Hechos 2

1Chaura Pentecostés junaj Jesústa wiyacuj irmänucuna juc pachallaçhu juturpaycaran. 2Illajpita shucucuy wayra japaraycaj-jina janaj pachapita çhayamuran. Llapan wiyaran. 3Ratataycaj nina-jina raçhicar-raçhicar llapan juturajcunaman aypucaran. 4Espíritu Santu charicurcuptin, juclä marcacunapa rimaynintana llapanpis rimaran. Espíritu Santu rimachishanman-tupulla rimaran. 5Chay wichan Tayta Diosninchita manchapacuj Israel runacuna chay-tucuy marcapita sharcamur, Jerusalén marcaçhu juturpaycaran. 6Shucucuy wayra japaraycajta-jina wiyarga, llapan runa shuntacaran. Çhayaptin, irmänucuna juclä marcacunapa rimaynincunata rimarcaycaran. Chaura runacuna yarpaçhacuran: Imaniraj rimayninchita riman, ¿au? nir. 7Mancharishpan quiquin-pura parlanacäriran: Cay runacuna, ¿manachu Galilea marcallapita? 8Juc marcallapita caycar, ¿imanirtaj marcanchi rimashanta riman? 9Cayçhu juturpaycanchi Partia marcapita, Media marcapita, Elam marcapita, Mesopotamia marcapita, Judea marcapita, Capadocia marcapita, Ponto marcapita, Asia marcapita, 10Frigia marcapita, Panfilia marcapita, Egipto marcapita, Cirene marca washlänin Libia quinranpita, Roma marcapita. Waquinninchina yurishanchipita-pacha Israel runa canchi. Waquinninchim ichanga jäpa runa caycar, Israel runaman ticrashcanchi. 11Waquinninchi Arabia marca quinranpita, Creta marca quinranpita shamushcanchi. Chay-tucuy marcaçhu yurish caycarpis, quiquinchipa shiminchiçhu wiyaycanchi munayniyuj Tayta Diosninchi imatapis rurashancunata. 12Chaymi tantiyacuyta mana camäpacur, quiquin-pura tapunacärisha: ¿Imaraj, au? nir. 13Waquin runacunam ichanga ashllir niran: Chaycuna maçhacäcusha. Ima rimashantapis mana musyanchu nir. 14Chaura Pedro çhunca jucwan caçha-masincunawan juturpaycashançhu jatarcur, niran: Jerusalén runacuna, Israel-masicuna, jäpa runacunapis, sumaj wiyacäriy. 15Llutanta yarpaycanqui. Mana maçhashchu carcaycä. Chayraj runacunapis aruj yaycusha. Çhajçha intipis mana çhayamunrächu. ¿Imanuypataj maçhash carcaycäman? 16Manchäga unay willacuj Joel rimashan çharcuycan. 17Tayta Diosninchi rimachiptin, Joel niran: Tayta Diosninchi nin: Cay pacha mana ushyacaptillan, Espíritu Santuwan llapan runata charicurcushaj. Wamrayquicuna warmi ullgupis shimïta willapäcunga. Jipashcunatapis, müsucunatapis ricapacachishaj shungü munashäta rurananpaj. Auquincunatapis suyñuyninçhu musyachishaj shungü munashanta. 18Chay wichan Espíritu Santuta caçhamushaj wiyacamajcunaman. Chaymi paycuna warmi ullgupis shimïta willapäcungapaj. 19Cay pacha mana ushyacaptillanraj, janaj pachaçhüpis mana imaypis ricashancunata ricachishaj. Cay pachaçhüpis mana ricashancunata ricanga. Ricangapaj yawarta, ninata, jushtayta. 20Inti wañucäcunga. Quilla wañucäcur yawarman ticracuringa. Chaypitaraj Tayta Diosninchi munashanta camacächinga. Chay junaj sumaj manchariypaj canga. 21Pipis: Taytallau Tayta, washaycallämay nir mañacuptin, llapanta Tayta Diosninchi jishpichinga. 22Israel marca-masicuna, wiyamay. Nazaret marca Jesústa quiquin Tayta Diosninchi acracusha. Pï cashantapis tantiyachimashcanchi. Tayta Diosninchi caçhamushanta tantiyacunanchipaj ricay ñawinchiçhu tucuyta Jesús rurasha. Tayta Diosninchi camacächiyninpa runacunata micuchisha. Jishyaçhucunatapis allchacächisha. Wañushcunatapis cawarachisha. Supaycunatapis jargusha. Wayratapis çhawachisha. 23Ichanga Tayta Diosninchi camacächiptin, rusçhu wañuchinanpaj juyu runacunapa maquinman Jesústa çhurashcanqui. 24Wañuchish caycaptinsi, Tayta Diosninchi cawarachisha. Chacaj pachaçhu ushyacänan mana camacaranchu. 