Hechos 20

1Chaura runacuna tincuypa-tincushan çhawacäcuptin, llapan irmänucunata jayaycachir, Pablo anyaparan. Jinarcur: Aywallä nir Macedonia quinranman aywacuran. 2Aywacur, çhayashan marcacunaçhu Tayta Jesústa wiyacuj irmänucunata sumaj shacyächiran. Chaypita Grecia quinranman çhayaran. 3Chay marcaçhu quimsa quilla juyapäriran. Chaypita Siria quinranman bütiwan aywacunanpaj caycashançhu, mayur Israel runacuna wañuchinanpaj yarpapashanta mayaran. Chaymi çhaquillapana Macedonia quinranpa Pablo cuticuran. 4Cuticuptï, yanagämaran Sópatros, Aristarco, Segundo, Gayo, Timoteo, Trófimo, Tíquico. Sópatrosga Berea marcapita caran. Papäninpa jutin caran Pirro. Aristarcuwan Segundo, Tesalónica marcapita caran. Gayo, Derbe marcapita. Trófimuwan Tíquico, Asia quinranpita caran. 5Yanaguïcuna Tróade marcaman ñaupacuran. Chayllaçhu Pablutawan ishcanïta shuyarämaran. 6Libadüraynaj tanta micuna fiesta ushyacäcuptinraj, Filipos marcapita bütiwan aywacärirä. Pichga junajllata yanaguïcunata tariparä. Tariparcur, Tróade marcaçhu juc simäna juyapärirä. 7Chaura dumingu chacay irmänucunawan jutucarä micupacunäpaj, tantata paquipacur mallichinacärinäpaj. Warannin aywacunan captin, pullan-pagascaman Pablo willapäcuran. 8Juturashä wasiga ishcay altusyuj caran. Achquicunapis rataycaran. 9Eutico nishan müsupis wasipa bintänançhu jamaraycaran. Pablo pullan-pagascaman willapäcuptin, puñunaywan ñipchit-ñipchityaycaran. Puñucäcur, ishcay janay altuspita shicwacamuran. Jatarachij çhayaptin, wañushana caycaran. 10Chaura Pablo yarpuriycur, müsuta margacurcuran. Irmänucunatapis niran: Ama llaquicuychu. Cawaycan. 11Jinarcur altusman jigarcur, Pablo tantata paquircur-paquircur mallichimaptin, llapanï micurä. Payga pacha warashancaman willapäcuran. Chaypita aywacuran. 12Waquin irmänucunana cawaycajta müsuta wasinman pushacuran. Chaypita llapan irmänucunapis jatunpa cushicäriran. 13Jinarcur bütiwan ñauparcur, Aso marcaçhu Pabluta shuyarparä. Payga yarpashanta çharcur, çhaquillapa shamuran. 14Aso marcaçhu Pabluwan tincur, bütiwan llapanï Mitilene marcaman aywacärirä. 15Warannin Quíos marca chimpanman çhayarä. Chaypita büti içhinan Samos marcaman çhayarä. Waranin Trogilón marcaçhu içhipärir, Mileto marcaman çhayarä. 16Asia quinrançhu Pablo juyapacayta mana munaptin, Éfeso marcaman mana çhayallar, aywacärirä. Camäpacur, Pentecostés nishan fiestallapaj Jerusalén marcaman çhayayta munaran. 17Chaura Mileto marcallapita Éfeso marcaçhu mayur irmänucunata Pablo jayachiran. 18Çhayamuptin, niran: Irmänucuna, çhayamushäpita-pacha imanuy Asia quinrançhu cawashäta musyanqui. Ricay ñawiquiçhu purishcä. 19Mana yaçhaj-tucullar Tayta Jesúspa mandunta rurashätapis musyanqui. Israel-masïcuna chiquipämaptinpis, ñacachimaptinpis, wagashalläwan ushyaräcun. 20Jamcunata willapänajpaj yarpashäcunata mana imatapis pacashcächu. Manchäga wasin-wasin, llapan wiyay willapashcä. 21Israel runacunatapis, jäpa runacunatapis jucha aparicushanpita wanacur Tayta Diosninchipa maquinçhu cawananpaj, Tayta Jesúspa shiminta çhasquicunanpaj tantiyachishcä. 22Cananga Espíritu Santu apamaptin, Jerusalén marcaman aywaycä. Imaman çhayanätapis mana musyärächu. 23Maypa puriptïpis, Espíritu Santu musyachiman ñacanalläta, carsilman çhayanalläta. 24Ñacanäta musyarpis, mana llaquicüchu. Wañuyman çhayarpis, Tayta Jesús nimashanta çharcunä. Chaymi cawashäcaman Tayta Diosninchi llaquipäcuj cashanta pï-maytapis willapänä. 25Marcayquicunapa purir, Tayta Diosninchipa maquinçhu cawanayquipaj willaparä. Cananpitam ichanga mana ricamanquipänachu. 26Llapaniquita willapashcaj. Cananga quiquiquipitana imamanpis çhayanquipaj. 27Tayta Diosninchi yarpashancunata llapanta willapashcaj. Imatapis mana pacashcächu. 28Irmänucuna, quiquiquicunapis wiyacunquiman. Mayur irmänu captiqui, uyshata alli ricashan-jina jutucaj irmänucunatapis ricanquiman. Maquiquiçhu cawan. Sumaj ricanayquipaj carguyquiman Espíritu Santu çhurashcashunqui. Paycunata Tayta Diosninchi wamrachacusha Wawan Jesús wañuyman çhayayninpa. 29Aywacuptï, micucuj liyun-jina pantachicujcuna shamunga irmänucunata ñacachir ushyacächinanpaj. 30Waquin pantachicujcuna irmänu-masillayquipita jataringa. Maquillançhu purichinanpaj: Allita rimä nir irmänucunata riguichinga. 31Chaymi quiquiqui-pura sumaj michinacunqui. Quimsa watantin pagas-junajta wiguïpawan willapashäcunata jungarunquiman. Llapaniquita willapashcaj. 32Irmänucuna, Tayta Diosninchipa maquinman çhuraycaj. Paypa shiminta sumaj willapashcaj. Sumaj llaquipäcuj cashpan yanapamäshun shungun munashannuy cawananchipaj. Aunishan irinsata tarichimashpanchi ñaupallançhu llapan wawancunata cawachimäshun. 33Nuwa mana pipa jillaynintapis, jurintapis, müdanantapis munapashcächu. 34Manchäga quiquï arushcä. Chaymi yanaguïcunatapis, quiquïtapis mana imapis pishïmashachu. Llapantapis musyanqui. 35Nuwa-jina arur, pishipacujcunatapis yanapänayquipaj willapashcaj. Quiquin Tayta Jesúspis tantiyachimashcanchi: Mañapacur, llaquicunchi. Tarichicurmi ichanga, cushicunchi nir. 36Pablo rimayta ushyariycur, irmänucunawan jungurpacaycärir, Tayta Diosninchita mañacuran. 37Aywallä niptin, llapan macallanacurcur-macallanacurcur wagapäcuran. 38Cananpita mana ricamanquipänachu nishanpita llapan llaquicuran. Llaquicursi, büti caycashan-cajcaman yanagaran.

will be added

X\