1 Aywacur, Pabluwan Silas Anfípolis marcaman, Apolonia marcaman çhayaran. Chaypita Tesalónica marcaman çhayaran. Chayçhu Israel runacunapa shuntacäna wasin caycaran. 2 Yaçhacash car, shuntacäna wasiman Pablo aywaran. Quimsanin diyawarda junajcunaçhu Tayta Diosninchipa shiminta tantiyachicuran: 3 Washäcuj wañunanraj, cawarimunanraj caran nir. Chaycunata sumaj tantiyachicur niran: Jesúsmi Tayta Diosninchi caçhamushan Washäcuj caycan. Paypita willapashcaj. 4 Sumaj willapaptin, waquin Israel runacuna Jesúspa shiminta çhasquicuran. Pabluwanpis, Silaswanpis jutucaran. Paycunawan waquin mama-warmicunapis, achcaj jäpa runacunapis jutucaran. Jäpa runacuna Tayta Diosninchita manchapacuj. 5 Jesúspa shiminta mana çhasquicuj mayur Israel runacunam ichanga chiquicuywan juyupa ullgucaycäriran. Chaymi jilla runacunatawan chiqui runacunata mincacuran: Llapan runata shimiyay Pablupawan Silaspa cunçhan jatarinanpaj nir. Mincacushan runacuna Jasónpa wasinman çhayapuran. Pablutawan Silasta chariyta munaran ullgush caycaj runacunapa maquinman çhurananpaj. 6 Chaura pacharashançhu mana tarir, wasiyuj Jasóntawan waquin irmänucunallata jançharcur-jançharcur auturdäcunaman aparan. Çhayaycächir, japariypa niran: Cay runacuna marcan-marcan runacuna ticrapanacachiyllaçhu aruycan. Marcanchimanpis çhayamushana. 7 Jucshi mandamajninchi. Jesús nishanshi mandamajninchi nircaycan. Roma mandamajninchipa shimintapis pampaman çhurarcaycan. Chay ticrapanacachicujta cay Jasónraj pachächishapis. 8 Chaynuy niptin, mandajnintin llapan runa ticrapanacuran. Ullgucarcäriran. 9 Chaymi jillayta jutupaycuptinraj, irmänucunatapis, Jasóntapis, auturdäcuna caçhariran. 10 Chaura chacarcuptillan, Berea marcaman irmänucuna Pablutawan Silasta caçharcuran. Berea marcaman çhayar, Israelcunapa shuntacäna wasinman aywaran. 11 Tesalónica runacuna juyu captinsi, Berea runacuna alli shungu caran. Pablo willapäcushantapis cushish wiyaran. Ichanga waran-waran Tayta Diosninchipa shiminta liguiran tincuchinanpaj. Willapashan rasunpa cashantapis, mana rasunpa cashantapis sumaj tincuchiran. 12 Chay marcaçhu Israel runacunapis achcajmi Tayta Diosninchipa shiminta çhasquicäriran. Jäpa mama-warmicunapis, jäpa mayur runacunapis çhasquicuran. 13 Chaura Berea marcaçhu Pablo willacushanta mayar, Tesalónica marcapita mayur Israel runacuna aywapuran. Çhayar, runacunata shimiyaran Pabluta ticrapunanpaj. 14 -15 Chaymi irmänucuna Pabluta jishpirachiran lamarpa cantullanpa aywacunanpaj. Yanagajnincunapis Atenas marcacaman aywäshiran. Berea marcaçhümi ichanga Silaswan Timoteo juyapäriran. Chaymi Atenas marcapita cutircamur, Pablupa yanagajnincuna niran: Silas, Timoteo, jucllash Atenas marcaman aywanqui. 16 Atenas marcaçhu Silastawan Timoteuta shuyar, Pablo ricapacur puriycaran. Jircapa jaracunanta achcata ricar, juyupa llaquicuran. 