25Chaymi unay mandaj Davidpis Jesúspaj yarpar isquirbiran: Imay-imaypis ricay ñawïçhu Washämajnï dirïcha-caj lädunçhu caycan. Yanagämaptin, imatapis mana manchacüchu. 26Manchäga jatunpa cushicü. Cushicuyllawan Tayta Diosninchita alliman çhurä. Wañucush carpis, jamllaman imaypis yupachicushaj. 27Wañushllata chacaj pachaçhu mana jaguiycamanquipächu. Acramashayqui mincayniqui caycaptï, ayä ismunantapis mana camacächinquipächu. 28Alli cawayta tarichimashcanqui. Ricay ñawiquiçhu juyar, cushi-cushilla cawashaj. 29Marca-masicuna, sumaj tantiyacunquiman. Mandaj David unayna wañucusha. Pamparaycan. Pamparashantapis canancaman ricsinchi. 30Payga Tayta Diosninchipa willacujnin caran. Willacujnin captin, quiquin Tayta Diosninchi musyachicuran: Juc willcayqui Israel marcapa mandajnin cangapaj nir. 31Mandaj David musyachicuran Washäcujta wañushllata chacaj pachaçhu mana jaguinanta, pamparashallançhu mana ushyacänanta, ayanpis mana ismunanta. 32Musyachicushannuylla Washäcuj Jesústa Tayta Diosninchi cawarachimusha. Cawarishtana llapanï ricashcä. 33Janaj pachaman shuntacusha. Alliman çhurar, mandäshinanpaj jamarashanman jamachisha. Quiquin Jesúspis Tayta Diosninchi camacächiptin Espíritu Santupa maquinçhu car, camacächisha nuwacunatapis Espíritu Santu charimänanpaj. Aunishan-jina llapanïta charicarcamashanta musyanquina. Ñawiquiwan ricarcaycanqui. Rinriquiwan wiyarcaycanqui. 34Sumaj tantiyacuy. Mandaj David mana janaj pachaman aywashachu. Chaypis quiquin isquirbiran: Tayta Diosninchi Washäcujnïta nisha: Mandäshimänayquipaj lädüçhu jamacuy 35cunçharyuyquicunata pampaman çhuranäcaman. Nishayqui-nishayqui munashayquita rurachinquipaj. 36Israel-masïcuna, sumaj tantiyacuy. Rusçhu wañuchishayqui Jesústa cawarcachir, Tayta Diosninchi çhurasha Washäcujninchi cananpaj. Payga Taytanchi caycar, maquinçhu purichimanchi. 37Chaura llapan runa juyupa llaquicur, Pedrutawan waquin caçhacunata tapuran: Marca-masicuna, cananga, ¿imatataj ruräman? nir. 38Pedruna llapanta piñapar, niran: Llapan jucha aparicuypita wanacäriy. Washäcuj Jesúspa shiminta çhasquicur, ushyacäriy. Chaura Tayta Diosninchi juchayquita jungaycur mana yarparanganachu. Pay camacächiptin, Espíritu Santupis maquinçhu purichishunquipaj. 39Espíritu Santu mana nuwacunallatachu maquinçhu purichiman. Manchäga Tayta Diosninchi aunisha llapaniquipis Espíritu Santupa maquinçhu purinayquipaj. Payga maquinçhu purichishunquipaj jamcunatapis, wamrayquicunatapis, Israel runa captiquisi, jäpa runa captiquisi. Pï-maytapis acracushancunata maquinçhu purichinga. 40Tucuy-jinanpa llapan runata Pedro piñaparan: Waquin runa juchata aparicullar cawaptinpis, ama juchata aparicuychu. Manchäga ñacaypita jishpicäriy nir. 41Pedro willapashanta çhasquicujcuna quimsa waranga-ima (3,000) caycaran. Chay junajlla ushyacuran. Ushyacur niran: Ima allish Tayta Diosninchi Washäcuj Jesúswan jishpichimanchi nir. 42Paycuna Jesúspa caçhancuna willapashanta wiyacuj. Juc shungulla cawaj. Tantata paquipanacur mallichinacärij. Tayta Diosninchita mañacärij. 43Jesúspa caçhancuna Tayta Diosninchi camacächishanta ruraptin, pipis tantiyayta mana atiparanchu. Chaymi llapan runa Tayta Diosninchita manchapacuran. 44Jesústa wiyacuj irmänucuna juc shungulla cawaj. Imancunatapis raquipänacuj. 45Çhacrancunatapis, imancunatapis ranticuycur, pishipacushanman-tupulla tarichij. 46Waran-waran Tayta Diosninchipa wasinçhu jutucaj. Wasincunaçhüpis shuntacaycur-shuntacaycur cushi-cushilla micupacärij. Juc shungulla cawaj. 47Tayta Diosninchita alliman çhuraj. Chaymi llapan runa alli ñawinpa ricaran. Chaynuypa waranmaylla Jesúspa shiminta çhasquicuran. Sumaj achcajyaran.

will be added

X\