Hechos 19

1Chaura Corinto marcaçhu irmänu Apolo juyashan wichan Pablo puntan-puntan quinranpa aywar, Éfeso marcaman çhayaran. Irmänucunawan tincur, tapuran: 2Tayta Jesúspa shiminta çhasquicuptiqui, ¿Espíritu Santu charicurcushcashunquichu? nir. Chaura paycuna niran: Espíritu Santu runacunata charishanta mana imaypis wiyarüchu. 3Pabluna tapuran: Chaura, ¿pipa shiminta wiyacushpayquitaj ushyacushcanqui? nir. Paycuna niran: Ushyachicuj Juanpa shiminta willapämaptillan, ushyacärishcä. 4Chaura Pablo niran: Ushyachicuj Juan runacuna juchapita wanacuptinraj, ushyachiran. Ichanga quiquin Juan niran: Mana Washäcujchu cä; payga jipätaraj shamunga. Paypa shiminta çhasquicunquiman. Chaynuy nir Tayta Jesús shamunanpaj rimaycaran. 5Chaura Pablupa shiminta wiyacur, Tayta Jesús nishannuylla ushyacuran. 6Jinarcur irmänucunapa umanman maquinta çhuraycur, Tayta Diosninchita Pablo mañacuran. Mañacuptin, Espíritu Santu charicurcuran. Charicurcuptin, juc casta rimaycunata rimaran. Tayta Diosninchi yarpächishantapis musyachicuran. 7Runacunaga çhunca ishcaywan-yupay (12) juturpaycaran. 8Chaura Éfeso marcaçhu juyar shuntacäna wasiman aywarcur-aywarcur, quimsa quillantin Pablo tantiyachicuran Tayta Diosninchipa maquinçhu cawananpaj. Mana manchacullar imanuypapis aunichiyta munaran. 9Tincupäcujcunam ichanga chapata rurar, llapan runata shimiyaran: Chay mushuj willapawan pantachishunquipaj. Chaynuy niptin llapan irmänucunata pushacurcur, Tiranupa nishan runapa shuntacäna wasinman Pablo witicuran. 10Ishcay watantin willapäcuptin, Asia quinran llapan Israel runacunapis, jäpa runacunapis Tayta Jesúspa shiminta wiyash caran. 11Tayta Diosninchi camacächiyninpa Pablo jishyaçhucunata allchacächiran. Supaycunatapis jarguran. 12Chaymi Pablupa müdananta imallantapis apacuran jishyaçhucunata allchacächinanpaj. Çhayachiptin, jishyaçhucuna allchacäcuran. Supaycunapis caçhariycuran. 13Chay wichan ishcaj-quimsaj Israelcuna supayta jargur puriran. Paycunapis Tayta Jesús nishannuylla supaycunata jarguyta munar, niran: Pablo willacushan Tayta Jesúspa jutinwan jargushayqui. Cay runata caçhariy nir. 14Chayta ruraycaran cüra Escevaspa jançhis ullgu wamrancuna. Escevasga Israel runacunapa mayur cüran caran. 15Juc junajmi ichanga Jesúspa shiminçhu jarguyta munaycaptin, supay niran: Jesústa ricsï. Pablo pï cashantapis musyä. Jamcuna, ¿pitaj canqui jargumänayquipaj? 16Chaynuy nir supay pucllacushan runa ullgucäcuran. Llapanta charircur, magar ushyaran. Chaura Escevaspa wamrancuna jalapaçhalla, yawarlla wasipita jishpicäriran. 17Éfeso marcaçhu chaynuy cashanta mayar, Israel runacunapis, jäpa runacunapis llapallan manchariran. Tayta Jesús sumaj munayniyuj cashanta tantiyaycur, alliman çhuraycäriran. 18Chaymi waquin irmänucuna jucha aparicushanta mana chapacuranchu. Llapan wiyay willacuran. 19Musyapacujcunapis llapan runapa ricay ñawinçhu chapata ruracunan libruncunata rupachiypa ushyaran. Chay librucunapa çhaninta jurguptin, pichga çhunca waranga (50,000) junaj runa arushanpa çhaninman çhayaran. 20Chaynuypa Tayta Jesúspa shimin chay-tucuyçhu mayacaran. Munayniyuj cashantapis runacuna sumaj tantiyacuran. 