiséspa shiminta çharcunanchitaraj munaycan. 21Jäpa runapa marcancunaçhu tiyaj Israel runacuna sharcamurmi ichanga willacusha: Moiséspa shiminta çharcunanchitapis, iti ullgu wamranchicunata jïrunanchitapis, auquillunchicunapa shiminta çharcunanchitapis Pablo mana munanchu nir. 22Waquin Israel-masinchicuna llutanta yarpaptin, ¿imanaypataj chapacushun? Çhayamushayquita mayanga. 23Chaymi llapan runapa ricay ñawinçhu alli llucshinayquipaj sumaj yarpaçhacushun. Cayçhu çhuscuj runacuna Tayta Diosninchi aunishanta çharcuycan. Ichicllana pishin. 24Aunishanta çharcushan musyacänanpaj çhuscunwan ushyacamuy. Ajchantapis rutuchiy. Rutushayquipa çhanintapis çhuranqui. Chaynuy ruraptiqui, Israel-masinchicuna ninga: Manacajllapita Pabluta tumpasha. Paypis Moiséspa shiminta llapanta çharcuycan. Tayta Diosninchipis alli ñawinwan rican. 25Sumaj yarpaçhacurir jäpa irmänucunata mayna cartacushcä: Jircacunaman jarashanta ama micunquichu. Uyshata pishtarpis yawarninta shutuchinqui. Yawartapis ama micunquichu. Ricashayqui warmiwan, ricashayqui runawan ama cacunquichu nir. 26Chaura warannin junaj Moiséspa shiminta çharcur, änir çhuscun runawan Pablo ushyacuran: Tayta Diosninchi allina ricamäshun nir. Jinarcur imay junaj ajchanpa çhaninta çhurananpäpis Tayta Diosninchipa wasinman willaj aywaran. 27Jançhis junajta aywaycaptin Tayta Diosninchipa wasinçhu Pabluta ricar, Asia quinranpita shamuj waquin Israel runacuna ullgucaycäriran. Tincuypa-tincur, Pabluta charicarcäriran: 28Israel-masicuna, yanapaycallämay. Cay runacuna chay-tucuypa willapäcuycan marcanchita pampaman çhurananpaj, Moiséspa shimintapis mana çharcunanpaj. Tayta Diosninchipa wasintapis pampaman çhurar, jäpa runacunata yaycuchisha nir. 29Paycuna Pabluta ricarunaj Éfeso runa Trófimuwan marcaçhu puriycajta. Chayçhi yarparan: Tayta Diosninchipa wasinmanpis jäpa runata yaycuchisha nir. 30Chaymi llapan runa tincuypa-tincuran. Shuntacaycur Pabluta charicarcärir, wajtaman jançharan. Nircur Tayta Diosninchipa wasin puncuntapis wiçhgaycäriran. 31Pabluta wañuchinanpaj caycaptin, Roma murucucunapa cumandantita willaran: Israel runacuna tincuypa-tincurcaycan nir. 32Chaura cumandanti capitancunatawan murucuncunata shuntariycur, runacunaman juclla aywaran. Paycunata ricar, magarcaycashançhu Pabluta caçhariycuran. 33Caçhariycuptin, murucucunapa cumandantin Pabluta charicurcuran. Ishcay cadinawanraj watachiran. Jinarcur runacunata tapuran: ¿Pitaj cay runa? ¿Imatataj rurasha? nir. 34Tapuptin, ima niytapis mana camäpacuranchu. Wichaypa-uraypa rimacäriran. Chaymi murucucunapa capitannin ima juchanta taripuyta mana camäpacur, cuartilman Pabluta apacuran. 35Apaycaptin runacuna magayta munaptin, wintucurcullar cuartilpa patac-patacninta jigachiran. 36Runacuna ullguyllawan japarpaycaran: Pabluta wañurachiy nir. 37Chaura cuartilman yaycuchinanpaj caycaptin, murucucunapa cumandantinta Pablo niran: ¿Ichicllatapis parlapärishuwanchu? Chaynuy niptin, cumandanti niran: ¿Griego rimayta yaçhanquichuraj? 38Egipto marcapita canqui, ¿au? Juc cuti auturdäninchita ticrapur, çhuscu waranga (4,000) runacunata shuntaycur purishcanqui, ¿au? Wañuchicunayquipaj chunyaj pachaçhu purishcanqui, ¿au? 39Pabluna niran: Mana. Israel runa cä. Cilicia quinran jatun Tarso marcaçhu yurishcä. Cay ullguj marca-masïcunata tantiyaycächishaj, ari. 40Chaura cumandanti auniptin cuartilpa patacninçhu içhicuycur, llapan runata upällachiran. Jinarcur llapan runa tantiyananpaj hebreo rimayninçhu niran:

will be added

X\