Hechos 18

1Chaura Atenas marcapita aywacur, Corinto marcaman Pablo çhayaran. 2Israel-masin Aquilawan tincuran. Aquilapa warmin caran Priscila. Aquilaga Ponto marcapita caran. Chaypis mandaj Claudio llapan Israel runacunata Italia quinran Roma marcapita jarguchiptin, aywacuran. Chayraj Corinto marcaman çhayash caran. 3Aquila purichina jiru çhaqui wasi tulduta jiraj. Pablupis wasi tulduta jiraptin, iwal juyar Aquilawan yanapänacuran. 4Diyawardacunaçhüna Israelcunapa shuntacäna wasinman aywaycur, Tayta Jesúspa shiminta Pablo sumaj tantiyachiran. Israel runacunatapis, jäpa runacunatapis aunichiyta munaran. 5Macedonia marcapita Silaswan Timoteo çhayamuptin ima ruraynintapis caçhariycurna, Israel runacunata Pablo willaparan: Jesúsga Tayta Diosninchi acracushan Washäcujninchi nir. 6Willapaptinpis Israel runacuna wiyacuyta mana munar, Pabluta ashllir ushyaran. Ashllir ushyaptin, müdananta tapsir ushyashpan piñacuran. Cananga quiquiquicunapita ñacaymanpis çhayanquipaj. Imaman çhayaptiquipis, ama jitapamanquichu. Cananpita jäpa runacunata Tayta Diosninchipa shiminta willapäshaj nir aywacuran. 7Shuntacäna wasipita aywacur, Pablo çhayaran Tito Justupa wasinman. Payga Tayta Diosninchita manchapacuj runa caran. Wasinpis caran shuntacäna wasi wajtallançhu. 8Chay shuntacäna wasipa mayur runa Crispupis wasinpa Tayta Jesúspa shiminta çhasquicäriran. Waquin Corinto runacunapis Pabluta wiyar, Tayta Jesúspa shiminta çhasquicäriran. Payman yupachicur, ushyacäriran. 9Juc chacay ricapacuynillançhu Pabluta Tayta Jesús niran: Pablo, imatapis ama manchacuychu. Shimiquita ama amucurcuychu. Shimïta willapäcamuy. 10Maquïçhu puriptiqui, pipis mana imanäshunquipächu. Cay marcaçhu acracushä runacuna achcajmi. 11Chaymi wata pullanninraj Corinto marcaçhu Pablo juyapäriran Tayta Diosninchipa shiminta tantiyachicur. 12Mandaj Galiónpa maquinçhu Acaya marcacuna caycashan wichan Israel runacuna Pabluta ticrapacurcuran. Charircur, Galiónpa dispächunman aparan: 13Cay runa: Tayta Diosninchita alliman çhurashun nirpis, mandajninchipa shiminta pampaman çhuraycan nir. 14Chaura Pablo chapacunanpaj caycaptin, Mandaj Galión niran: Israel runacuna, cay runa llutanta rurash captin, wañuchicush-ima captin, shimiquita wiyäman. 15Ninshi-ninshi-jananmi ichanga, Moiséspa shimin-janan piñanacushayqui-jananmi ichanga, wiyaytapis mana munächu. Quiquiquicunalla ushyacächinquiman. 16Chaynuy nir dispächunpita llapanta jarguriran. 17Jarguriptin, dispächu puncullaçhu Sóstenesta magapäcuran. Payga shuntacäna wasiçhu mayur runa caran. Chaypis mandaj Galión mana imasi jucuranchu. 18Corinto marcaçhu unaylla Pablo juyapäriran. Chaypita llapan irmänucunata wamayaycur, Cencreas marcaman aywacuran. Cencreas marca lamar cantullançhu caran. Aquilapis warmin Priscilawan aywäshiran. Siria quinranman mana llucshillar, Cencreas marcallaçhu Pablo ajchanta rutucuran: Tayta Diosninchiwan parlanacushäta çharcushcäna. Payga sumaj washämasha nir. Chaynuy nir bütiman jigarcur, aywacäriran. 19Éfeso marcaman çhayar, warmintinta Aquilata jaguiycuran. Chay marcaçhu shuntacäna wasiçhu Israel runacunawan Pablo tapunacuran. 20Israel runacuna Pablo unaylla juyapärinanta munaran. 21Munaptinsi, Pablo niran: Juyayta mana camäpacüchu. Tayta Diosninchi camacächiptinmi ichanga, imayllapis cutimushaj. Chaynuy nir Éfeso marcapita bütiwan aywacuran. 22Cesarea marcaman çhayar, Jerusalén marcaman aywaran jutucaj irmänucunata wamayaj. Jinarcur Antioquía marcaman cuticuran. 23Antioquía marcaçhu unaylla juyapäriran. Chaypita unay çhayashan marcacunaman yapay watucuj Pablo cutiran. Galacia quinranmanpis, Frigia quinranmanpis cutiran. Marcan-marcan purir, llapan irmänucunata sumaj shacyächiran. 24Chay wichan Alejandría marcapita Éfeso marcaman Apolo jutiyuj runa çhayaran. Payga Israel runa caran. Rimaytapis sumaj yaçhaj. Tayta Diosninchipa shimintapis sumaj tantiyaj. 25Tayta Jesúspita sumaj yaçhacuran. Chaymi llapan shungunwan Jesús pï cashantapis tantiyachicuran. Ichanga Ushyachicuj Juanpa shimillantaraj Apolo musyaran. 26Juc cuti shuntacäna wasiçhu Apolo llapan shungunwan willapäcuycaran. Chayta wiyar, Aquila warmintin shuyninpa wasinman pusharan. Aquilapa warmin caran Priscila. Jinarcur mana musyashancunata sumaj tantiyachiran. Tayta Diosninchipa maquinçhu imanuy-imanuy cawananpäpis willaparan. 27Chaypita Acaya quinranman Apolo aywacuyta munaptin, irmänucuna shacyächiran. Acaya quinrançhu irmänucunamanpis cartacuran: Apolo Tayta Diosninchipa shiminta sumaj tantiyachicun. Llapan shunguyquiwan çhasquicäriy, ari nir. Allipaj chay marcaman Apolo çhayaran. Tayta Diosninchi yanapaptin, irmänucunata sumaj shacyächiran. 28Israel-masincunam ichanga tincuparan: Jesús mana Washäcujninchichu nir. Chaypis llapanpa ricay ñawinçhu Tayta Diosninchipa shiminta liguipar, Apolo tantiyachiran: Jesúsga rasunpa Washäcujninchi nir.

will be added

X\