17 Chaymi shuntacäna wasiçhu Israelcunawanpis, Tayta Diosninchita manchapacuj jäpa runacunawanpis tapunacuj. Läsaçhüpis waran-waran tincushan runata tantiyachij. 18 Epicúreos nishan yaçhajcunawanpis, Estoicos nishan yaçhajcunawanpis tapunacuj. Chaura Tayta Jesúspita Pablo willapäcuptin, wañushcuna cawarinanta willapäcuptin, apaycaçhänacuran: ¿Imataraj cay runa rimacunsi? nir. Waquinnam ichanga niran: Mana ricsish jircacunapitaçhi willacucuycan. 19 Chaura Areópago nishan pachaçhu sisyunman pusharcur, tapuran: ¿Ima willapatataj puriycächinqui, unaypita-pachachu, jipatarächu? 20 Rimashayquita imaypis mana wiyarüchu. ¿Tantiyachimanquimanchu? nir. 21 Chay Atenas marcaçhu jinan runapis, jäpa runacunapis jipa willapäcunata ashillar cawaj. 22 Chaymi Areópago sisyunçhu llapanta tantiyachir Pablo niran: Atenas taytacuna, mä, sumaj wiyaycallämay. Jamcuna jircacunata sumaj manchapacunqui. 23 Marcayquipa purir, jircapa jaracunantapis, capillancunatapis ricapashcä. Juctapis tarishcä. Mana ricsishanchi Taytanchipa capillan nir isquirbiraycan. Chaura pï cashantapis mana musyaycarsi, manchapacuycanqui. Cananga paypita willapäcuycä. 24 Cay pachatapis, llapan imacunatapis Tayta Diosninchi camaran. Paypa maquinçhümi janaj pachapis, cay pachapis caycan. Chaymi runa rurashan wasita mana wasichacunchu. 25 Runacuna yanapänanpaj imancunapis mana pishinchu. Quiquinmi cawachimajninchi. Paypita cawanchi. Alli cawananchipaj llapanta tarichimanchi. 26 Tayta Diosninchi juc runallapita chay-tucuyçhu marcayächisha. Mayçhu yurinanchipäpis, imaycaman cawananchipäpis camacächin. 27 Llapantapis camacächiran yarpaçhacurir-yarpaçhacurir pï cashantapis musyananchipaj. Yatayllapa ashishan-jina tantiyacuyta munar, rasunpa Tayta Diosninchi cashanta tantiyacushun. Payga ricaycämanchi. 28 Yurinanchipäpis, arunanchipäpis, cawananchipäpis, paymi camacächin. Chayçhi unay willapa rimajniquicunapis niran: Chay taytallapita caycanchi. 29 Rasunpa Tayta Diosninchipa wamran caycar, runa rurashancunata ama taytachacushunchu. Runacuna yarpaçhacurir-yarpaçhacurir jircapa wasintapis tucuy-nirajta ruran jurillapita, jillayllapita, rumillapita. 30 Ñaupata runacuna mana musyayninwan juchata ruraptinpis, Tayta Diosninchi mana rimacuranchu. Cananmi ichanga may-chayçhüpis runacuna jucha aparicushanpita wanacunanta, shiminta wiyacunanta munaycan. 31 Juc junaj llapan runapa juchanta Tayta Diosninchi jurgapanga. Juchanchita jurgapämänanchipaj shuyninpa Jesústa acracusha. Acracushanta musyananchipaj wañushanpita cawarachimusha. 32 Wañushanpita cawarachimusha niptin, waquin runa asipar ushyaran. Waquinna juc junaj wiyananpaj jitapuran. 33 - 34 Waquin runacunam ichanga Pablo willapäcuptin, Tayta Jesúspa shiminta çhasquicuran. Chaura Pablo sisyunpita llucshicuptin, aywäshiran yaçhaj Dionisiupis, mama Damarispis, waquin irmänucunapis. Dionisiuga Areópago nishan pachaçhu llapan runata tantiyachij.