21Chaypita Pablo yarpaçhacuran: Macedonia quinrançhüpis, Acaya quinrançhüpis irmänucunata watucurishaj. Jinarcur Jerusalén marcaman cutishaj. Chaypita Roma marcaman aywayta camashaj nir. 22Chaynuy yarpar, willacäshij-masin Timoteutawan Erastuta ñaupachiran Macedonia marcacunaman. Quiquin Pablum ichanga Asia marcacunallaçhüraj juyapäriran. 23Chay wichan Jesúspa shimin-janan Éfeso runacuna apaycaçhänacur, ullgucaycäriran. 24Ullgucarcärinanpaj jillay tacaj Demetrio juchayuj caran. Payga jillaypita tacaj acapalla Artemisapa capillanta-niraj. Tacapacujcuna jillayta sumaj tariran. 25Juc junaj arüshijnincunatawan llapan tacaj-masincunata shuntaycur, Demetrio niran: Tacapacushanchi jillayllawan cawashanchita musyanqui. 26Canan ricay ñawiquiçhu Pablo willapäcuycan: Runa rurashan capillaga mana munayniyujchu nir. Willapäcushanta cay Éfeso marcanchiçhüpis, Asia marcacunaçhüpis mayna runacuna aunisha. Rurashanchi capillata mana manchapacunnachu. 27Yargayman çhayachimäshun. Acapalla capilla rurashanchicunata pipis mana rantinganachu. Mamanchi Artemisatapis, capillantapis runacuna mana manchapacunganachu. Payta llapan runa manchapacuj Asia marcanchicunaçhüpis, may-chayçhüpis. 28Demetrio chaynuy niptin, tacaj-masincuna juyupa ullgur japarpararan: Mamanchi Artemisallata alliman çhurashun. Payga munayniyujmi. Éfeso runacunapa mamanmi nir. 29Japarpaptin, llapan runa ullgucaycäriran. Tincuypa-tincuycashançhu Aristarcutawan Gayuta charircur, läsaman jançharan. Macedonia marcapita Aristarcuwan Gayo Pabluta yanagämuran. 30Yanaguincunata charishanta mayar, nanachicunanpaj Pablupis aywayta munaran. Munaptinpis, purïshijnincuna miçharan. 31Asia marcapa waquin mandajnincunapis Pabluwan yaçhänacur, imamanpis mana jaticänanpaj willachiran. 32Chaura läsaçhu waquin runa wichaypa-uraypa japarpaptin, marca runacuna imapita tincuypa-tincushantapis mana tantiyaranchu. 33Chaymi waquin mayur Israel runacuna Alejandro jutiyuj runata ñaupaman jayacur, rimachiran. Chaura Alejandro llapan runata tantiyachinanpaj maquinwan upällachiran. 34Alejandro Israel runa cashanta musyar, ishcay üra-ima juc shimilla llapan Éfeso runacuna japarpararan: Mamanchi Artemisallata alliman çhuralläshun. Payga munayniyuj. Éfeso runacunapa maman nir. 35Chaura Éfeso auturdäcunapa isquirbänun llapanta upällaraycachir, niran: Marca-masïcuna, wiyaycallämay. Marcanchiçhu Mamanchi Artemisa juyashanta llapan runa musyan. Capillantapis sumaj rican. Mamanchi-niraj janaj pachapita shicwamushantapis musyan. 36Pipis mana wasguipanmanchu. Chaymi manacajllapäga ama tincupänacushunchu. Imata rurananchipäpis sumajraj yarpaçhacushun. 37Jançhamushayqui runacuna Mamanchi Artemisapa capillanta mana suwashachu. Pampamanpis mana çhurashachu. 38Demetriuwan tacaj-masincuna piwanpis dimandanacuyta munar, auturdäcunaman aywachun. Quiquincuna nanachicuchun. 39Manchäga shuyninpa auturdäcunata jayarcachir, imatapis parlanacärichun. 40Canan tincuypa-tincushanchi mana allichu. Mayur mandajninchicuna mayar, ticrapanacushanchita yarpanga. Tapumaptinchi, imanuypa chapacuytapis mana camäpacushunpächu. 41Chaynuy piñacuriycur, llapan runata wasinman-caman cutircachiran.

will be added

X\